Визез бурдъя коньдон

Удмурт Дунне
By Удмурт Дунне 18 октября, 2011 09:50

Визез бурдъя коньдон

Евгения Зайцева кивалтӥсеныз Пётр Крыловен.

Шаерамы нырысьсэ  ортчиз 18-28 аресъем егитъёс пӧлын наука но техника удысъя «УМНИК» ӵошатскон. Удмурт Республикаысь Правительство юрттэмъя сое радъяз Россиысь Наука но техника удысысь пичи предприятиосты азинтонъя фондлэн Удмуртиысь ёзэз. Егит нылъёс но пиос кык нунал ӵоже асьсэлэсь ужъёссэс утизы Правительстволэн юртаз.

Россиысь фондэн радъям «УМНИК» программа шаерамы ужаны кутскиз таяз арын июнь толэзьысен, нош Россиын егит учёнойёслы но ужбергатӥсьёслы юрттэт сётӥське ни 17 ар ӵоже. Республикаямы та ужез вырӟытӥз но фондлэн ёзэныз кивалтыны басьтӥськиз ужбергатӥсь, Ижысь техникая кун университетысь егит тодосчи, техника удысъя кандидат Константин Широбоков.

Конкурслы йылпумъянъёс лэсьтыса, Москваысь куно, Наука но техника удысысь пичи предприятиосты азинтонъя фондлэсь «УМНИК» программазэ радъясь группаен кивалтӥсь Алексей Куликовских пусйиз, дорады нырысьсэ радъям ужрад республикаысь кивалтӥсьёс ласянь вылэ ӝутэмын, пе. Озьыен, егит учёнойёс асьсэлэн ужъёсынызы шаермылэн улоназ сюрес лёгыны быгатозы, Удмуртилэсь данзэ ӝутозы.

Огъя верано ке, шаерамы радъям конкурсэ пыриськизы Ижысь техникая кун университетысь но солэн филиалъёсысьтыз, Удмурт кун университетысь, Ижысь медициная кун академиысь, Ижысь гурт хозяйствоя академиысь но мукет вузъёсысь студентъёс но аспирантъёс, ужбергатӥсьёс, заводын ужасьёс, ваньмыз — 106 мурт. Проектъёс дасямын вал биотехнология, иворъёсты вӧлмытон технология, тазалыкез утён, химия технология, прибор но машина лэсьтон удысъёсъя.

Йылпумъян ӵошатсконэ пыриськиз 36 уж. Котькудӥз автор пусъемын Данъян грамотаен, нош дасэз егит учёнойёс фонд пыр 400 сюрс манет тыр грант утӥзы. Соос пӧлын — Удмурт кун университетысь физико-энергетической факультетысь аспирант Евгения Зайцева. Солэн ужез сӥземын медицина удысын но МЧС-ын ужасьёслэсь техниказэс умоятонлы.

— Ваньмыз ик проектъёс туж ӟечесь вал, туала куронъёслы тупало, — шуэ шумпотон пӧлы выем егит тодосчи. — Вить минут куспын дунъясьёс азьын проектлы презентация лэсьтоно вал, собере пӧртэм юанъёслы валэктонъёс сётоно. Бизнес-проектъя трос юанъёс вал. Мынам кивалтӥсе — Пётр Крылов. Туж бадӟым тау солы табыдӟа вормон басьтэмелы. Грант юрттоз кутскем ужмес азьланьтыны. Проектмес улонэ пыӵатон понна спонсоръёсты шедьтыны кулэ луоз на.

Конкурсэз радъясьёслэн но дунъясьёслэн верамзыя, мукет проектъёс но ӟечесь, но соос бордын ужано на, йылаз-пумаз вуттоно. Егитъёс азьланьын но пыриськыны быгатозы пӧртэм вожвылъяськонъёсы. Константин Широбоков пусйиз, шаерамы кылдоз егит учёнойёслэн «УМНИК» клубзы. Фондлэн программаезъя азьланьтӥськозы конференциос но семинаръёс, вуоно арын нырысетӥез семинар ортчоз феврале.

Фондлэн Удмурт ёзэз азьланяз ужзэ паськытатыны малпа. Вуоно арысен ӵошатскон ялэмын луоз пичи предприятиос пӧлын, отӥяз вожвылъяськонэ пыриськыны быгатозы ини бадӟым предприятиос но.

Лия Малых.

Туспуктӥз Владимир Беломорских.

Удмурт Дунне
By Удмурт Дунне 18 октября, 2011 09:50
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<