Бускельёс — вормисьёс

Удмурт Дунне
By Удмурт Дунне 26 октября, 2011 12:11

Бускельёс — вормисьёс

С. Емельянова, Л. Яковлева но Т. Родионова.

11-тӥ арзэ Ижын радъяське ни «Сяськаясь город» конкурс. Устоез бакча, азбар, балкон но трос мукет номинациосын вормон понна 1 сюрс 500 пала адямиос вожвылъяськизы. Чеберлык понна нюръяськонэ предприятиос но пыриськизы.

Конкурсын вормисе потэмъёсты валлян данъязы Удмурт театрын. Соосты ӟечкылазы Правительстволэн Тӧроез Юрий Питкевич но Иж городлэн йырыз Александр Ушаков.

— Таӵе конкурсъёс ортчытыса, городлэн тусыз воштӥське, тросгес адямиос чеберлыкез гажаны кутско, — шуэ Александр Ушаков. — Ижысь вань ёросъёс ӵошатсконэ пырисько. Озьы синмаськымон азбаръёс кылдо, соос шоры учкыса, адямиослэн мылкыдзы капчи луэ.

— Та конкурсэз тужгес шулдыреныз лыдъясько, — шуэ Юрий Питкевич. — 1993-тӥ арозь Глаз городын ужай, соку шаермылэн уйпалыз чебергес потэ вал. Со дырысен трос аръёс ортчизы, Ижмы тодмантэм воштӥськиз. Соинтэк шат городысь кемалы кошкылэмъёс Ижмес ум тодмаське ни шуо. Шумпотӥсько чеберскемезлы но пушъемезлы. «Огъя Россия» партия юрттэмен, берло вакытэ азбаръёсысь сюресъёс выльдэмын.

«Сяськаясь городэ» пичиез но, бадӟымез но пыриськиз. Огъёсыз улон котырзэс чебергес карыны тыршизы, мукетъёсыз школазэс яке нылпи садзэс шулдыртыны  выризы. Городысь предприятиос но та конкурслэсь палэнэ ӧз кыле. Куд-ог заводъёслэн азбаръёсазы парке кадь пыроно. Висисьёслэсь мылкыдзэс капчиятыны тыршо эмъяськон юртъёсын но. Инфекционной больницаен кивалтӥсь Игорь Дьяченко верамъя, нимысьтыз адямиос сяська будэтон бордын тыршо, асьсэлэн ик вань парниксы но. ИжГТУ-ын но чеберлык сярысь сюлмасько. Тодон-валан люкам сяна, студентъёс чеберлыкез гажаны, адямиослэсь ужамзэс дунъяны дышетско.

Пичи азбаръёсы гужем вуо пӧртэм выжыкылъёсысь геройёс, пичи ӵыпетъёсы туриос люкасько. Амалоос ма гинэ уг малпало!

Вормисьёс пӧлын вал Ижысь Демократической ульчаын улӥсьёс Светлана Емельянова, Людмила Яковлева но Татьяна Родионова. Бускельёс ог-огзы доры куное ӵем вуыло.

— Арысь аре чебер сяськаос будэтӥськомы, конкурсэ пыриськоно шуыса, йырамы но ӧз шуккылы, — вераз Светлана Семёновна. — Ульчаетӥмы кышномурт ортчиз, чебер азбаръёсты, убоосты туспуктылыса. Берло тодӥмы, Первомай ёрос администрациысь вылэм шуыса. Озьы милям сяська убомы шедиз «Сяськаясь город» конкурсэ.

Таӵе вормонзылы шумпотэмын удмурт кышноос. Соослэн азбаразы вазь тулысысен бер сӥзьылозь сяськаос пушъё. Светлана Емельянова но Людмила Яковлева та нуналъёсы пенсие потыны дасясько. Матэктӥсь юбилейзылы кыкназы но ӟеч кузьым — сяська керттэт — басьтӥзы.

Валентина Емельянова.

Туспуктӥз Владимир Беломорских. 

Удмурт Дунне
By Удмурт Дунне 26 октября, 2011 12:11
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<