Бурлеск — гольтреск?

Удмурт Дунне
By Удмурт Дунне 28 октября, 2011 11:12

Бурлеск — гольтреск?

Удмурт театр аслэсьтыз 81-тӥ сезонзэ усьтӥз Игнатий Гавриловлэн «Пужъятэм дэрем» пьесаеныз. Вуоно тулыс драматурглы вордӥськемез дырысен 100 ар тырмысал. Соин валче театр выль сезонзэ сӥзе Игнатий Гавриловичлэн юбилеезлы.

Удмурт театрлэн сцена вылаз таяз учыре вуиз туж йӧспӧртэм уж. Пьеса пуштросэзъя туала улонлы уг тупа ни, ӟуч кылын вераса, со укыр наивной. Игнатий Гавриловлэн 1973-тӥ арын гожтэм та ужез Удмурт театрлэн сцена вылаз пуктэмын 1975-тӥ арын, драматург улонысь кошкем бере. Пьесаез выльысь калык пӧлы поттыса, режиссёр Вячеслав Байков та уж шоры выль синмын учкыны быгатэм. Сцена вылэ вуиз комедия-бурлеск.

Мар сярысь бен та пьеса? Лушкаськемез понна пытсэт сьӧрын пукем Грация, гуртэ вуыса, аслыз синмаськытэ сизьымдон аресъем Паримонэз. Соин кузьмам пужъятэм дэрем пересьлэсь йырзэ берыктэ, кузпалыз но кулэ уг луы ни — ӵош люкам ваньбурзэс, вань коньдонзэс пинал кышноезлы кузьма. Та ужын Грациялы юрттэ бускель кышно — Балышкен, аслыз но мар ке палдоз, кожаса. Грация эшеныз адӟиськыны вуэ Милитриса. Инмысь усем коньдонлэн зыныз Грациялэсь азьвыл туганзэ но, бандитэз Паша Брыкинэз, вуттэ та гуртэ.

Комедия кылэн нокинэ уд паймыты ке, бурлеск «лес» мында малпанъёс кылдытӥз. Спектакль кутскон азьын одӥгез шуэ: кык полэс серекъялом ни, пе. Вис дыръя мукетыз валэктэ: бурлеск — со эротикаен герӟаськем клоунада. Спектакль учкем бере кылӥ на: та, пе, гольтресклы кельше. Но тросэз паймыса ик кылизы: мар вал сцена вылын? Соин ик мултэс ӧй луысал, дыр, спектакль кутскон азьын бурлеск пумысен кӧня ке кыл вераны.

Ярам, Интернет вань ай дунне вылын. Итальян кылысь берыктыса, «бурлеск» — «шутливый», «серемес» шуэмын. Кылдэмын Возрождение вакытъёсы. Шоу выллем та представлениос кырӟанъёсын, эктонъёсын вылӥллям, мюзикллы, водевильлы матэгес. Та жанр выльысь улӟем 19-тӥ даурысь 60-тӥ аръёсысен 20-тӥ даурысь 60-тӥ аръёсы. Америкаын бурлескез стриптизэн герӟаллям ни, секс-символъёс кылдӥллям. Одӥгез соос пӧлысь — Мэрилин Монро. Туала вакытэ та жанр нош ик улӟе.

Шумпотымон, Вячеслав Байков клоунада-шузияськон борды басьтӥськем шуыса. Кызьы со пӧрмем, таиз ини мукет ужпум. Пусъеме потэ ширма сьӧрысь суредъёсты. Тыл югдытэмен, соос яркыт но тунсыко  адӟисько. Крезьгур но юрттэ спектакльлэсь серемес пуштроссэ усьтыны.

Туж кельшиз дӥськутъёсын шудон (пуктӥсь суредась Наталья Байкова), йӧспӧртэм костюмъёс пыр син азе яркыт пуксё геройёслэн сямъёссы. Но пумаз-йылаз вуттымтэгес кадь потӥз куд-ог геройёсты йӧспӧръян. Спектакль мынон сямен соослэн мукет сямъёссы но шараясько уго. Нош выль дӥськут мукет образэз син азе ӟечгес пуктыны юрттысал.

Кылсярысь, туж урдылӥськись сямо Балышкенлы ӧзгес тупа кадь пур-пур удмурт дэрем. Шузи-мази улсы аналскем Сэдэй, пинал пыртосэз, солы визь тырем бере удмурт дӥсь тупасал ни. Сэдэй но пумаз барабанэныз валче комбинезонзэ мед куштысал. Сибире кошкыны дасяськись Милитриса гын сапег-а мар-а мед кутчасал.

Нош Паримон Осиповичлэн дӥськутэз туж тупа образэзлы. Синмаськеменыз солы пинал визь пырем шуыса адӟиське вакчи куко штаниен ветлэмысьтыз ик. Пыдес уллапалозь пыжыятэм дэрем дӥсяменыз но йыр берытскемез син шоры яркыт пуксе. Но котьмар каре, нокызьы оскем уг луы, сцена вылын сизьымдон аресъем песятай (шудӥз Валерий Баймурзин) тэтча-бызьылэ шуыса. Оло, туш ляконо вылэм-а мар-а? Озьы уката серемес образ пӧрмысал кадь потэ.

Тумошо пӧрмем Грациялэн туплы кельшись тӧдьыен-сьӧдэн сюрсо дэремез. Кузёезлы со юрттэ олокыӵе но маскара суредъёс кылдытыны. Котыр ласянь пӧрмем, малпасько, Тимофеевналэн образэз. Зэмлыкез утчаны яратӥсь песянай спектакль ӵоже дӥськутсэ куинь пол воштэ, но  горнзэ киысьтыз уг куя. Пионер дӥськут дӥсяса, эшшо но йӧспӧртэмгес адӟиське. Артистка Екатерина Яковлева туж быгатыса усьтэм аслэсьтыз Тимофеевназэ. Выросъёссэ адӟыса но кескич серектэмзэ кылыса гинэ но, амалтэк мыняськод.

Нош гольтыръяськон серемез уг потты. Шугъяськыса пуконо, куд-ог артистъёслэн кылъёссэс ньылыса кельтэмзылы яке ымтрос вераськемзылы. Собере спектакльлэн кыкетӥ люкетаз бурлеск шӧм но кытчы ке ышиз. Артистъёс пумозяз ӧз ворме асьсэлэсь образъёссэс.

Пумыз но валантэм кылиз. Сцена дуре оломабыдӟа куакапузъёс оло кикыпузъёс интыямын вал. Кытчы но малы соосын кошкизы Паримон но Балышкен? Тимофеевна ке берлоез интые луысал, валамон кадь: Грациялэсь кыкто пиоссэ ӵошен утьыны малпало ук таосыд. Оло, бурлеск макем валантэм, сокем тумошогес?

Оскем потэ, та спектакль азьланяз яркытгес пӧрмоз. Удмурт театрлэн директорез Андрей Ураськин верамъя, таӵе комедия сцена вылын нырысьсэ возьматӥськиз, соин ик со бордын ужано луоз на. Нош удмурт учкисьёс серекъянэз ярато.

Лия Малых.

Удмурт Дунне
By Удмурт Дунне 28 октября, 2011 11:12
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<