Буйгатскон уйвӧтын гинэ

Удмурт Дунне
By Удмурт Дунне 10 октября, 2011 13:34

Буйгатскон  уйвӧтын гинэ

В. Березин.

Вавож ёросысь хозяйствоос арысь аре выль вормонъёс басьто, туэ но лымшор ёросъёс пӧлын нырысетӥ интые потӥзы. Со ас кожаз уг лыкты, эштосъёс арысь аре сюлмасько удалтэм ю-нянь, картофка будэтон но трос сӥль-йӧл поттон сярысь. Вавожъёслэн со сямазы пыремын, буйгатсконэз уг тодо.

Гурт удысын ужасьёслэн нуналзы азьын гурт калыклэн мылкыдыз умой. Со сярысь маде Вавож ёрослэн йырыз Вячеслав Березин.

— Вячеслав Иванович, ёросысь хозяйствоосты, шуг-секытъёс шоры учкытэк, арысь аре азинско. Маин со герӟаськемын?

— Со потэ гурт хозяйствоослэн кивалтӥсьёссы бордысь. Соос сюлмасько музъем ужанэз но пудо вордонэз умоятон, производствое туала выль амалъёсты пыӵатон сярысь. Со понна ялан выльдо гырон-кизён техниказэс но дасяло усто ужасьёс. Туннэ ми дорысь гинэ адӟод «американец» нимаськись кужмо тракторъёсты но роботэн ужась  фермаосты. Юнме шат быдэс республикаысь гурт хозяйствоос арлы быдэ дорамы дышетскыны ветло. Вераськон мынэ Мичурин нимо СПК сярысь. Соин 40 ар пала кивалтэ ни шаерысьтымы дано адями Валентин Калинин. Туэ но зямбайёс синмаськымон вормон басьтӥзы, Кубаньын кадь, котькуд гектарысь шорлыдын 40 центнер, ю тысь кутсазы. Быдэн 32 центнерлэсь уно урожай басьтӥзы «Удмуртия», «Колос» но «Луч» эштосъёс.

Туннэ озьы ик нимысьтыз пусъеме потэ «Горд Октябрь» СПК-ез. Туэ со ноку адӟылымтэ удалтэм ю-нянь басьтӥз, котькуд гектарысь 27 центнер кутсаз но пудо йырлы быдэ  30 центнер кормовой единица сиён дасяз. Хозяйствоез валаса нуэ Леонид Кузьмин. Со трос сюлмаське специалистъёслы но егит семьяослы улон инты лэсьтон сярысь. Алигес вуттӥзы 4 квартираен юрт. Сое СПК пуктӥз ас коньдонэныз. Квартираосы пыртэмын газ, ву, лэсьтэмын канализация. Хозяйство ӝоген вуттоз ни клубзэ. Отын луоз фельдшер-акушер пункт, тренажёр зал, пудо эмъясьёслы сэрег но мукет. Со шунтӥськоз газэн. Чагыр эстӥськон пыртэмын ни столовое, администрация юртэ, КЗС-э.

— Берло дыре мукет хозяйствоосты но будон сюрес вылэ пото ни. Быдэс ёрос вылын со кызьы шӧдӥське?

— Туэ 8 толэзьскын ёросын, кылем арын та дырен ӵошатыса, 29 миллион 500 сюрс манетлэсь уно пайда басьтэмын. Отын тужгес трос тыршемзы-сюлмаськемзы 4-5 хозяйствоослэн (Мичурин нимо, «Удмуртия», «Колос», «Луч»). Нош музъем ужанъя огъя верано ке, туэ ю бусыосмес 706 гектарлы паськытатӥм, картофкамес — 104 гектарлы. Соин ӵош ик урожаймы но будӥз. Уродэсь ӧй вал пудо сюдон культураосмы — кукуруза, трос но одӥг аръем турынъёс. Пудо йырлы быдэ 30 центнер пала кормовой единица сиён дасямын, нош куд-огез хозяйствоос одӥг но ӝыны арлы тырмымон пудо сиён люказы. Малы ке шуоно кылем арын кӧс гужем вунымтэ ай. Табере вань эштосъёс, ӧжыт ке но азьпала учкыса, ужало. Со туж умой. Азьло асьмелэн песятайёсмы но тысьсэс 2-3 арлы тырмымон кабанъёсын возё вылэм. Али но бен государстволэн резерв фондэз вань.

Несмеловъёс пукто корка.

— Вячеслав Иванович, пудо вордонды кызьы азинске?

— Ортчем арын гужем пӧсь но кӧс ке но улӥз, ми ӧм кулэстэ пудо уллёез но сӥль-йӧл поттонэз. Секыт ке но вал, хозяйствоос луонозэ но, луонтэмзэ но лэсьтӥзы пудо вордонэз азинтон вылысь. Тыршемзы-сюлмаськемзы син азьын: туэ 8 толэзьскын, кылем арын та дырен ӵошатыса, сюро таза пудолэсь лыдзэ 292 йырлы йылэтӥм, нош скалъёслэсь — 107-лы. Урод ӧвӧл со. Кӧня ке кулэстэмын парсьёслэн но валъёслэн лыдзы.

Оглом пусйыса, пудо вордон огинтыяз уг сылы. Тани туэ 8 толэзьскын, 2010-тӥ арын сярысь, ёросъя 36,7 тонналы уногес йӧл поттэмын, нош вузамын 224,5 тонналы тросгес. Сӥль поттонъя озьы вераммы уг луы на. Та удысэз азинтонлы али нимысьтыз саклык висъяськом. Азьланьын пайдаез луоз шуыса, оскисько. Нырысь ик будэтоно парсьёслэсь лыдзэс. Туэ со понна луонлыкъёсмы вань. Няньмы тырмыт, нош парсез сотэк уд ворды, шонер верало.

— Вячеслав Иванович, гурт калыклэн сӥзьыл праздникез азьын мар ватсасалды на?

— Нырысь ик, вань гурт калыкез, специалистъёсты, кивалтӥсьёсты но семьяоссэс сюлмысьтым шуныт кылъёсын ӟечкыласько Гурт удысысь ужасьёслэн нуналэнызы но ваньмызлы тау карисько туэ синмаськымон тыршемзы понна, мылкыд карисько азьланьын уката бадӟымесь вормонъёс басьтыны но калыклэсь улон-вылонзэ умоятыны. Сӥзисько ваньмызлы шудо-буро но таза улон!

Геннадий Романов.

Туспуктӥз Владимир Беломорских.

Удмурт Дунне
By Удмурт Дунне 10 октября, 2011 13:34
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<