Биниське эшъяськон бугор

Удмурт Дунне
By Удмурт Дунне Октябрь 21, 2011 13:45
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Удмурт нылкышно кенеш огазеяськонэ пыриськисьёс 18-тӥ октябре пумиськылӥзы Финляндиысь калевала нылкышноослэн ассоциацизылэн вице-президентэныз Аннамари Мауконенэн но та огазеяськонлэн Торнио городысь ёзаз пыриськем Райли Илолаен, фин кылъя но литературая дышетӥсен. Та нылкышноосын ӵош шаеренымы тодматскыны вуиз Аннамарилэн кузпалыз, историяя дышетӥсь Ристо Мауконен.

«Палэзян» калыккуспо фин-угор фестивале вуэм куноослэн нуналзы ӵукнаысен ик пӧртэм пумиськонъёсын узыр вал. Соосты нырысь ик пумитаз Кузебай Герд нимо гимназия. Финляндиысь куноос тодматскизы дышетон но нылпиослэсь ваньмон дырзэс радъян амалъёсын, удмуртлыкез утёнэн. Соос озьы ик синмаськыса кылизы та юртын усьтӥськем выль нылпи садлы. Тодматскизы удмурт воспитательёслэн «Зарни бугор» клубенызы.

Удмуртиысь но Финляндиысь нылкышно огазеяськонъёсы пыриськемъёс ог-огзылэн ужъёсынызы матэгес тодматскизы котырес ӝӧк сьӧрын. Таиз пумиськон ортчиз Кузебай Герд нимо гимназилэн ик Коммунаръёслэн урамазы интыяськем нылпи садаз. Удмурт нылкышно кенешен кивалтӥсь Надежда Степанова куноослы мадиз, кыӵе инты басьтэ огазеяськон удмурт нылкышноослэсь асваланзэс будэтонын.

Фин нылкышноосты туж тунсыкъятӥз юан: быгатэ-а, пе, огазеяськонды кун законъёс кылдытъянэ пыриськыны, кыӵе ке но дэмланъёс сётыны? Финляндиын та ласянь уго ассоциацилэн луонлыкъёсыз бадӟымесь. Та юанлы валэктыса, Надежда Андреевна пусйиз, Удмурт нылкышно кенеш аслэсьтыз ӵектонъёссэ шараяны быгатэ «Удмурт кенеш» огазеяськон пыр, уката ик соин кивалтэ Россиысь Кун Думалэн депутатэз Николай Мусалимов. Озьы ик уж нуиське республикаысьтымы Нациосын ужан политикая министерство пыр. Удмуртлыкез утёнъя тросэз ӵектонъёс пыризы Кылъёсты азинтонъя элькун программае. Но сюлэмшугъяськытӥсь ужпумъёс вань ай. Кылсярысь, уг тырмо семьяосын но нылпиосын ужась удмурт психологъёс, Ижевск город администрациын ӧвӧл удмурт кылъя методист.

Удмурт нылкышно движенилэн кылдэменыз куноосты тодматӥз история наукаосъя кандидат Людмила Христолюбова. Покчиослы «Шудон корка» проект сярысь мадиз та клубен алиез кивалтӥсь Наталья Дмитриева. Калевала нылкышноослэн ассоциацизылэн вице-президентэз но вакчияк вераз асьсэлэн огазеяськонзы сярысь. Удмурт но фин нылкышноослэн вашкала сям-йылолъёсты но культураез, кылэз утёнъя ужпумъёссы одӥг выллемесь, шуиз со. Ассоциацизы котыраз огазея 4 сюрс пала адямиез, быдэс кунын 60 ёзъёсыз кылдытэмын. Собере финъёсты шулдыртӥзы нылпи садысь покчиос.

ӝытазеяз куноосты возьмаз на «Табань» клуб, татын соос люкаськемъёсты асэнызы тодматӥзы. Та пумиськонын ик ортчиз «Чибориё кышет» ужрад. Таосыз сярысь лыдӟыны быгатоды вуоно номерысь.

Лия Малых.

Удмурт Дунне
By Удмурт Дунне Октябрь 21, 2011 13:45
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<