«Шундыберган» берга, визь погъёсты люка

Удмурт Дунне
By Удмурт Дунне 5 октября, 2011 08:43

«Шундыберган» берга,  визь погъёсты люка

Вожъяськон мылкыдын учкисько туала пиналъёс шоры. Кыӵе гинэ ужрадъёс али уг ортчо анай кылын — мылкыдыд гинэ мед луоз астэ возьматыны, кужымед гинэ мед тырмоз ваньмаз пыриськыны! Ми школаын дышетскон вакытэ удмурт шӧмо ужрадъёс школаямы ӧз ортчылэ. Нош кыӵе потэ вал куаш-куаш удмурт сямен кырӟам-верам, мактаськем. Соин ик  ёросамы удмурт нылпиос понна тунсыко, мур  пуштросъем «Шундыберган» проект ӝужам бере ваньмызлы кылымон вераны быгатӥ: «Ми быгатӥм! Ми вормим!» Зэм, пӧрмытӥм удмурт пиналъёс понна удмурт праздник радъяны, быгатӥм ӟучомыны кутскем экеосты но нылокъёсты ас кылынызы тунсыкъяськытыны, йырзэс удмуртлык пала берыктыны. Нош кызьы ваньмыз кутскиз меда?

 

Ар борсьы ар…

2006-тӥ ар. Огаз тулыспал нуналэ Дэриысь шор ёзо школа кузьыли карлы пӧрмиз кадь: дышетӥсьёс сопала-тапала бызьыло. Ӝоген доразы куноос вуозы, соин ик чаклано: ваньмыз-а дась? Куноос — ёросысь 13 школаысь  дышетскисьёс — сиыны-юыны, гань-гань шутэтскыны ӧз люкаське. Соос  йырвизез сынась «Шундыберган» шудонын нюръяськыны вуизы. Ӵошатскон сӥземын вал Удмурт шаермылэн 85 ар тырмонэзлы.

Нылпиос, командаослы люкиськыса, 8 визьсынан пыр ортчизы. Литературалы сӥзем люкетаз лыдӟем произведениосъя тестлы валэктонъёс шедьтыны кулэ луиз, история юанъёсъя — кроссвордэз сэрттоно-пертчоно, этнографилы сӥземаз  — удмуртъёслэсь вашкала тӥрлыксэс тодоно. Шаертодонъя но инкуазья юанъёслы валэктон но утчазы пиналъёс — шаерысьтымы будосъёслы шонер ним шедьтӥзы. «Визь погъёс» станциын дышетскисьёс гуртын дасям проектъёссэс утизы. Со выллемгес ик дасямын вал «Кибашлыос» люкет но. Татын пинал усточиос сьӧразы ваем киужъёсынызы адӟытонзэс радъязы.

Тужгес но капчиен сётӥськизы творчестволы но спортлы сӥзем этапъёс. Нырысетӥяз командаос быдэстӥзы доразы дышетэм кырӟанъёсты, лыдӟизы асьсэлэсь гожтэм кылбуръёссэс. Нош мукетаз станциын вашкала удмурт шудонъёсын тодматскизы.

2007-тӥ ар. Диктор лыдӟе районмес кылдытон сярысь постановлениез. «Всероссийской Центральной Исполнительной комитетлэн президиумез пуктэ: Удмурт АССР-ын кылдытоно выль ёросъёс: Дэри ёросэз, шоргуртэз — Дэри черкогурт…» — таӵе мылкыдэз ӝутӥсь кутсконэз вал кыкетӥ «Шундыберган» шудонлэн. Ужрадэз сӥзизы Завьялово районлы 70 ар тырмонлы.

2008-тӥ арын шудон нош ик мур герӟаськиз историен. Нылъёс но пиос возьматӥзы, макем ӟеч соос тодо вордскем шаермес. Нылпиослэсь визьзэс сыназы пӧртэм юанъёсъя: Октябрь революцилэсь азьло кыӵе тодмо писательёс  ортчизы Удмуртия пыр, кыӵе арын Ижын Эшъяськон монумент усьтэмын, кыӵе вашкала гожъямъёсын удмуртъёс «ар» шуыса гожтэмын…

2009-тӥ ар. Азьвыл аръёсы радъям ужрадъёс кыӵе ке но бадӟым лыдпусъёс котырын  бергазы ке, ньылетӥзэ сяськаям «Шундыберган» эрико темая ортчиз. Озьы ке но шудон тунсыко пӧрмиз.

Нош 2010-тӥ арын Завьяловоысь школа ӧсъёссэ вӧлъяз мукет ёросъёсысь визь люкъёс понна но. Тодон-валанзэс эскерыны 9 командаос люкаськизы: киясаос, вавожъёс, уваос, яръёс, шарканъёс, балезиноос, можгаос. Шудонэ пыриськыны мылкыд каризы Италмас элькун школа-интернатын дышетскисьёс. Нош районмылэсь данзэ утизы Шор Постолысь усточиос.

2011-тӥ ар. Таиз ужрад чылкак выль сямен ортчиз — КВН амалъя. Соин ик ужрадлэн валтӥсь героез луиз удмурт калыклэн яратоно Лӧпшо Педунез. Маскаръяськыны быгатэмзэ возьматыны мылкыд кариз ёросысь 13 команда.

Шудонлы луыса тодӥм: районамы уло визьмо, шӧртчи, маскаръяськыны быгатӥсь, кыллы кисыязы пырисьтэм нылпиос. Удмурт кылын КВН туж тунсыко но паймымон вылэм.

 Дышетэ но эшъяськытэ

«Шундыберган» проект пиналъёслы но, мӧйыослы но сюлэмзыя луиз.

— Мылкыды лӧптэ, ужрад быдэсак удмурт кылын мынэ шуыса. Нылпиос возьдаськытэк ас кылынызы верасько, таӵеез вунӥз ни вал. Шумпотӥсько: пиналъёсмы йӧноесь, етӥзэсь, капчи мылкыдоесь, — вера шаерчи, школаын кема аръёс ӵоже ужам Раиса Исупова.

Малпанзэ кисьтэ Изгурт школалэн кивалтӥсез Галина Мамонтова:

— Шудон аслаз пуштросэныз тунсыко. Проектъёс дасянын нылпиос татчыозь ӧз ӵошатскылэ на вал, ушъямон, тросэзлы та этап капчиен сётӥське, компьютерен гуртысь потэм егитъёс «тон» шуыса верасько.  «Шундыберганын» нылъёс но пиос  асьсэды калык пӧлын возьыны, ас кожазы луыны дышетско, эшъяськонзы юнма.

— «Шундыберган-2009» ужрадын мон «Гур шуккон» нимо проектме ути. Сое гожтыны мыным юрттӥз Юлия Владимировна песянае. Вормисьёс пӧлы ӧй пыры ке но, нырме ӧй ошы — вормон понна ӧй лыкты ук, выль эшъёсын тодматскыны вуи, — шуэ Изгурт школаысь Тима Макаров.

Шудонлы синмаськемын куноос но. 2010-тӥ арын Дэри школае вуылэмъёс шуныт кылъёсын тодазы ваё проектэз. Шарканысь Алина Варламова гожтӥз: «Шундыберган» яраз, тужгес но «Музейысь арбери» но литературалы сӥзем люкетъёсыз. Мукет дыръя но ӧте милемыз, одно лыктом!

Тунсыко но мур пуштросъем ужрадлэн «анайёсыз» луо Дэри шор ёзо школаысь директорлэн воштӥсез Ангелина Байсарова но удмурт но ӟуч кылъя дышетӥсь Ольга Иванова.

— Милемлы малпан сётӥз Дэри ёрос администрациысь дышетонъя отделысь  специалист Наталья Акилова, — вера Ангелина Алексеевна. — Та выллем ужрадъёс туж кулэ. Шудон пыр нылпиос кутско тунсыкъяськыны кылынызы, историен, гажаны ӧдъяло выжыоссэс, вордӥськем шаерзэс.

Нырысь-валысь «Шундыберганэз» ортчытыны чакламын вал кӧня ке арлы огпол. Но нылпиослы ужрад сюлэмазы лякиськиз, табере соос асьсэос куро шудонэз котькуд ар радъяны. Та шат бадӟым вормон ӧвӧл?

Та проектэз улонэ пыӵатыны бадӟым юрттэт сёто «Удмурт кенешлэн» ёросысь ёзэз (кивалтӥсез Лидия Биянова), дышетонъя управление но «Мӧзмон» клуб.

* * *

«Шундыберган» выжыоссэ муре лэзиз ини. Котькуд тулыспалэ, ӟырт кезьытъёслэсь но пелляськемлэсь кышкатэк, со вылӥе ӝутэ ӵуж йырзэ. Малпасько, котыраз визь погъёсты люкась проект-сяська дыр ортчемъя уз куасьмы, арысь аре пушъёз.

Анна Трубачева,

Дэри ёросысь

«Удмурт кенешлэн» ёзчиез.

Удмурт Дунне
By Удмурт Дунне 5 октября, 2011 08:43