«Оп!» шуытозь, «ӵош» шуоно

Удмурт Дунне
By Удмурт Дунне 14 октября, 2011 09:55

«Оп!» шуытозь, «ӵош» шуоно

Сентябрь шорын «Огъя Россия» партилэн Удмурт ёзэзлэн конференциез дыръя Президент Александр Волков ялӥз «Азьлань, Удмуртия!» проект сярысь. Уго шаерамы ортчем воштӥськонъёс — промышленностьлэн юнмамез, гурт удысын вормонъёс, дышетонын но тазалыкез утёнын выльдӥськонъёс такем яркыт ӧй луысалзы, партия ласянь та удысъёслы саклык ке ӧй висъяськысал.

Тани Ижысь Ленин ёросын пумиськон возьматӥз: калык уката сюлмаське нылпиос пумысен. Али Ижын уг окмо нылпи садъёс. Но мукет улосъёсын кадь югдур кӧшкемыт ӧвӧл — асьмелэн 3-7 аресъем покчиосмылы ваньмызлы сямен инты шеде садэ. Матысь кык ар ӵоже таӵе сюлмаськонзы мумы-бубыослэн сылмоз. Собере югдур воштӥськоз яслиосын но — 1,5-3 аресъем нылпиослы но садъёсын инты шедёз.

Калык аслэсьтыз ӵектонъёссэ вераны быгатоз волонтёръёслы — соос шаерамы улӥсьёс доры нимысьтыз буклетъёсын потӥзы ни. Отчы адямиос асьсэлэсь ӵектонъёссэс гожтыны быгатозы — соос республикаысь яке районысь воштӥськонъёслы сӥземын медло.

Зэм, ваньмыз оп! шуыса уз быдэсмы. Озьы ке но калыклэсь ӵектонъёссэ радъяно, учконо, мае матысь дыре ик быдэстоно. Одно ик чаклано республикалэсь кужымзэ. Вормоно удысъёсты, оло, матысь толэзь ӵоже берыктыны луоз, мукетъёсыз, оло, кӧня ке ар витёзы на.

— Туннэ ик милемлы тодмо уно сюрс ӵектонъёс сярысь. Республикаысьтымы мыло-кыдо адямиос соосты шара верало, — шуэ Президент Александр Волков. — Озьы ке но кивалтӥсьёс кылыны кулэ котькуд муртэ. Кылзэм сяна, адямилэсь верам ужпумзэ тупатыны юрттоно ӝог но рос-прос. Тросгес адямиос пыриськизы ке «Азьлань, Удмуртия!» программаез кылдытонэ, соку сое быдэстон но капчигес сётӥськоз.

Николай Мусалимов — Кун Думаысь депутат, «Удмурт кенеш» огазеяськонлэн кивалтӥсез:

— Александр Волковлэсь «Азьлань, Удмуртия!» проект сярысь малпанзэ туж умоен лыдъясько. Тани, шуом, Россиын Калык программае туж трос ӵектонъёс вуизы. Но отчы тросгес пыризы бадӟым проектъёс.  Нош асьмелэн, Удмуртиын улӥсьёслэн, сюлэммы висе ук ас шаермы понна. «Азьлань, Удмуртия!» проектъя программае котькыӵе адями, огазеяськон аслэсьтыз дэмланзэ сётыны быгатоз. Коть тротуар лэсьтон, коть гуртысь гуртэ сюрес вӧлдон, коть эшшо маке.

Программа быдэсъяськоз «тубат бӧрсьы тубат» амалъя. Калыклы тужгес кулэ луись ужрадъёс пыртэмын луозы программалэн нырысетӥ люкетаз, соосты улонэ пыӵатон бордын нырысь ик ужалозы. Пуктэм ужпумъёсты быдэстон бордын тыршоно луозы интыосысь кивалтон ёзъёс но, предприятиослэн директоръёссы но, ёрос кивалтӥсьёс, министерствоос, ведомствоос, Кун Кенеш…

Нялтас вераса, шаерамы кӧня ке аръёс ӵоже ужа ни Удмуртиез азинтон программа. Соя трос ужпумъёс быдэстэмын, школаос, больницаос пуктэмын, мукет кемалась чаклам ужъёс лэсьтэмын. Соин ик оскон вань: «Азьлань, Удмуртия!» проектъя программа но радъяськоз, быдэсъяськоз. Со малпамын калыклэсь мылкыдъёссэ тодон понна.  Адямиос асьсэ дэмланъёссэс мыло-кыдогес мед вералозы.

Татьяна Иноземцева, Вавож ёрос администрацилэн йырыз: 

— Президент юрттэмен, ёросмылэн тусыз воштӥськиз. Нуналысь нуналэ чеберске, гуртоослэн улонзы капчия. Берло аръёс куспын 5 школа пуктэмын, туннэ нуналлы ӧвӧл ни пу школаосмы. Со сяна, культурая 3 юрт усьтӥськиз но РОВД-лэн административной юртэз ӧсъёссэ вӧлъяз. Азьланьтӥське чагыр эстӥськонэз кыскон. Ёрос центрын тыремын 29 иськем гумыос, Нюрдор-Котья но Какмож гурт пала — 38 иськем.

Тужгес но бадӟым данъяськонмы — стадион. Со вань куронъёслы тупа, отын кык бадӟым ӵошатскон ортчытӥмы ини. Школалы матэ интыяськеменыз, пиналъёс но, мӧйыос но мугорзэс кыдатыны быгато, отын пӧртэм секциос ужало. Оскиськомы, вуоно арысен Вавоже бассейн но конькиен нискылан инты, 190 интыем нылпи сад лэсьтон борды басьтӥськомы шуыса.  

Александр Косарев, Шаркан ёросысь Мувыр гурт поселенилэн йырыз:

— Туэ поселениямы ужгур ӧз чалмылы. Шумпотоно, сюресъёс выльдӥсько шуыса. Тани Мувыр но Вукогурт вискын 3,8 иськем сюрес ӝутӥзы. Со пӧлысь 1,8 иськемзэ лэсьтӥзы выль ресайклинг амалъя. Та сюрес кузя пиналъёсты школае нуоз-ваёз автобус. Соин ваньмыз луыны кулэ куронъёсъя. Кылсярысь, та сюрес вылэ 60 пала знакъёс пуктылӥзы.

Вуоно арын но тэк ум улэ. Сюрес лэсьтон азьланьтӥськоз Вукогурт но Урдогурт вискын. Татын ӝутыны чакламын 3,5 иськемзэ.

Но гурт поселениямы вань на мукетыз шугъяськон. Али нылпиос трос вордско — соин школа-садамы инты уг тырмы. Туннэлы, садике куриськыса, 13 заявление гожтэмын ни. Озьыен таиз йырвисён городъёслы гинэ ӧвӧл, гуртъёслы но туж тодмо луэ.

 Константин Широбоков, Наука но техника удысысь пичи предприятиосты азинтонъя фондлэн Удмуртиысь представительствоеныз кивалтӥсь:

— Республикаын азинлыко ужало егит учёнойёс но. Тани туннэ Удмуртиын нырысьсэ нюръяськозы 18-28 аресъем визьмо егитъёс. Соос пыриськозы Наука но техника удысысь пичи предприятиосты азинтонъя фондлэн «УМНИК» программаяз. Шаерысьтымы егит учёнойёс быгато асьсэлэсь проектъёссэс улонэ пыӵатон понна бадӟым грант утыны. Удмуртиын конкурсэ пыриськиз 106 мурт. Соослэн проектъёссы ӵектэмын вал биотехнология, иворъёсты вӧлмытонэн герӟаськем технологиос, тазалыкез утён, химия, прибор но машина лэсьтон удысъёсъя. Финалэ потӥз 36-ез. 10-лэсь уноез грант басьтозы — котькудзы быдэн 400 сюрс манет.

Озьыен, шаерысьтымы егитъёс валало, выльдӥськон кулэ шуыса, модернизация сюресъя мыныны пинал тодосчиос дасесь. Тани финалэ потэм учёнойёслэн тросэз ужъёссы сӥземын вуэз чылкытатонлы — та ужпум быдэс республикалы тодмо, малпасько.

Удмурт Дунне
By Удмурт Дунне 14 октября, 2011 09:55