«Мунчоын таӵе уг пӧсяськы»

Удмурт Дунне
By Удмурт Дунне 25 октября, 2011 09:36

«Мунчоын таӵе  уг пӧсяськы»

Е. Сундукова, В. Сидоров, А. Плотникова.

Эстрада кырӟанъя «Шулдыр ӝыт» театр выль сезонзэ усьтӥз «Кык кизилиос» проектэн. Та ӵошатскон кыкетӥ арзэ радъяське ини, кылем арняе ортчем концерт-шоу сӥземын вал удмурт ретро кырӟанъёслы.

 

Вераны кулэ, одӥг нуналэ кык удмурт ужрад тупаз. Филармониын — «Кык кизилиос» ӵошатскон, Удмурт театрын — «Палэзян» фестиваль. Соин сэрен конкурсэз радъясьёс кисыразы, луоз: люкаськоз-а калык? Кышкамзы юнме вал. Адямиос зал тыр вуизы. Уго кин учкиз кылем арын ортчем «Кык кизилиосты», таяз но лыктэмзы потӥз. Таяз шоуын артистъёс но соослэн паръёссы быдэстӥзы 80-тӥ-90-тӥ аръёсы жингырам кырӟанъёсты. Ӵошатскисьёс, устолыксэс возьматэм сяна, ӝытэз нуисьёслэн Алексей Ложкинлэн но Евгения Сундуковалэн мудрон но серемес юанъёссылы валэктон сётъязы.

Нырысетӥ дуэт — Светлана Ручкина но Геннадий Бекманов — быдэстӥз коми кырӟанэз. Куараоссы туж чебер чузъяськизы, но нырысетӥослы котьку секытгес: калык сайкамын-ӟырдамын ӧвӧл ай. Кыкетӥез дуэт вал кык Натӥослэн — Ушаковалэн но Матвеевалэн. Та нылъёс кыксы ик «Шулдыр ӝытын» кырӟамын. Залэз кенжытӥз куинетӥ пар — нылъёслэн йыр поромонзы Владимир Мальцев но удмурт мадонна Любовь Быкова. Алексей Ложкин, ӝытэз нуэм гинэ ӧвӧл, Эльвира Панченкоен ӵош кырӟаса но вуттӥз. Сцена вылэ витетӥ потӥзы Галина Платонова но Альбина Сысоева (Дуркина). Соос быдэстӥзы «Шуныт омыр» кырӟанэз. Зэм но, залын ик шуныт луиз кадь. Тросэз тодазы вайизы, луоз, егит «шулдыр ӝытъёслэсь» концертъёссэс.

Куатетӥ дуэтэз А. Ложкин учкисьёс азе тазьы ӧтӥз: кырӟамысь дугдэм удмурт министр но кырӟаны кутскем выль артистка — Владимир Соловьёв но Регина Музиянова.

Баянзэ кутыкуз ик, Владимир Соловьёв шуиз:

— Сцена вылэ потыса, ӧй вутты на, тыбыры котмиз ини, шонерзэ вераса, мон мунчоын но таӵе уг пӧсяськы. Сцена вылэ кырӟаны потаме вунӥз ини, табере тросгес вераськисько чиновник сямен. Соин ик мыным туннэ шуггес потэ баянэз кысканы… Учкисьёс кема чабизы министрлы но пинал артисткалы.

Тани сцена вылэ пото ни кылем арын вормисьёс — Анна Плотникова но Валерий Сидоров. Та рад но Сидоров журналист сямзэ ӧз кушты. Интервью басьтэм амал ужазы. «Мылысь-кыдысь» передачалэсь оглюкетсэ учким кадь потӥз. Плотникова баянзэ кыскаку, Сидоров реклама но ялон но лэсьтыса вуттӥз, калыкез ӧтиз «зарни арганчилэн« 7-тӥ январе ортчоно концертаз. Мар шуод, амало дуэт пӧрмиз.

Сцена вылэ тямысэтӥ потӥзы Павел Васильев но Оксана Бисар. Таосыз но мудронъяськизы. «Эх, арганэ» кырӟанзэс соос «Ингур» радио тулкымъёс вылын быдэстӥзы. Оксана эфирез но нуыса вуттӥз, эктыса но лэзиз. Тросэз учкисьёс та концертын гинэ тодӥзы, дыр, Бисарлэсь зэмос фамилизэ. Кин уг тод на ай, Бисар — кушем ним, нош вордӥськемын Оксана Черыгова фамилиен.

Укмысэтӥ дуэт — Марина Галичанина но Ирина Габитова — быдэстӥз «Эн дӥсьты» кырӟанэз. Но нылъёс туж дӥсьтӥсесь но золэсь вал.

Руслан Серебренников но Светлана Ермакова быдэстӥзы «Выль улонэ» кырӟанэз. Азвесь куараё усточиос залэз эшшо но зол вырӟытӥзы. Соослэн кырӟамзылэсь мугор ик юзыр-кезьыр луыса кошкиз, крезьгур но, куаразы но пыртӥд ик потӥзы кадь.

Геннадий Ганьковлы юрттӥз Дэри ёросысь баянист Александр Медведев.

Антракт дыръя учкисьёс кельшымон дуэт понна куаразэс сётӥзы. Куараосты чотаны юрттӥськизы «Шундыысь» егитъёс. Одӥг муртлы кык пол огкадь уг удалты шуэмзы шонер вылымтэ. Туэ но учкисьёс тросгес куаразэс сётӥллям Удмуртиысь калык артисткалы Анна Плотниковалы но «Удмуртия» ГТРК-ысь журналистлы Валерий Сидоровлы. Куд-огез учкисьёс  нырысь ӧз оске, куд-огез жалязы мукет усточиосты, уго кужмо но тунсыко дуэтъёс вал гинэ. Но кинлы ке котьку но золгес удалтэ.

Галина Семёнова.

Туспуктӥз Владимир Беломорских.

Удмурт Дунне
By Удмурт Дунне 25 октября, 2011 09:36
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<