«Италмас» усьтӥське шудбурлы

Удмурт Дунне
By Удмурт Дунне 4 октября, 2011 07:38

«Италмас» усьтӥське шудбурлы

Авдеев кузпалъёсты корка пыронэн ӟечкылаз Президент Александр Волков.

Шоркарысь «Италмас» комплексын быдэсмиз кыкетӥез юрт. Со пуктӥськиз Удмуртиысь  «Егит семьяослы — улон инты» программая.

Татьяна Барамзина ульчаысь «Италмас» комплекс адӟиське кыдёкысен. 17 этажъем юрт пиштэ яркыт ӵужо-вожо буёлъёсыныз. Татын 168 квартира. Со пӧлысь 135-яз улыны пырозы егитъёс.

Республикаысьтымы «Егит семьяослы — улон инты» программая 1 830 семья корка пыронзэ пусйиз ни. Оглом таӵе шудоослэн лыдзы 5 400 пала люкаськоз. Ижын сяна, квартира басьтыны быгатӥзы Воткаысь, Глазысь, Можгаысь егитъёс, выль юрт ӝутӥське Балезиноын но.

 

Тунаськыса улоно ӧвӧл

«Италмас» комплексэ ӝоген улыны выжоз Авдеевъёслэн семьязы. Игорь ужа республикаысь нылпи больницаын врач-невролог луыса. Ирина кышноез нылпи садын крезьгурлы дышетэ. Кузпалъёслэн кык пиналзы — Максим но Марина. Пизы школаын дышетске ни, нылзы садике ветлэ. Авдеевъёс кемалась ӧвӧл пусйизы 13 ар ӵош улэмзэс.

— Нырысь кунокуаын улӥмы, но мурт патер понна уксё куштыны жаль. Анай-атайёсынымы ӵош но улыса эскерим. Бӧрысь, сузэреным валче кариськыса, мумы-бубыосмы юрттыса, банкысь бадӟым процентэн кредит курыса, одӥг комнатаен квартира  басьтыны быгатӥм ик, — вера Ирина. — Но ньыль муртлы отын ӟоскыт, уката ик йырын возёно мукетсэ: куке но та квартираез сузэреным шори люконо луоз.

Кузпалъёс кулэ документъёс люказы, ёрос администрациязы черодэ султӥзы. Со вакытэ ик квартира бырйыны кутскизы.

— Кельшиз «Италмас» комплексысь квартира. Кык комнатаен патер дунъяськиз 1 миллион 450 сюрс манет, — вера Игорь. — Та дунлэсь 10 процентсэ нырысетӥ взнос чотын тыримы. Табере нылпиосмылэн нимаз комнатазы луоз.

Авдеевъёс капчиятэм кредитсэс 20 арлы басьтӥзы. Толэзьлы быдэ тыриськонзы люкаське 10 сюрс манет котыр. Таӵе программа ӧй ке луысал, Иринаен Игорь выль юртын выль квартира сярысь малпаськыны но ӧй дӥсьтысалзы. Уго егитъёслы патерлэсь одӥг квадрат метрзэ дунъязы 30 сюрс манет котыр. Со вакытэ ик огъя рынокын дунъёс 6-7 сюрс манетлы вылӥынгес.

 

Кык толэзь чидано

— Ар пумозь эшшо 5 корка пырон пусъёмы на, — шуэ республикаысьтымы лэсьтӥськонъя, архитектурая но улон инты политикая министрлэн воштӥсез Рустам Хабибуллин. — Лэсьтӥськон али чырмыт мынэ. Егит семьяос 2012-тӥ арын вуттыны чаклам патеръёсты басьязы ни, черодын — 2013-тӥ ар. Программаез чакламы вал бюджет удысын ужасьёс понна. Али ваньмыз сямен кузпалъёс капчиятэм кредит басьтыны быгато — палэнэ кылемын на мувӧй кыскисьёс но банкъёсын ужасьёс гинэ.

Оглом 3 сюрс 823 семья программае пыриськиз ни. Редакциямы кыкез ужасьёс но пусйизы корка туйзэс. Ӝоген мынам ульчаям но шумпотон вуоз. Программае пыриськыны удалтӥз мынам семьяелы но.

Ижысь Индустриальной ёрослэн администрацияз улон интыез умоятонлы чаклам черодэ султӥмы вал 2004-тӥ арын. Югдур умой пала берытскиз туэ. Соин аслэсьтым ветлэм-ортчем сюресъёсме лыдӟисьёсмылы но индылон вылысь гожтэме потӥз. Азьпалтыса вераме потэ: кредит курыса банке вазиськем дырысен но квартира басьтэм сярысь огкыл пусйиськытозь, ортчиз 56 нунал.

Та дыр ӵоже потылӥз йыркур но, вордскиз вожпотон но. Озьы ке но — квартира понна сюлмаськиськоды ке, чидалэ. Эн вунэтэ, пӧртэм справкаос бичан, пошлинаос тырон оглом 3 сюрс манет пала люкаськоз.

Миллион манетлэсь уно пунэме пырыса, бадӟым уксёез пал синмыным но ӧй адӟы. Со понна табере огазе сураськозы йыр висён но шумпотон. Огласянь, ӝоген луоз аслам липетэ. Мукет ласянь, матысь аръёс ӵоже рос-прос ужано, кредит тыроно.

 * * *

5 процентъем кредит басьтӥсь семьяослэн лыдзы вуттэмын луоз 5 сюрс 400-озь. Озьыен, 2012-тӥ-2013-тӥ арлы чаклам квартираос вань на. Кивалтӥсьёс пусъё: программае пыриськись семьяослы куинетӥ пинал вордэмзы понна висъяськоз 200 сюрс манет кредитсэс тыронлы.

Со сяна, Александр Волков ивортӥз та программаез азьланьтон сярысь. Соя капчиятэм кредитъёс сётъялозы 3 но солэсь тросгес нылпи будэтӥсь егит кузпалъёслы. Квартира понна нырысетӥ тыриськон озьы ик 10 процент луоз.

 

Кинъёс быгато та программае пыриськыны?

♦  Нырысь ик, бюджет удысын ужасьёс, производствоя предприятиосын но мукет огазеяськонъёсын тыршисьёс. Юрттэт уз вуы нимаз ужбергатӥсьёс дорын ужасьёслы.

♦  Администрацие черодэ султон понна чаклано: семьяысь одӥг муртлы 14 квадрат метрлэсь трос улон инты медаз луы.

♦  Кузпалъёслы 36 ареслэсь трос медаз луы. Озьы ик егит семьяен лыдъясько оген пинал будэтӥсьёс но. Таизлы анай-атайлы но 36 ареслэсь трос медаз луы.

♦  Берло ужан интыын стаж 6 толэзьлэсь ичи медаз луы.

 

Пумитало… бумагаен

Программае пыриськон понна администрациын курозы пӧртэм справкаос.

♦  Ужан интыысь справка — татын пусъёно, кин луыса ужаськоды, кӧня дыр ӵоже.

♦  Ваньбур сярысь — Регистрацияя, кадастръя но картографияя кун службаысь. Справка куроно луоз семьяысь котькуд адями понна: коть бадӟым мурт, коть вож нуны. Котькуд справка понна дасяно 500 манет. Документэз лэсьтозы ог 2 нунал куспын.

♦  Техинвентаризацияя элькун бюроысь (БТИ-ысь) справка — ваньбурлэн вань яке ӧвӧл луэмез сярысь.  Татын документ лэсьтозы быдэ вуэмъёслы гинэ. Озьы ке но быземзы бере фамилизэс воштэм нылмуртъёслы, справка курыкузы, верано луоз, азьвыл но али фамилизы вылэ лэсьтоно шуыса. Одӥг справка татын 190 манет сылэ. Сое дасялозы 5 нунал ӵоже.  БТИ-ын ужасьёсты дыртытӥды ке, документ вуоз 3 нунал куспын — со понна 240 манет курозы.

♦  Кинлэн уг поты коньдонзэ быдтэмез яке кин уг дырты, соос быгато Регистрацияя службаысь но БТИ-ысь справкаосты дунтэк шедьтыны. Со понна та документъёсты курыны кулэ ёрос администрация пыр. Таиз уж кемагес лэсьтӥськоз, со понна кисыдэс уз начармыты.

♦  Улон интыя куроно поквартирной карточка яке домовой книгаысь выписка. Тазэ справкаез уг ӝегато — курыку ик сёто, квартира понна тыронъёсты люкаськемын ӧвӧл ке. Справка сылэ 15-20 манет котыр.

♦  Кузпалъёслэн паспортсылэн копиоссы. Ксерокс пыр поттоно луоз документысь вань бамъёссэ.

 

Вамыштӥськомы банке

Вазиськыны луоз Сбербанке но Ижкомбанке.

♦  Ӝыны ар ӵоже уждунлы справка 2 НДФЛ формаен. Банклэн сётэм анкетаяз гожъяно луоз на уж сётӥсьлэсь (предприятилэсь) адрессэ, телефонзэ, кивалтӥсьсэ, банкысь реквизитъёссэ. Удалтоз соослы, кин уждунзэ басьтэ Сбербанкысь карточка пыр. Соку та иворез дасяно ӧвӧл ни.

Банк чакла уждунэз. Ужась муртъёс понна улыны тупатэм минимум 6 сюрс манет котыр, быдэ вуымтэослы — 5 сюрс 500 манет. Кылсярысь, 3 муртэн семьялэн огъя доходэз 30 сюрс манет. Татысь куштоно улыны чаклам минимумъёсты (быдэн 6 сюрс манет анай-атайлы но 5 сюрс 500 манет нылпилы). Кыле 12 сюрс 500 манет. Та уксё кредит тырыны окмиз ке, банк соглаш кариськоз.

♦  Кулэ луоз ужъя книжкаысь выписка, таиз но печатьёсын-кинюртэмъёсын юнматэмын медло.

♦  Одно ик кулэ поручитель. Со чотын ӧтьыны луоз анай-атайёсты — поручителе басьтозы 75 аресозь. Кылсярысь, анайдылы 50 арес ке, кредит 25 арлы но курыны луоз на.

♦  Кредитъя куроно уксёлэсь бадӟалазэ тросгес но пусйыны луэ. Кылсярысь, 3 муртлэсь семьялы сётыны чакламын 54 квадрат (быдэн 18 квадрат метр). Туэ 1 квадрат метр дунъяське 30,5 сюрс манет. Озьыен банк капчиятэм процентэн сётыны кулэ 1 миллион 647 сюрс манет.

♦  Патерлэсь 10 процентъем взноссэ банк уг юа.

♦  Банкын куриськондэс эскерозы 5 ужан нунал ӵоже. Но тупало ӝеганъёс — куддыръя та уж 10 нунал но кыстӥське.

♦  Куриськондэс ӟечен лыдъямез бере банк сётоз гожтэт. Солэсь копизэ нуоно ёрос администрацие, мукетсэ нуоно юрт пуктӥсь доры. Соку бырйыны луоз квартира но.

 

Ку быръёно квартира?

Корка пуктӥсь огазеяськонъёслэн куронъёссы пӧртэмесь.

♦ Егит семьяос шаплы басьто кык висъетэн патеръёсты. Соин вожмаськон татын шӧдӥське. Но курыны луэ куинь висъетэн квартира но. Но татын  нырысетӥ тыриськонлэн дуныз чутрак бадӟым луоз. Шуом, патер сылоз 2 миллион манет, тӥляд кредитты 1 миллион 647 сюрс. Озьыен, 353 сюрс манет сётоно луоз нырысетӥ взнос чотын.

Тани «Титанстрой» компания лэзе квартиралы бронь курыны кык арнялы азьло. Соин банклэн гожтэтэз вуытозь, котькуд кык арня ортчыса, юрт пуктӥсьёслы жингыръяно луоз.

Лэсьтӥськонъя 8 номеро управление бронь лэсьтонэн уг выры — таос доры соку ик банкысь гожтэтэн лыктоно. Квартира ӵектӥсьёс дасялозы огкыл (договор о долевом строительстве). Татын пыр-поч гожтэмын, кытын интыяськоз юрт, кыӵе луоз квартира — солэн огъя планэз, кызьы лэсьтозы пушсэ.

♦ Та огкылэз юнматоно луоз  Регистрацияя, кадастръя но картографияя кун службаын. Квартираез кык мурт вылэ гожтӥды ке, соослы ик кун пошлина тыроно луоз. Пошлина —  67 манет. Арня куспын огкыл дась луоз. Соку юрт пуктӥсь куроз тӥлесьтыд нырысетӥ взнос.

♦ Огкылэн но тырем уксёлэн чекъёсыныз выльысь мыноно банке. Татын нош ик ыстозы ёрос администрацие. Отысь ваёно гожтэт — администрация  сётоз распоряжение, кредитлэсь оглюкетсэ Удмурт Правительство тырыны дась луэ шуыса. Эн пайме, администрациын нош ик вань документъёсты но справкаосты выльысь бичаны косӥзы ке, уката ик черодэ султэмды дырысен 6 толэзь ортчемын ни ке.

♦ Администрацилэсь гожтэтсэ ваем бере банк кутске огкыл дасяны. Бӧрысь тазэ но пусъёно луоз Регистрацияя, кадастръя но картографияя кун службаын. Таяз учыре кун пошлина котькуд мурт понна 333 манет луоз. Огкыл дась луоз, кык арня ортчыса гинэ.

♦ Регистрацияя службаын документъёстэс нокыӵе юанъёстэк кутӥзы ке, банк со нуналэ ик коньдон сётоз. Но бадӟым уксёез кияды но кутыса уд вуэ — сое тӥляд сберкнижкаяды понозы, отысен келялозы юрт пуктӥсьлэн счётаз.

♦ Кылиз на юрт пуктӥсь огазеяськонлэсь справка курыны, квартира понна быдэс дуныз ворсамын шуыса.

 Алёна Ионина.

Туспуктӥз Николай Глухов.

Удмурт Дунне
By Удмурт Дунне 4 октября, 2011 07:38
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<