«Вӧям» кышет

Удмурт Дунне
By Удмурт Дунне 25 октября, 2011 09:31
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

«Вӧям» кышет

Фин куноос Шаркан ёросысь «Жильыртӥсь ошмес» ансамбле ветлӥсь апокъёслэсь табаньзэс шӧмъяло.

«Палэзян» фестивале калевала нылкышноослэн ассоциациысьтызы вуэм куноосын тодматскон ортчиз Удмурт нылкышно кенешлэн «Табань» клубаз. Дышем сямъя Надежда Степанова финъёслы пужыятэм удмурт айшет керттӥз.

Зал тыр люкаськем калыклы асьсэ сярысь мадизы ассоциацилэн вице-президентэз Аннамари Мауконен  но солэн картэз, историяя дышетӥсь Ристо Мауконен. Озьы ик фин нылкышноослэн та огазеяськонзылэн  уйпал ёзаз пырись Райли Илола, фин кылъя но литературая дышетӥсь.

Калевала нылкышноослэн ассоциацизылы та нуналъёсы 100 ар тырмоз. Ас котыраз со огазея 60 ёрос ёзъёсысь кышномуртъёсты. Огазеяськон азьын сылӥсь валтӥсь ужпум — калык фольклорез но культураез утён. Вашкала шайвылъёсысь шедьтэм арбериосъя туала чеберъяськонъёс лэсьтон заводзы вань. Солэн акционеръёсыз — ассоциацие пыриськем 4 сюрс нылкышноос. Завод поттэ кунлэн пӧртэм палъёсаз вашкала дырысен кутӥськем чеберъяськонъёсты. Соосты вузам коньдонэн ассоциация ужрадъёс ортчытъя.

Аннамари но Ристо адӟем карымон кузпалъёс. Калык огазеяськонъёсы пыриськемзы но пӧртэм удысъёсын ужамзы уг люкеты ньыль нылпизэс будэтыны. Айшет но юнме шорысь ӧз керттэ. Кыксы но ярато пӧраськыны, табань-мильым пыжо. Ристолэн ческыт пӧрмо чорыглэсь пӧраськемъёсыз.

Та ужрадын ик ортчиз «Чибориё кышет» клубен тодматскон. Йылпумъянъёс лэсьтэмын вал таӵе нимын ик конкурслы (вормисьёслэсь нимъёссэс газетамы гожъямы ни). Нош кышетъёсты адӟытонын пӧртэм номинациосъя  пусъемын Пичи Пурга ёросысь Лидия Петрова, Ижысь Лия Фёдорова, Любовь Тихонова но Людмила Бусыгина.

Люкаськемъёслы вашкала удмурт кышет сярысь мадиз «Лудорвай» музейын ужась Серафима Лебедева. Пӧртэм калыкъёслэн сямъёссыя кышет герӟаськемын осконэн, черкен. Таиз пумысен тодматӥз Свято-Михайловской черкысь иерей Павел. Ваньзэс ик синмаськытӥзы Удмурт кун университетысь Модая лабораториысь нылъёс — кышетъёс выль сямен воректӥзы.

Лия Малых.

 

Кырӟась кузьым

Сюмси ёросысь Тукан гуртысь Евдокия Ильиных «Удмурт дунне» газетлэсь кузьымзэ басьтӥз.

Пинал дыръям туж ӵем ветлоно луэ вал поездын. Мынӥсько Москвае. Одӥг купее тупамы сьӧд кысъем мӧйы нылкышноен. Пичи дырысеным Италиысь Тото Кутуньолэсь кырӟанъёссэ яратӥсько. Вагон тыр кин ке солэсь магнитофон пыр «Итальяно» кырӟанзэ лэзиз. Лул-сюлэм ик, ява, оломар луиз. Бам кузям синкылиос асьсэос вияны кутскизы.  Нылкышно паймыса шорам учкиз но ӟуч кылъёсты чигтылыса но мар юалляськыны кутскиз.

Со итальян кырӟасьлэн Тото Кутуньолэн Фосдиново городысь но одӥг ульчаын ӵош будэм Ольга (Тотолэсь анайзэ но озьы нимало) эшез вылэм. Солэн сьӧраз сьӧд-бабля пиез но вал. Куное Барнаулэ ветлӥмы, пе, отын двоюродной сузэре улэ.

Тото Кутуньолэсь кырӟанъёссэ туж юн яратӥсько, шуисько. Куд-ог кырӟанзэ удмурт кылэ берыктылӥ вал, соосты асьсэ гурен ик кырӟаса лэзи. Кутскиз ук Ольга монэ ӟыгыръяны, чупаны. Шӧдтэк шорысь нылкышно пельпумысьтыз кышетсэ мынамаз понӥз. Мон, пе, одно ик та пумиськонмес Тотолы верало.

Быдэс дуннелы тодмо кырӟасьлэн эшез Тото сярысь туж трос соку мадиз. Солэн Роберто выныз но Россана сузэрез, пе, вал. Соосын ӵош пыласькыны ветлылӥм, шуэ нылкышно.

Мыным та кышет улытозямлы синпель кузьым луиз. Отысь мон Тото Кутуньолэсь кырӟам куаразэ кылӥсько, итальян Ольгалэсь тусбуйзэ адӟисько.

Любовь  Тихонова.

 

Шутэтсконэз уг вала

Удмурт кун университетын дышетскись Лия Фёдорова адӟытонын вормисе потӥз вашкала кышетэныз.

Пужыятэм кышетлы 100 арлэсь трос ини. Сое мыным сётӥз песянае. Йырам керттӥсько ке, пересьёс паймыса учко: тодмало ас киын пужыятэм вашкала кышетэз.

Песянаелэн кузьымез одӥг интыын кылльыса уг улы: мон соин кильтыръяськисько, я борддоре ошыса, чеберез шоры учкисько. Кышетлэн туннэ но улонэз тунсыко.

Лия Фёдорова.

 

Выжымес утись

Кышетэлы 55 арлэсь трос ини. Басьтӥз сое мемее Анна Степановна Семёнова 1956-тӥ арын гужем. Нош уксёзэ поттӥмы ми, пиналъёсыз, нюлэскысь ӝуйы бичаса но Огырчи базарын вузаса. Та кышетэн мон бызи, Удмурт пединститутын (али УдГу) естествознаниея факультетын дышетскыкум, асьме гуртысь ик пилы Алексей Петровлы. 48-тӥ арзэ ини ӵош улӥськом.

Та кышетэн ик бызиз Оля нылмы, нош али сое нуллэ Анита внучкамы.

Тӥни озьы выжыысь выжые со вамыштэ азьлань. Утиськом кышетмес синчеберез кадь.

Лидия Петрова.

Пичи Пурга ёрос, Вуж Мӧнья гурт.

 

Куное ветлон синпелет

Адӟытонэ вайи мемеелэсь, Анастасия Степановна Михайловалэсь, куно пумитан кышетсэ. Ӵыжы-выжыосмы-а, бускельёсмы-а куное лыкто, яке ассэ ӧтё, кышетсэ керттоз но кыласа-бураса, туж чебер куараен кырӟаса, утялтоз-шулдыртоз вал. Кышет басьтэмын 1983-тӥ арын Татарстанысь Огырчи магазинысь.

Дас нылпи вордыса но будэтыса, мемее 1984-тӥ арын ыштӥз Афган ожысь улэп бертэм пичизэ пизэ. Аслэсьтыз лябӟемзэ шӧдыса (кулӥз 1985-тӥ арын), та кышетсэ синпельлы шуыса но шудо-буро улон сӥзьыса, кузьмаз мыным, кыкетӥ нылызлы.

Арлы одӥг пол гинэ, Пасха дыръя, керттылӥсько та дуно но сӥлы кышетме, мемее туж яратэ вал та нуналэ бӧлякетӥ ветлонэз.

Нина Михайлова.

Пичи Пурга ёрос, Вуж Мӧнья гурт.

Туспуктӥз Владимир Беломорских.

Удмурт Дунне
By Удмурт Дунне 25 октября, 2011 09:31
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<