ӟег ӟеч улонэ вуттоз

Удмурт Дунне
By Удмурт Дунне 9 сентября, 2011 09:51

ӟег ӟеч улонэ вуттоз

 Республикаын йылпумъяське юосты утялтон. Туэ котькуд гектарысь кутсамын 19 центнер ю тысь (2010-тӥ арын — 11,6 центнер). Удалтэмын пудо сиён но. Та дырлы котькуд йырлы дасямын 21,3 центнер (кылем арын — 12,9 центнер).

Музъем уже туэ трос вылез пыӵатэмын. Та пумысен кенешим гурт удысъя но сиён-юонъя министрлэн воштӥсеныз Аркадий Малковен.

 

— Аркадий Трофимович, музъем бордын тыршисьёс куазь сётэмъя ужало. Миым со ваньзэсты куалектытӥз. Ма лэсьтӥське сыӵе югдуръёслэсь утиськон вылысь?

— Кӧс куазь, мон малпамъя, кулэ но, дыр, вал. Асьмеос лябгес кариськимы. Валля арын но куд-ог ёросъёсын кӧсгес улӥз. Можга, Алнаш, Грак, Каракулино, Сарапул ёросъёсын ву тулысысен сӥзьылозь ӧз тырмылы. Люцерна пӧсез чидась культура шуиськомы ке но, со но быдэсак куасьмиз. Асьмелэн культураосмы трос сортъемесь луысалзы ке, таӵе адӟонысь капчиен потасалмы. Али выль культураос кылдо ни. Кылсярысь, судан турын. Со лымшор культура, камыш выллем. Кытын куазь уг зоры, отын сое кизё. Мынэ силослы но, сенажлы но, турынлы но. Умой куазь дыръя турын кык пол  сётэ. Но турнано небыт дыръяз.

Со сяна, берло аръёсы кукуруза площадьёсты бадӟымгес кариськом. Со но пыре кӧс куазьлы сётскисьтэм культураос пӧлы. Одӥг аръем турынъёс пӧсь дыръя кӧня ке ӝутско но будэмысь дугдо, нош кукуруза кема сылэ. Выжыез угось умой. Кӧс дыръя куарез бинялске но мускытэз утьыса возе, нош зор-кот нуналъёсы выльысь усьтӥське.

Уг сётскы кӧслы ӟег но. Но сое берло вакытэ куд-ог хозяйствоос одӥг гектар но ӧз кизьылэ ни.

— Ма муген?

— Урожаез ичи, нош куроез трос. Шуом, чабей, йыды ӝужыт уг будо, но тысь трос сёто. Соосты капчигес утялтыны. Собере ӟегез парсьёслы кожаз уг сюдо, кунянъёслы но со уг мыны. Фураж каро, сезьыен, йыдыен яке чабеен сураса гинэ. Ӟеглэн выжыез бадӟым.  Муысь витаминъёс но мукет кулэ элементъёс умой басьтэ. Со ӟеч будэ чырс музъемын. Чабеез сыӵе муын будэтыны уг луы. Ляб хозяйствоослы ӟег одно ик кизёно. Куд-ог хозяйствоос тулыс арня интые быдэс толэзь кизё. Нош сӥзьыл тол вылэ тросгес кизьысалзы ке, кылем бусыосын ужъёссэс ӝог ортчытысалзы. Озьы каро визьмо кивалтӥсьёс.

Тол вылэ кизем юэз, гектарзэ одӥг центнер удобрениен пазяса, тросгес ю тысь но басьтод, куро но луоз. Нош тулыс кизем юослы удобрение зор-котъёсын гинэ пайда сётэ. Соин ик ӟег республикамы понна утиськон амал куро ласянь но, фураж ласянь но.

— Толйись чабейёс вань-а республикаын?

— Вань сыӵе чабей, но со умой урожай сётэ 3-4 ар куспын огпол гинэ. Со ляб толъе, кынме, тулыссэ пурысьта. Нош ӟег, технологиосты чакласа киземын ке, уг быры. Соин ик ӟег табере котькуд хозяйствоын вань. Тулыс со ваньмызлэсь вазь вуэ: коть пудо сюд, коть гуосы тыр. Туэ трос понэмын силослы. Кылем сӥзьыл ӟег киземын вал 119 сюрс гектар, нош 2009-тӥ арын 79 сюрс гектар гинэ. Соин миым секытгес йӧтӥз. Но кытын пыӵато выль технологиез, отын югдур умой возиське. Туэ, кылсярысь, огаз хозяйствоын гектарысьтыз 5 центнер кутсазы, мукетаз — 30. Яр, Кез, Кияса ёросъёсын 15-16 центнер юоссы люкаськизы, нош Вавож ёросын — 30, Грак ёросын — 24 центнер. Нош туэ куазь отын но, татын но одӥг кадь вал. Таӵе югдурын ассэ возьматэ ни технология. Тани Шарканысь Собинлэн крестьян-фермер хозяйствоез, Вавож ёросысь Мичурин нимо СПКХ кутсазы 40 центнер котыр.

— Кыӵе со выль технологиос?

— Технология — со паськыт удыс. Техника сяна, отчы пыре музъем но: кыӵе солэн пайдалыкез, кӧня отын будосъёслы юрттӥсь микробъёсыз, кыӵе чырслыкез, тырмыт-а гумусэз. Гумус — со азьвыл будосъёслэн кылем-мылемзы. Со трос ке, озьыен, музъем умой. Со музъемез кыед интые нуллыны луэ мукет бусыосы. Кытын умой музъемен ужало — басьтом Вавож ёросысь Мичурин нимо СПКХ-ез, Вотка ёросысь «Июльское» учхозэз, Грак ёросысь «Родина» СПК-ез — отын 30 ар музъемез берыктыса уг гыро ни. Мар кыле бусые — куро-а, сидерат культура-а — ваньмыз муын сисьме. Со тодмо учёнойлэн Терентий Мальцевлэн ужан амалэз, нош Удмуртиын пыӵатӥз сое сӥё-дано агроном Леонид Смоленцев, бадӟым уж нуэ та ласянь Ижысь гурт хозяйствоя кун академия но.

Гектарысьтыз 30-35 центнер ю тысь басьтӥсь хозяйствоос уг гыро ни. Озьы музъеме арысь аре гумус люкаське. Со сяна, музъемез гырон понна туж трос кизер эстӥськон кошке. Культиваторен яке дискаторен нуналаз 60-70 гектар музъемез небӟытыны луэ, нош гырыны 10-12 гектар гинэ луэ.

Котькуд культуралэн аслаз кизён мурдалаез. Ю тысез 10 сантиметре кизим ке, со ноку но уз пушйы. Бусыын суп-сап ужам соку ик адӟиське — культураос одӥг интыын лапег, мукетаз — ӝужыт. Куазь но, удобренилэн ӧжытэз но янгыш ӧвӧл — умойтэм киземын.

Тулыс муысь вуэз утьыны быгатоно. Куд-ог хозяйствоын та ужез 2-3 нунал ӵоже быдэстыны пӧрмыто. Мукетъёсыз, тракторъёссы тырмымтэен, уг вутто вуэз утьыны — кизё кӧс музъеме. Кыӵе отысь урожай басьтод на? Кизёнлы висъяськом 10 нунал. Та дыр ӵоже кидыс улӟе но выжы лэзе.

Асьме учёнойёс эскеронъёс ортчытӥзы шепо но куро модосо будосъёсъя. Озьы тодмо луиз: чабейлы, йыдылы, сезьылы пӧсь куазь кулэ ӧвӧл. Соос ӟеч будо салкым нуналъёсы. Температура луыны кулэ +10+15 градус. Пӧсьгес луэ ке, музъем куасьме, будос курадӟыса будэ.

Вань на ай меӵак кизён технология. Соя ӧжытак бергес кизьыны потоно но музъем одно ик небӟытэмын мед луоз. Соку гербицид ӧжытгес кошке, коньдон шыръяське.

Чаклано на музъемлэсь удалтонлыксэ. Вань сыӵе эскерон. Соя специалист тодыны быгатэ, кӧня муын азотэз, фосфорез, калиез, мукет элементъёсыз. Картограммаен агроном аслыз ужан план юнматэ. Али куронъёсъя кизён агрегатын 1 центнер сложной удобрениез мед луоз: азотэз, фосфорез, калиез. Вань та ужъёсты быдэстыса, котькуд гектарысь республикая шорлыдын 20 центнер котыр ю тысь басьтыны быгатом.

— Туэ шаермыя кутсамын 19 центнер.

— Но ӵем дыръя луэ 15 центнер пала гинэ. 20 центнер басьтыны асьмеос быгатом — огаз хозяйствоын, шуом, 30 центнерлэсь ятыргес, мукетаз ӧжытгес. Но та технологиен урожай 15 центнерлэсь ӧжыт медаз луы. Талэсь ичигес ке, озьыен, технология сурамын — умойтэм ужамын.

— Вылӥ кивалтӥсьёс ужпум пукто республикая миллион тонна ю тысь басьтыны. Сыӵе луонлыкъёсмы вань-а?

— Асьмелы кулэ пудо сиён: кӧс турын, сенаж, силос, фураж. Ю культураос ваньмыз сиёнлы мыно. Миллион тонна кутсаны луоз, но та дырлы туж трос кулэстэмын гыроно-кизёно музъемъёс. 1990-тӥ арез чакласа, Удмуртия юос кизе вал 750 сюрс гектар площадьын, али со 409 сюрс гектар кылемын. Нош вань кизёно бусыос миллион гектар. Но азьло аръёсын ӵошатыны уг яра ни. Малы? Туж трос бусыос выжтэмын нюлэс хозяйстволы яке  пудо возьман интыос каремын.

Удмуртиысь агрохимцентрлэн эскеронъёсызъя али трос музъемъёсын гумусэз но мукет пайдаё элементъёсыз уг тырмо. Соин ик чаклано: кизёно-а отчы, ӧвӧл-а. Начар музъемъёс трос Кизнер, Сюмси, Сьӧлта, Яр, Якшур-Бӧдья ёросъёсын.

Республикаын уг тырмо комбайнъёс, тракторъёс, муэн ужан агрегатъёс. Огъёсыз юоссэс арня талэсь азьло утялтӥзы ини, нош куд-огез али но тяпайто ай. Соин ляб муосты улӟытонлы бадӟым коньдон куштыны кулэез ик ӧвӧл. Мон сямен, озьы урожай ичиёмоз гинэ. Вавож, Можга, Пичи Пурга ёросъёсын вань хозяйствоос, кытын луонлыкъёссы бадӟымесь, нош музъемъёссы уг тырмо. Соос быгатысалзы палэнын ужаны, но со юнме коньдон сэрпалтэм луоз.

Али дырлы асьме пудо уллёлы миллион гектар гыроно-кизёно музъем тырмыт. Но со пӧлысь 750 гектарзэ Совето Союз вакытэ сямен юосын кизимы ке, скал уллёмес трослы кулэстоно луоз. Пудоез угось кожаз пызен уд сюды, солы жалем сиён кулэ. Соин ик гектарысьтыз 20 центнер басьтыны быгатӥмы ке, озьы 400 сюрс гектарысь утялтом 800 сюрс тонна ю тысь. Юосты 450 сюрс гектарозь каримы ке, со луэ ни 900 сюрс тонна. 20 ар талэсь азьло собыдӟа площадьёсысь сомында урожай шер люкаллям. Али кык поллы ичи музъемысь басьтӥськом сомында.

— Озьыен, музъем бордын гижысь-пиньысь ужамлэн пайдаез шӧдӥське ни?

— Ма, кызьы, пе, уз. Вавож ёросысь Мичурин нимо СПКХ-ын туж кема аръёс ӵоже ужало ни музъемлэсь пайдалыксэ ӝутон бордын. Ас дыраз соос но мукетъёсызлэсь пӧртэмесь ӧй вал, начар музъемысь кутсаллязы 10-12 центнер. Туннэ соос мыло-кыдо ужало пӧртэм технологиосын. Соослэсь музъемзэс горшоке поныса, сяська будоз. Мукетъёслэн ӧйтӧд ай. Музъемзы умой, техниказы, туала куронъёслы тупам сяна, азьланьгес вамыштэмын: нырысьсэ Удмуртиын басьтӥзы меӵак кизён агрегат, пудо сиён утялтон «Крона» комбайн. Туж ӟечесь ю утялтон комбайнъёссы. Огкадь усто ужало сӥзьыл но, тулыс но. Туэ ваньмызлэсь бер кизьыны потыса, ваньмызлэсь ӝог быдэстӥзы сое но ваньмызлэсь вазь юоссэс утялтӥзы. Агрономез мон эмъясен ӵошатӥсько. Со бордын возиське музъемлэн тазалыкез но пайдалыкез.

— «Дело было в Пенькове» киноын агроном син азяз пуктэ, кызьы трактор механизатортэк кизе. Сыӵе луонлык азьпалан вань-а?

— Асьмелэн али озьы уз пӧрмы. Басьтом меӵак кизён агрегатъёсты. Соос одӥг ортчемазы трос операция лэсьто. Агрономлэн но механизаторлэн ужзы капчия. Но со понна кулэ ӵошкыт бусы, кидыс одӥг кадь мед согиськоз. Соин ик та агрегатъёс вань хозяйствоосын луыса но урожай уз буды. Бадӟым инты басьто механизаторлэн быгатонлыкъёсыз. Тани Вавож, Алнаш, Пичи Пурга ёросъёсысь механизаторъёс музъем ужез агроном кадь ик ӟеч тодо. Нош Яр, Кияса палъёсын куд-ог механизаторъёс уг валало, умой-а, урод-а кизё.

Али одӥг механизатор мед ужалоз 500-600 гектар музъемен. Уно хозяйствоын трактористъёс уг тырмо, тае лыдэ басьтыса, соос мултэс ай. Шуом, хозяйстволэн 5 сюрс гектар гыроно-кизёно музъемез. Ужась адямиез 200 мурт. Со туж трос. Выль технологиез уже кутыса, со музъемын ик ӧжыт муртэн туж ӟеч урожай басьтыны луоз.

Иван Аркашев.

Туспуктӥз Владимир Беломорских.

Удмурт Дунне
By Удмурт Дунне 9 сентября, 2011 09:51
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<