ӝӧк вылам — быдэс галерея

Удмурт Дунне
By Удмурт Дунне Сентябрь 6, 2011 08:33

ӝӧк вылам —  быдэс галерея

 

Шаерысьтымы тодмо адямиос.

ӝӧк вылам — Удмуртиысь калык художниклэн, Россиысь дано художниклэн П. В. Ёлкинлэн 65 аресэзлы но суредаськон удысын 40 ар ужамезлы сӥзем альбом-книгаез. Кыӵе паймымон со! Сюлэме данъяськон мылкыд пыӵатэ. Возьматэ: улонамы уродэзлэсь тросгес чеберез, визьмоез но ӟечез.

Улэп потэ мыным та книга: отысь пӧртэм удысын тыршись адямиос вазё кадь, композиторъёслэн гожтэм гуръёсын чузъясько кадь, вашкала арбериос азьвыл пересьёслэн улэм-вылэмзы сярысь мадё…

Син азе пуксё удмурт тодосчиос. Соос асьмелэн трос но ӧвӧл, нош кыӵе дуноесь но йӧноесь: С. Ворончихин, А. Перевозчикова, Ю. Перевощиков, В. Туганаев, Н. Стрелков, М. Шишкин но мукетъёсыз.

Инмарен но анай-атаеныз сётэм быгатонлыксэ Пётр Васильевич пичи дырысеныз ик дурыны быгатэм, дыр. Ма, кызьы озьы войнаез адӟымтэ мурт суреданы быгатэ ожысь ветеранъёслэсь мур малпаськись, кышкасьтэм синъёссэс? Сыӵеен возьматэмын гожъяськон удысысь Н. Байтеряков, В. Михайлов, С. Широбоков но мукетъёсыз.

Асьме шоры учко писательёс Р. Валишин, М. Петров, П. Чернов, В. Ванюшев, кылбурчи Т. Чернова, Кун Кенешысь депутат А. Фоминов, калык артист А. Перевозчиков, крезьгурчи Г. Корепанов-Камский, художник М. Гарипов но трос мукетъёсыз.

Таос вӧзын ик огшоры адямиослэн тусбуйзы: скал кыскисьёслэн, колхозникъёслэн, пичи пияшлэн но нылъёслэн, анай-атайлэн.

Нимысьтыз пусъеме потэ: книгаын асьсэлы инты шедьтӥллям Дэри ёросысь дано адямиос. Олимпийской шудонъёслэн ньыль пол чемпионзы Г. Кулакова, Удмуртиысь калык писатель В. Ар-Серги, Россиысь калык артист А. Мамонтов, Россиысь калыкез дышетон удысысь отличник Л. Тепина. Ачиз но П. Ёлкин татын.

* * *

Палэнэ кылемын ӧвӧл ас шаердэ, инкуазез яратон мылкыд но. Кам шур, бусыос, возь вылъёс, писпуос, сяськаос, арлэн пӧртэм вакытъёсыз, удмурт гуртъёс, вордскем палъёс кинолентаын кадь ортчо син азьтӥ. Котькуд кадрзэ, кык пол, куинь пол дугдытыса, учкиськод на, тулысэ я сӥзьылэ пыриськод но, потыны ӵыдытэк, кема сылӥськод кадь отын.

Пётр Васильевичен ӵош вуиськод кунгож сьӧры: Индия, Африка, Вьетнам, Малайзия, Сингапур, Германия, Венгрия, Финляндия, Америка. Кыӵе ке тодмоесь эшъёс шоры кадь учкиськод та странаосысь асьме доры суреданы лыктэм адямиос шоры. Пётр Васильевичлэн шӧдонэз сокем мур, вылды, со котькытысь шедьтэ удмурт сюлэмлы кельшись муртэ.

Та книгаен ӵош мынам коркаям вуиз кадь — Удмуртиысь гинэ ӧвӧл — быдэс дуннеысь суредъёсыг галерея. Мур малпаськонэ уси: котькуд художник, адямиез суредакуз, улэ, дыр, солэн улонэныз. Суредамезлэсь азьло котыр ласянь шӧдэ солэсь кайгузэ но шумпотонзэ, шудзэ. Кӧня адямилэсь улонзэ  улэ меда Пётр Васильевич?

* * *

Мон шудо адями: Пётр Васильевич мыным 5-6 суредзэ кузьмаз ини. Г. Красильников агаелэн Ижысь музеяз мынӥсько ке, отын монэ пумита Ёлкинлэн суредам бадӟым портретэз. Отын агае тыпы вадесын — та писпу кадь юн но бадӟым, пе, вал.

Кык ар талэсь азьло Ёлкинэз «Зарни бугор» кружокам пумиськонэ ӧтьылӥ. Ымзэс усьтыса, нылпиос туж сак кылзӥзы сое. Тужгес ӟеч суредаськыны пӧрмытӥсь пиналлы Пётр Васильевич кузьмаз ачиз сярысь буклетсэ, пуктӥз отчы кинюртэмзэ. Бӧрысь ни нылпиослэсь юай: 4 ар куспын дорамы пӧртэм дано муртъёс ветлӥзы, кин золгес кельшиз? Соос веразы: П. Ёлкин художник но Г. Бекманов артист.

Пётр Васильевичез улоназ вӧсь но карылӥзы, но со ӧз сётӥськы ултӥямъёслы. Сюлэмаз гинэ адӟиськисьтэм вурысъёс кылизы, дыр. Но со сыӵе ик капчи мылкыдо, котькинлы юрттыны дась, калыкез гажась. Семьязэ, нылпиоссэ, нуныкайёссэ яратӥсь, азьланяз ӟечезлы оскись, вылӥ культурая зэмос АДЯМИ.

Трос бызьылоно луиз солы та книгазэ поттон понна. Бадӟым тау тӥледлы, гажано Пётр Васильевич, огшоры адямиослы сое кузьмамды понна.

Мария Ишматова,

Дэри ёрослэн дано адямиез.

Удмурт Дунне
By Удмурт Дунне Сентябрь 6, 2011 08:33
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<