ӝук, вӧйын нянь но апельсин…

Удмурт Дунне
By Удмурт Дунне 30 сентября, 2011 09:43

ӝук, вӧйын нянь но апельсин…

О. Кузнецова.

Кыӵе школаын тужгес ӟеч радъямын нылпиосты сюдон? Та юанлы валэктон сюриз та нуналъёсы. Республикаысьтымы школа столовойёс куспын радъям конкурслы йылпумъянъёс лэсьтэмын. Городысь дышетон учреждениос пӧлын нырысетӥ интые потӥз Ижысь 19 номеро школа, гуртысьёсыз пӧлын устоез луиз Глаз ёросысь Чебершур школа.

Пиналъёсты сюдонэз ӟечомытон вылысь шаерамы пӧртэм ужрадъёс ортчо. Школа столовойёс куспын ӵошатсконэз радъяз Вуз каронъя но калыклы юрттэт сётонъя министерство. Солэсь мылкыдзэ ӟечен лыдъязы Президент Александр Волков, Кун Кенеш, Правительство, «Огъя Россия» партия. Ӵошатсконын вормисе потэмъёсты сӥлы карон ортчиз Ижысь циркын. Йӧллэн праздниказ пыриськизы Правительстволэн Тӧроезлэн воштӥсез Людмила Чунаева, вуз каронъя но калыклы юрттэт сётонъя министр Пётр Пономарёв но мукет вылӥ кивалтӥсьёс. Ужрадэ озьы ик пыриськиз нылпиослы вылӥ ӟечлыкен сиён-юон поттӥсь 7 предприятие.

Ваньмыз-ӧвӧлэз 28 школа столовой ӵошатсконын кужымзэ мертано кариськиз:  2 городысь но 7 ёросысь. Дипломъёс но синпель кузьымъёс озьы ик басьтӥзы Ижысь 89, 77 номеро школаос, Глазовысь 15 но 5 номеро дышетон учреждениос. Гуртысьёсыз пӧлын нимысьтыз пусъемын на Кез ёросысь Кузьма, Эгра ёросысь Чутыр, Вавож ёросысь Водӟи шор ёзо школаос но Дэриысь школа-интернат.

— Куинетӥ интые потэммылы туж шумпотӥськом, — вера Водӟи шор ёзо школалэн директорез Ольга Кузнецова. — Школамы кылем арын гинэ усьтӥськиз. Кыӵе вал столовой вужаз школаын но кыӵе али — ӵошатонтэм. Выжыкылэ вуэмын кадь ми! Школамы 110 пиналлы чакламын, али 81 дышетскисьмы. Но нылпиос отӥяз тросгес луозы. Туэ нырысетӥ классэ 12 пинал лыктӥз.

Ольга Анатольевна верамъя, та школын одӥг пинал но пӧсь сиёнтэк уг кыльы. 1-тӥ-5-тӥ классэ ветлӥсьёс кык пол но сисько. Ӵукнаосы — дунтэк. Сиё ӝук, вӧйын нянь, вӧзаз ватсало улмо, апельсин. Нуназезэ ӝук борды одно ватсаське шыд. Анай-атайёс та понна ог 15 манет сяна уг тыро.

— Ми асьмеос кубиста, ӵужкушман но мукет бакча сиён будэтӥськом, — ватса школалэн директорез. — Зэм, туэ ӧжытгес мерттӥським — выль интыын музъемез дасяно на. Но азьланяз бакчамес одно паськытатом.

Школаын сётӥськись йӧлэн кӧтэз тырем сяна, коробкаосызлэсь мар но лэсьтыны уг луы вылэм! Пӧйшуръёс, мунёос, машинаос но мукет шудонъёс бичаллям 1-тӥ-5-тӥ классын дышетскисьёс. Ог 40 сюрс нылпи киужъёсыныз пыриськиз «Школа йӧл» конкурсэ. Соос ваньмыз ик возьматэмын вал йӧллы сӥзем праздникын. Покчи кибашлыос цирк но учкизы.

* * *

Али республикаысьтымы ог 91 процентэз нылпиос нуназезэ пӧсь сиёнэн гусъясько. Ог 90 сюрс школьник кӧтсэ тыре дунтэк.

Мукет улосъёсын ӧвӧл таӵеез: шаерамы 1-тӥ-5-тӥ классын дышетскисьёслы ӵукнаосы сётӥське дунтэк йӧл но йӧл сиёнъёс.  Коньдон висъяське «Нылпиосты но школьникъёсты сюдон» программа чотын. Удмуртилэн бюджетысьтыз ик коньдон лыктэ трос нылпиё но ёрмыса улӥсь семьяосысь пиналъёсты сюдонлы — таӵеос 23 сюрс пала люкасько.

Нылпиослэн тазалыксы нырысь ик кызьы сиськемзы бордысь потэ. Озьы эскеронъёс возьмато: кӧня ке ар куспын школьникъёсмы шӧдскымон тазагес луизы ни.  Но республикамы таин уг буйгатскы. Али нимысьтыз саклык висъяське школа столовойёсты узырмытонлы. Озьы берло кык ар куспын 302 дышетон заведениысь пӧраськон интыосы выль тӥрлык басьтэмын. Ужало кык огъя столовойёс — Воткаын но Глазовын. Соослы луыса 19 сюрс школьникъёс ӟеч сиёнэн кӧтсэс тыро. Ӝоген таӵе ик пӧраськон инты усьтӥськыны кулэ Ижын.

 Элина Кумачёва.

Туспуктӥз Владимир Беломорских.

Удмурт Дунне
By Удмурт Дунне 30 сентября, 2011 09:43