Шумпотыны муг бадӟым

Удмурт Дунне
By Удмурт Дунне 13 сентября, 2011 10:23

Ӟеч сямлы пыӵаз ини Удмурт Республикалэн Президентэзлэн Александр Волковлэн «ИжАвто» заводын тыршисьёсын толэзьлы быдэ пумиськонэз. Алигес со нош ик та огазеяськонэ вуылӥз, отын ужасьёслэн сюлэмшугъяськытӥсь юанъёссылы валэктонъёс сётъяз. Ужрадэ пыриськизы Россиысь машина поттӥсь предприятиослэн огазеям группазылэн кивалтӥсез Игорь Кульган, «ИжАвтолы» конкурс пыр быръем управляющей Михаил Котов. Заводысь цехъёслэн кивалтӥсьёссы август толэзь куспын тыршемзылы йылпумъянъёс лэсьтӥзы.
Туэ тямыс толэзь ӵоже конвейер пыр ваньзэ-ӧвӧлзэ потӥз 40 сюрс 457 машина. Августэ бичамын 10 сюрс 25 авто. Со пӧлысь 2 сюрс 330-эз — Lada-2104, 6 сюрс 77-ез — Lada-2107, 518-эз — Иж-27175 маркаен машинаос. Со сяна, «ИжАвто»  быдэстэ KIA концернэн азьвыл аръёсы юнматэм огкыллэсь куронъёссэ: август толэзе поттэмын 1 сюрс 60 KIA Spectra но 40 KIA Sorento.
Туэ 1-тӥ сентябрьлы заводын тыршисьёслэн лыдзы 5 сюрс 251 мурт пала люкаськиз: август толэзе ватсаса кутэмын 326 адями. Пусйыны кулэ: туэ ар ӵоже «ИжАвтое» уж инты ваньзэ-ӧвӧлзэ висъямын 3 сюрс 308 адямилы. Одӥг ласянь, лыдпусъёс шумпотто кадь. Но мукет ласянь, кадръёсъя ужпум заводын тужгес лэчытэз луэ. Та пумысен ик мылкыдзэ шараяз И. Кульган но:
— Предприятиын тыршисьёслэн уждунзы толэзьлы быдэ йылэ, шуыны луоз. Августэ солэн быдӟалаез 15 сюрс 615 манет луиз. Кылем толэзе ми доры ужаны интыяськиз 300 пала адями, со вие ик 262 специалист ас мылкыдызъя кошкиз.
Берло аръёсы нырысьсэ заводын тыршисьёс быдэстӥзы кема возьмам планзэс — августэ бичазы 10 сюрслэсь ятыр машина. Но таӵе вормон соослы капчиен ӧз сётӥськы: шутэтскон нуналъёсазы но тыршизы, чакламлэсь тросгес ужазы-бергазы. Эсьмаса, куд-ог цехъёсысь специалистъёс куинь сменаен но ужазы. Президент А. Волков пусйиз: «ИжАвто» заводын тыршисьёс асьсэлы но, быдэс дуннелы но возьматӥзы — ас азязы пуктэм ужъёссэс соос быдэстытэк уг кельто.
Кызьы пусйиз И. Кульган, сентябре йылпумъяськоз KIA сериысь машинаосты поттон. Нош вуоно арын Тольяттиысь «АвтоВАЗ» огазеяськонын но, «ИжАвто» заводын но мытэмын луоз Лада-Гранта автоосты бичан. Тольяттиослэсь асьмелы бере кылёно ӧвӧл. Со сяна, та нуналъёсы радъяське «ИжАвтолэсь» ваньбурзэ пусъён. Оскисько, туэ 1-тӥ октябрёзь заводлэн ваньбурез но, отын тыршисьёс но выжтэмын луозы Россиысь машина поттӥсь огазеяськонъёслэн огазеям группазылэн бурд улаз, мылкыдзэ шараяз Игорь Кульган.
А. Волков шуныт мылкыдын вазиськиз заводын тыршисьёслы:
— Шумпотыны мугмы бадӟым: Совето вакытысен нырысьсэ толэзь куспын 10 сюрслэсь ятыр машина бичамын. Экономикамес азинтонлы та ӟеч инъет. Шудды   асьтэ киын. Ӟеч тыршоды — умой уждун басьтоды, капчи мылкыдын улоды.  Оскисько: «ИжАвто» азьланяз но республикамес шумпоттоз вормонъёсыныз.
Президент вазиськиз заводлэн профсоюз огазеяськоназ пырисьёслы — заводын тыршись егитъёс чырмытгес мед пыриськозы «Улон инты — егит семьяослы» программае. Ӟеч улон условиос егит специалистъёслы луонлык кылдытозы удысазы ӟеч тыршыны.

Елена Никитина.

 

Удмурт Дунне
By Удмурт Дунне 13 сентября, 2011 10:23