Чаклам но сюдэм — тырмыт ӧвӧл!

Удмурт Дунне
By Удмурт Дунне 13 сентября, 2011 10:30

 Дышетон сярысь выль законлы проектэ ӵектонъёсты лыдэ басьтозы на 15-тӥ сентябрёзь гинэ. Октябре соосты эскероз нимысьтыз комиссия, нош ноябре — Россиысь Дышетонъя но наукая министерство. Декабре келялозы Кун Думае, улонэ пыӵатыны ӧдъялозы. Кыӵе со проект? Валэктэ Кун Кенешысь Наукая, дышетонъя, культурая но егитъёсын ужанъя ялан ужась комиссилэн тӧроез Наталья СУДАРИКОВА.

Проектлэн нырысетӥ вариантэз кык поллы бадӟымгес но сумбресгес вал. Таяз радэ лыдэ басьтэмын улосъёсысь дышетӥсьёслэн ӵектонъёссы. Кылсярысь, али  проектын чакламын учебникъёсты но пособиосты дунтэк сётъян. Школаослы коньдон висъяськоз автобус, шофёр возён понна. Муниципал кылдытэтъёслэн йыръёссы сюлмаськизы, водитель ужаны потэмезлэсь азьло тазалыксэ мед эскероз шуыса. Табере вань та сюлмаськонъёсты ас вылаз басьтыны кулэ кун.

Табере уз учке ни, «куиньлы» я «витьлы» дышетскид лицейын я техучилищеын — котькинлы стипендия тыриськоз. Та учреждениосы пырыкузы, абитуриентъёсты уз поттэ ни нимысьтыз эскеронъёс пыр. Зэм, одно лыдэ басьтозы: ЕГЭ-зы ӟеч сётэмын-а. Урод ке, школаын ик визь люканзэс азьланьтозы.

— ЕГЭ пумысен улосъёсысь олокыӵе но паймымон ӵектонъёс вуылэмын, — шуиз Н. Сударикова. — Кылсярысь, Удмуртиысь огез дышетӥсь дэмлам: математика предмет, пе, одно сётоно экзаменъёс пӧлы медаз пыры. Ма, пиналъёс математикаез ӧз ке, мае сётозы на! Асьмеос удысмес муромытыны турттӥськомы ук. Тэшкылиос понна сюлмаськыса, проектын пусъемын: пиналъёсты табере одно нуллоно луоз нылпи садэ. Покчиос черодзэс кема медаз возьмалэ шуыса, кылдытъяно частной садъёс. Иж сьӧрын одӥгез вань ни — выжыкыл кадь, чакламын 50 экелы-дыдылы. Зэм, та понна анай-атайёс толэзьлы быдэ тыро 16-18 сюрс манет.

Нокин уг алы семьяослы асьсэлы нылпи сад усьтыны. Япониын та ласянь  майбыр — кун садъёссы чик ӧвӧл, шуыны луоз. Но отын соосты юн чаклало. Анайлэн вылӥ дышетскемез медло. Со сяна, сое ӝыны арлы быдэ сямен эскеро, тодон-валанъёссэ муромыто. Нош асьмелэн соос лушкемгес ужало. Отын тэшкылиосты визьноданы уг сюлмасько — чаклало но сюдо гинэ.

Выль проектын пал кыл но поттылэмын ӧвӧл анай кылэз дышетон. Тазэ улосъёс асьсэос радъяны кулэ луозы.

 Елена Фёдорова.

Удмурт Дунне
By Удмурт Дунне 13 сентября, 2011 10:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<