Улмолэсь уд акыльты

Удмурт Дунне
By Удмурт Дунне 14 сентября, 2011 10:20

Улмолэсь  уд акыльты

 Кылем арня пумын аслэсьтыз юбилейзэ пусйиз экономика наукаосъя доктор Алевтина Сутыгина. Трос аръёс ӵоже со ужаз Удмуртиысь Кун статистикая комитетын, берло сизьым арзэ тыршиз Правительстволэн Тӧроезлэн воштӥсезлэн секретариатэныз кивалтӥсь луыса. Статьяос, монографиос гожъям сяна, Алевтина Ивановна гур азьын но берганы вуттӥське.

Алевтина но Павел Сутыгин кузпалъёс кыкназы Ижысь гурт удысъя институтын дышетскемын: Алевтина Ивановна — экономист, Павел Фёдорович — агроном. Институтэз йылпумъямзы бере кыкназы но улонзэс наукаен герӟазы. Гур котырын берганы дырзы сокем уг кыльы ке но, басьтэм сиёнэз сокем уг гажало. Ваньмон дыр шедьто ке, плита котыразы асьсэос ик мыло-кыдо бергало.

— Вордскем нуналам улмо нянь пыжисько, — веранзэ мытэ Алевтина Ивановна. — Бакчаямы будэтэм емышмы быдэс арлы тырме. Улмолэсь но сливалэсь компотъёс пӧзьтӥсько, сокъёс дасясько, помидорез сылалтӥсько. Эмезез но сутэрез витаминзэ утён вылысь кынтыны тыршисько.

Алевтина Ивановналэн пичи дырыз ортчиз Алнаш ёросысь Удмурт Вишур гуртын. 7 аресысен Можга городэ улыны выжиллям, но вордскем палъёссэ туннэ ке но син азяз возе. Бадӟым садзы, бакча берысьтызы ӵыпетсы ялан тодаз. Юрт бервылзэс адӟыны шуыса, шыпытак гинэ вуылысал, пе,  дыр уг шедьы.

— Азьло вакытэ гуртын улӥсьёс тросгес дасяллязы варення, — веранзэ азьланьтэ кышномурт. — Пичи дыръямы сое, бадӟым пуньыен омыръяса, сиылӥмы. Кӧты тырем, лэся. Соин варенняос уг дасяськы, улмолэсь повидло гинэ пӧзьтӥсько. Санкт-Петербургын улӥсь апайёсы доры куное ветлыкум но, одно повидлоен банка сьӧрам кутӥсько. Тросэз удмуртъёс пыжиськемез но олома кожало. Бен, мильымез мон но яратӥсько, нош  табанез сокем уг дунъяськы. Вишурын улыкумы ай, арнялы быдэ гур эстылӥзы. Нэнэмы милемыз табанен куноятылӥз, нош мон зыретсэ гинэ сиисько вал. Со дырысен, лэся, табань пыраклы акыльтӥз.

Можгаысь школаын дышетскыкуз, туж яратӥз ужъя урокъёсы ветлыны. Нылъёсты отын пӧраськыны-сылалтӥськыны, киужен вырыны дышетӥзы. Нэнэезлэн но быгатонлыкъёсыз бордаз лякиськиллям. Озьы Сутыгина весяк сямен аслам керттэм дӥськутэным, пе, ветлӥ. Угось пичи мугоро адямиослы туала вакытэ но тупамон дӥсь шедьтыны шуг.

Керттэм дӥсь нуллон вакытэз ортчиз —  наука быдэсак ваньмон дырзэ басьтӥз. Пӧртэм командировкаос, статистикая лыдпусъёс кышномуртлэсь йырзэ ялан поромытылӥзы.

Та нуналъёсы Алевтина Ивановна пенсие потӥз, озьы ке но шутэтскыны уг малпа. Гурт хозяйствоя академиын студентъёслы тодон-валан люканы, пе, юртто.

Алевтина Ивановна вордскем нуналаз кузпалзэ но тодмооссэ ческыт пыжиськемъёсын куноятэ. Аслэсьтыз рецептъёссэ газет лыдӟисьёслы но ӵектэ.

«Шунды» салат

Кулэ: консерва чорыг, 6 курегпуз, 2 помидор, 1 йыр сугон, 1 ческыт перец, салат куар но вож турын.

Курегпузэз но сугонэз, векчи юдыса, консерва чорыген сурано, пичильтык сылалтоно. Помидорез 4 яке 6 юдэслы люконо, перецез кульчоосын вандылоно. Салатлы дасям тусьтые нырысь ик пононо салат куар, со вылэ — дасям суретэз, нош дуръёссэ помидорен, перецен, вож турынэн чеберъяно.

Улмо нянь

Кулэ: 2 курегпуз, 1 стакан йӧлвыл яке кефир, 1 пачка творог, пызь, сода но улмо.

Курегпузэз но йӧлвылэз тусьтые кисьтоно, ватсано пыргытэм творог но пичильтык сода. Пызен суралтэм бере ыльнянез вӧям табае кисьтоно. Векчи юдэм улмоез, дурысеныз кутскыса, ыльняне бышкано, буш интызэ кельтытэк. Мычиськем улмо йылъёсыз песокен но нӧкы вӧен зырано но пыжыны пуктоно. Чаклано: улмоез медаз сутскы.

Самса

Кулэ: 1 курегпуз, 1 стакан йӧлвыл, ӝыны пачка вӧй (маргарин но яралоз), ӝыны чечы пуньы сода, уксус.

Вӧез векчи юдоно. Со вылэ курегпуз, йӧлвыл, вылтӥз уксус кисьтэм сода ватсано но пызен суралтоно. Ыльнянез нап мед луоз. Сое табае вӧлдоно. Вылаз пырсатэм сӥль, кубиста яке картошка юдоно. Няньлэсь дуръёссэ выллань ӝуткано, куинь сэрго карыса, самса шоры пась кельтоно.

Валентина Емельянова.

  Туспуктӥз Владимир Беломорских.

Удмурт Дунне
By Удмурт Дунне 14 сентября, 2011 10:20