Уйвӧтъёсам ялан ужасько

Удмурт Дунне
By Удмурт Дунне 30 сентября, 2011 09:59

Уйвӧтъёсам  ялан ужасько

Тэль. Артэ ик кошке шур. Таӵе шулдыр интыын сылэ Эгра ёросысь Порвай гуртысь кузпалъёслэн-пенсионеръёслэн Баталовъёслэн корказы.  Вить  укноё  юртсы гурт пумын — Пежвай пала нуись сюрес дурын — сылэ. Соин котыр эркын, вӧл-вӧл. Таӵе интыын адями либыт, лякыт сямо луэ. Сыӵе ик Иван Арсентьевич но. Туэ гужем солы 74 арес тырмиз.

— Вордски мон татын. Атае пересьмытозяз ужаз колхозын. Со вакыт пенсия туж ӧжыт сёто вал, соин пулэсь олома но лэсьтылӥз. Ас киосыныз бичам станокеныз тросэзлы черсон машина лэсьтылӥз. Бур пыдаз потос кылдыса, со костылен ветлӥз. Соин ик мон котьку сьӧраз лэсьтэм ужзэ, салазкие поныса, нуллӥ. Трос адями черсӥз солэн машинаеныз.

— Нош мае черсӥзы?

— Азьло куж вал ук. Ыж гонэз соин туж ичиез черсылӥз. Али тани заводын бичам тӥрлыкен ыж гон черсо ни. Сыӵеос но ӧвӧл ни, шуыны луоз. Нош кужен киын лэсьтэменыз гинэ ужазы.  Дӥсь соку ваньмыз сямен дэралэсь вал. Кышномуртъёс черсо но, ма кулэ, сое ик кертто, вуро. Коньдон ӧз тырылэ бере, базарысь басьтыны номырин вал. Гуртын улӥсь быдэсак ас киосызлы оскылӥз. Анае но та гуртысь ик. Со но колхозын ужаз.

Атаез вӧзын Иван киужлы дышиз, но кин луон сярысь ӧз малпаськылы. Со вакыт гуртын улӥсьлы паспорт уг сёто вал бере, колхозысь кошкыны уг луы. Соин-а, мар-а  эшъёсыныз одӥг малпанэн улӥзы: кызьы городэ пегӟоно. Куинь кузя армиысь бертэмзы бере справка дуре колхозлэн председателез доры мынӥзы. Муг шедьтӥллям: бадӟым лэсьтӥськонэ шонтӥськом, пе. Сыӵеослы сюрес усьтӥське вал угось.

— Предмы арлыдогес вал ни, контораысь сое ӧм шедьтэ. Пырим гуртаз. Со гур вылын пуке. Шуэ: хозяйка, потты ай, пе, таослы шуныт вина. Юим. Справка но милемлы кулэ ӧз луы ни. Нош кивалтӥсь валэктӥз: февраль толэзе, пе, Ижевске трактористэ дышетскыны мынэмды луоз, Порвайын, пе, трактористъёс ичи. Мынӥды ке, колхоз ачиз коньдон тыроз. Порвай но Лонки-Ворцы 1953-тӥ арын одӥг колхозэ огазеяськизы, нош мон армиысь 1959-тӥ арын бертӥ. Техника вань, нош механизаторъёс уг окмо. Тӥни озьы мынӥм дышетскыны Ижевске. Собере  8 ар ужай тракторен. Берло кузёлы шуисько: шофёре, пӧй, дышетскеме потэ. Со уг лэзьы: тракторист но, пе, кулэ. Предмес воштӥзы но, мынэсьтым  мылкыдме тодыса, соку ик шофёре дышетскыны дэмлазы. Ну, шумпотӥ ук. Вань малпанэ быдэсмиз кадь. Курсъёсты умой йылпумъяса, берытски татчы ик колхозэ.

— Ма, озьы ик луыны кулэ, дыр, вал, колхоз ыстӥз ук тӥледыз?

— ӧвӧл. Соку Эграла но ужаны кыльыны дэмлало ни вал. Берытсконо кариськи. ӵыж-выль бензовоз сётӥзы. Соин мон 13 ар ужай. Собере кема дырлы висьыны уси. Ужаны потэме бере вуж машина сётӥзы ини. Со — списать карем маке — етӥн станциысь ваемын вылэм. Тае, пе, тупатъялод но комбайнёръёслы, трактористъёслы бусые пӧсь сиён нуллод. Сое лэсьтӥ но монэ пӧртэм ужъёсъя арняяз куинь пол Ижевске ысъяны кутскизы. Кема ик дыр ӧз ортчы — механик дораз ӧтиз. Ветлы выль машина дуре, тырмоз, пе, куашкаменыз ужаны. Мыным соку пенсиозь 8 ар кылиз на вал. Выль машиналэн ужан дырыз 8 ар. Малпасько, та мыным шутэтскыны потытозям тырмоз ни. Но со техникаен мон 14 ар ужай на. Пенсие потыса, эшшо 6 ар тырши. Собере колхозъёсын улон туж шуг луиз. Уждун сётъямысь дугдӥзы. Соку малпай: мар мон ужаса уло на, пенсия ӧжытак ке но тыро ук. Озьы машинаме гараже нуи. Ужакум механикмы шуылоз вал: «Гырись геры, пе, уг сыномы. Ужамысь дугдӥд ке, пересьмод». Со озьы ик вань, дыр. Но уйвӧтъёсам мон ялан ужасько.

Иван Аркашев.

Туспуктӥз Владимир Беломорских.

Удмурт Дунне
By Удмурт Дунне 30 сентября, 2011 09:59