Удмурт этнографилэн тӧроез

Удмурт Дунне
By Удмурт Дунне Сентябрь 27, 2011 12:10

Удмурт этнографилэн тӧроез

Г. Верещагин.

Григорий Верещагинлэн 160 ар тырмонэзлы сӥзьыса но Историяя, кылъя, литературая Удмурт институтлэн 80 аръем юбилееныз валче ортчиз калыккуспо научной конференция. Ижысь сяна, отчы пыриськизы Казаньысь, Санкт-Петербургысь, озьы ик Эстониысь, Венгриысь  50 пала учёнойёс. Нырысетӥ удмурт писатель, тодосчи, дышетӥсь, священнослужитель Г. Верещагин калыкмылэн историяз быдӟым инты басьтэ. Но солэн наукая эскеронъёсыз, чеберлыко произведениосыз огъя фин-угоръёслэн культураязы но мур пытьы кельтӥзы, асьмеды герӟась нюжаосты шараяны юрттӥзы.

История наукаосъя доктор, Историяя, кылъя, литературая Удмурт институтлэн директорез Алексей Загребин дунъямъя, удмурт этнографилэн тӧроез, удмурт наукалэн йырыз Г. Верещагин удмуртъёс сярысь быдэс дуннелы ивортӥз. 19-тӥ даурлэн пумаз потэм «Вотяки Сосновского края», «Вотяки Сарапульского уезда Вятской губернии» книгаосыз, статьяосыз  оскымонэсь вал, удмуртъёслэсь улонзэс котыр ласянь возьматӥзы, соин Григорий Егоровичлэн материалъёсыз, малпанъёсыз  вылэ пыкъяськизы кунсьӧр тодосчиос но. Географияя ӟуч общество ужъёссэ пусйиз медальёсын.

Филология наукаосъя доктор Василий Ванюшев докладаз вераз: Г. Верещагинлэн данакез ужъёсыз наукаен герӟаськемын ке но, тросэзлы учыръёслы дунъет сётэмын, озьы тодосчи пӧрме писательлы. Соин валче этнографилы сӥзем гожтэмъёсаз шӧдӥсько эпослэн, драмалэн, лирикалэн ӧръёссы. Вераны луэ: Г. Верещагин — 1889-тӥ арын гожтэм «Чагыр, чагыр дыдыке…» нырысетӥ удмурт кылбурлэн гинэ авторез ӧвӧл (али бен тодмо ини, 18-тӥ дауре ик удмурт кылын кык ода гожтэмын вал шуыса), со литературалэн вань жанръёсызлы кутскон сётӥз. Озьы ик журналистикалы но: Сарапул уездысь удмуртъёс сярысь книгаяз пыртэмын Дэри черкогуртын Михаил Николаевич князез пумитамзы пумысен статья, гожтэмезъя со туж матын репортажлы.

Г. Верещагинлэн асьмелы кельтэм тодон-валанъёсын шыкысэз сокем узыр — отын бугыръяськон кылёз егитъёслы. Бадӟым утчаськон нуо Пичи Пурга ёросысь Брангурт школаын В. Байсаров кивалтэм улсын. В. Ванюшев верамъя, тодосчиез буре ваён картаын та огез «бадӟымез точка» луэ. Брангуртысь черкын Г. Верещагин ужаз, школаын Инмарлэн законэныз тодматӥз. Али черксы куашкатэмын ини ке но, баӵко сярысь тодэ ваёнъёсты брангурт калык выжыысь выжые уте, школазы солэсь нимзэ нуллэ, музеязы солы сӥзем сэрегзы вань, гуртазы Поп кенер выллем интыосты уг вунэто. Ноябре татын ортчоз нылпи конференция.

Брангуртэ вуэмезлэсь азьло Г. Верещагин улӥз Шаркан ёросысь Ляльшурын, школа усьтӥз. Татын али ужа музей. Узыр материал люкамын Шарканысь шаертодонъя музейын но, ортчыло Г. Верещагинлы сӥзем лыдӟонъёс. Жаль, музейлы нокызьы пӧрмытыны уг быгато Г. Верещагинлэсь Ляльшурысь корказэ. Нырысь кыкетӥ этажзэ сэрттӥзы, собере кӧня ке адямиез  улыны пыртӥзы.

Татчыозь саюлын возиськизы дано удмуртлэн вордскем интыяз — Кез ёросысь Поломын — улӥсьёс. Но туэ соос кылзэс сётӥзы Шарканын октябре ортчоно лыдӟонъёсы пыриськыны.

Ольга Вахитова.

Удмурт Дунне
By Удмурт Дунне Сентябрь 27, 2011 12:10
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<