Туриос но кыстӥсько выллань

Удмурт Дунне
By Удмурт Дунне 13 сентября, 2011 10:26

Туриос но кыстӥсько выллань

 Туэ ар понна нылпи дуннеын берлоез корка пырон ортчиз Кизнер каргуртын. Ӧсъёссэ вӧлак усьтӥз отысь 1 номеро школа. Сӥё-дано ужрадэ пыриськизы Президент Александр Волков, Кун Кенешлэн Тӧроез Александр Соловьёв, Правительстволэн Тӧроезлэн воштӥсез Людмила Чунаева, Химия ож тӥрлыкез возёнъя но быдтонъя кун управленилэн кивалтӥсезлэн воштӥсез генерал Николай Шебанов но мукет вылӥ кивалтӥсьёс.

Кизнерысь нылпиос но дышетӥсьёс палёмемын: вуж школазы тупатъям бере выль кадь луэмын. Азбараз пырыса ик, выжыкыл дуннее вуиськод: сяськаос веттасько, фонтанын жильыра юзмыт ву, борддоре суредам туриос тани-тани выллане ӝутскозы… Школа борды ик пуктэмын на бадӟым итэт — таяз интыяськемын компьютер класс но туала куронъёслы тупась спортзал. Спортзалын каргуртысь вань мылкыд карисьёс ёзвиоссэс кыдатыны быгатозы.

— Кемалась потэ ни вал та школаез выльдэммы, — вераз А. Волков сӥё-дано ужрадын. — Бадӟым тау химия ож тӥрлыкез возёнъя но быдтонъя кун управленилы. Басьтӥськиз та уж борды, тырмыт коньдон висъяз. Нош 8 номеро спецстройысь лэсьтӥськисьёс чырмыт басьтӥськизы та уж борды.

Республикамылэн Президентэз эшшо но шумпоттоно кариськиз Кизнер палъёсты. Со вераз Россиысь Правительстволэн Тӧроеныз В. Путинэн пумиськылэмез но Москваысь ӟеч иворен бертэмез сярысь. Владимир Путин пумит уг кариськы химия ож тӥрлыкез возёнлы но быдтонлы сӥзем программа чотын Кизнере ватсаса коньдон висъяны. Озьы али Кизнер черкогуртэ выль школа пуктонлы документъёс дасясько ни. Москваысь вуэм коньдон чотын ик азинтӥськоз улон юртъёсы чагыр эстӥськон пыртон, ёросысь гуртъёслэн тусъёссы выльдӥськозы.

Элина Васильева.

Удмурт Дунне
By Удмурт Дунне 13 сентября, 2011 10:26