Сяськаё веникен лэзьяськон

Удмурт Дунне
By Удмурт Дунне 7 сентября, 2011 10:25

 Ӟечбуресь, редакциын ужасьёс! Мынам тӥледлы ушъяськеме потэ, мылкыд пачылмемын шумпотонэн. Тукан гуртам пенсионеръёс лики-лякиосыз сяна ӧвӧл, нош мынам мылкыд юмал йӧлпыд кадь ай. Маин ке но юрттэме потэ удмурт калыклы, асьме йылолъёсты кельтыны пинал калыклы, соин ик выжи ужаны бускель Гуртлудэ.

Старовер гурт вал со. Но отчы трос удмуртъёс лыктӥзы. Соос туж умоесь, шаплыесь, мыло-кыдоесь. Тужгес но шумпотӥсько, ӟучъёсты удмуртъёс пала берыктыны быгатӥм шуыса. Ма, «Удмурт кенешлэн» эшъёсыз, ёзчиосыз вань котькуд удмурт гуртын. Соос мылысь-кыдысь пырисько пӧртэм ужрадъёсы. Озьы ик луиз Гуртлуд калыкен но. Ӵош улӥськом, ӵош ортчытъяськом ӟуч но удмурт йылолъёсты.

Тужгес но юрттэ кенешмылы Евгения Ивановна Шубина. Туканысь со отчы улыны выжиз семьяеныз ог 25 ар талэсь азьло. Клубын ужа Светлана Михайловна Хозяйкина. Со юрттэ репетициос ортчытъяны. Мон удмурт кылын сценарийёс гожъясько но солы возьматӥсько. Татын ик улэ, ветеран огазеяськонэн кивалтэ ӟуч кышномурт Татьяна Николаевна Брагина. Милемлы, калык огазеяськонъёсын бергасьёслы, нокин но уждун уг тыры. Пинал калык ас мылкыдмыя ужаммылы пайме. Малы-о мӧйы калык коркан пукыны кулэ? Маин но соин выроно ук адямилы, кыӵе ке но пайда ваёно. Вот озьы ми малпамы… мунчое пырыны. Сюмси ёросамы мунчое пыро сяськаё веникен. Солы ик сӥземын та йылол. Мон сое пичи дырысьтым котькуд гужем туж витисько но яратӥсько.

Таӵе сямез ик возьматӥм Гуртлудын. Вуылӥзы ёросысьтымы кивалтӥсьёс, культура юртын, газетын ужасьёс, Удмурт нылкышно кенешлэн но «Удмурт кенеш» огазеяськонлэн ёросысь ёзчиосыз. Нырысь ик ми утчам мунчо. Тужгес но тупаз мунчоез Ирина Пичугиналэн. Туж бадӟым тау солы. Ӟуч адями котьку милемлы юрттыны соглаш. Ужрадамы пыриськизы колхоз контораын, клубын, нылпи садын ужасьёс, пиналъёс, пенсионеръёс. Учкисьёс но трос гинэ вал. Ирина Васильевна мунчозэ эстӥз. Ми ваньмы ветлӥм веник тӥяны, сяська бичам, веник керттӥм. Отчы куинь пумо сяська думим: одно ик мед луоз купанчаез (ми сое шуиськом тыпанча). Азьло дыре выль веникен пырыны уг яра вал, тыпанча усьтӥськымтэ на ке. Сяськаё веникез пӧсьвуало гинэ. Пырем бере, мунчоысь потыса, сое одно ик сэрпалтоно мунчо липетэ. Кытчы дӥньыз возьматэ, нылмурт отчы бызёз, нош егит пи отысь кышно ваёз. Нош пересьёслэн веник дӥньзы возьматэ ке шай пала, озьыен, ӝоген сопал дуннее кошкозы. Соин ик тросэз мӧйы калык веникен уг лэзьяськы, кышкаськом, пе.

Нош пинал ныллэн яке пилэн веникез липет йылтӥ мунчолэн мукет палаз лобӟе ке, ныл бызёз мукет ёросэ,  пи сьӧрлось кышно басьтоз. Тӥни сыӵе вашкала сямез ми али но ум вунэтӥське. Сяськаё веникен кыласа-бураса пыриськом, сяська кадь чебер мед луомы, таза мед уломы. Мунчоысь потэммы бере юиськомы трос пумо турын-куарлэсь парем чай. Чай пӧзьтӥськом самоварен гинэ.

Мон тӥледыз но кайта ӧтисько сяськаё веникен мунчое пырыны. Лыктэ, веник но паром, кырӟанъёсын но шулдыртом.

Юн гажаса,

Евдокия Ильиных.

Сюмси ёрос.

Удмурт Дунне
By Удмурт Дунне 7 сентября, 2011 10:25