Сюлэмыз пу борды бурмиз

Удмурт Дунне
By Удмурт Дунне 14 сентября, 2011 10:10

Сюлэмыз пу борды бурмиз

Шорад кырмышъяло ке чебер наличникъёсын шуккем укноос, коркалэн огез сэргыз но кырыжамын ӧвӧл ке, амалтэк малпаськод: татын юртъер кузё рос-прос, дыр. Нош Якшур-Бӧдья ёросысь Мукши гуртын улӥсьёслэн огезлэсь пӧртэм липетсы — вожмаськыса ӝутэмын, кожалод. Татысь Николай Вахрушев гуртсэс озьы чеберъя вылэм. Одӥгезлы наличник шуккоз, мукетызлы кровать лэсьтоз, куинетӥзэ ӝӧкен-пуконэн шумпоттоз. Аслыз 32 арес гинэ ай, нош киыз, быдэс даурзэ пуэн ужам муртлэн кадь, котьмалы мынэ.

9-тӥ классэз быдтыкуз, технология предметэн Колялэн «куинь» потӥз. Сюлэмаз   малы ке ӧз лякиськы пуэз вӧлон. Нош 10-тӥ классын дыръяз доразы выль дышетӥсь вуиз — А. Голубин. Воргоронлэн ки улаз шедем котькуд арбери улӟе-кырӟа, ма гинэ эн косы, ваньзэ лэсьтыны пӧрмытэ. Со Вахрушевлэн классэныз кивалтыны кутскиз, технология урокъёс нуиз. Коляез но визьманы кутскиз. Пияш ачиз но улон шоры сайкыт синмын учкыны кутскиз. Оло, вазь атайтэк кылеменыз сэрен  дышетӥсьлэсь верамъёссэ-индылэмъёссэ пеляз басьтыны ӧдъяз. Адӟемпотостэм технология урокъёсты но гажаны кутскиз. Ачиз но валатэк кылиз, кызьы сюлэмыз пу борды бурмиз. Табере ачиз визьнода ни:

— Нюлэс дасяно толалтэ. Тужгес но — бугролы чакламзэ. Соку кынмем корлэн сирез пушказ весяклы кылёз, сыӵе кор сисьмонлы уз сётӥськы. Корка пушкын ярась арбери, шуом, ӝӧк-пукон лэсьтыны малпаськоды ке, пуэз куасьтоно лапас улын  тӧл шорын, саюлын. Шунды сиос йӧтӥсь азе вӧлдӥды ке, пуды позырскоз, пильылӥськоз.

Вахрушев станокъёссэ но ачиз лэсьтӥз. Корт юдэсъёсты кызьы кулэ, озьы вандылӥз, лякылӥз, рубанок, циркулярка пуктӥз. Вераны гинэ капчи  — толэзь ӵоже выриз. Магазинысь басьты вал — гурт калыклы вормонтэм: ог 30 сюрс манет сылэ. Зэм, чурытамез ассэ ик шуккиз. Кузпалыныз огпол гинэ ӧз даллашы уен-нуналэн ышылэмез пумысен. Котьма ке но Николай уг жаля. Станокез уго табере ассэ но, кышнозэ но, кык нылъёссэс но сюдэ.

— Пилорамаын ужасько ик. Но отын уждунэз рос-прос ӧвӧл. Дорам мастерское ӧй луысал ке, туж секыт йӧтысал, — шуэ Вахрушев. — Гуртоос но, палэнысьёс но монэ лапак косо маке лэсьтыны.

Аслэсьтыз корка пушсэ но ас киосыныз лэсьтӥз. Югыт, шулдыр. Но люкытгес. Воргорон бадӟым коркалы фундамент кисьтэм ни. Вӧл-вӧл юртам пыри ке, пи сярысь малпаськыны луоз, шуэ со, кивоштӥсь кулэ.

Елена Фёдорова.

Удмурт Дунне
By Удмурт Дунне 14 сентября, 2011 10:10
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<