Сур шурез кӧсатоно!

Удмурт Дунне
By Удмурт Дунне 30 сентября, 2011 09:47

Президент Александр Волков туэ рос-прос басьтӥськиз шаерысьтымы уй клубъёсты чаклан борды. Талы муг луиз республикаысьтымы Кышкытлыклэсь утиськонъя комиссилэн шараям лыдпусъёсыз: быдэ вуымтэос пӧлысь 49 процентэз арнялы быдэ одӥг пол сур ӟамыръяло, 25 процентэз — арня куспын трос пол. Таӵеос школаысь, тордосъёс луыса, пото ни. Удмурт Республикаысь наркологияя диспансерлэн кивалтӥсез Татьяна Карлова ивортэмъя, егитъёслэн уродэз борды кыстӥськонзы герӟаськемын кудӟытӥсь юонъёслэн вамышлы быдэ вузаськеменызы. Тае возьматӥз Ижысь школаосын ортчытэм юалляськон но. Ижкар сярысь верано ке, туннэ сур ӵектӥсь 300 пала ларёкъёс школаослы матын сыло. Малпаськонэ усиськод: соосты усьтыны лицензия сёто ук муниципал кылдытэтъёс — иське, соосты уг сюлмаськыты будӥсь пиналъёсмылэн кудӟон дуннее кыстӥськемзы? Та ласянь берло вакытэ висъяськиз Эгра ёросысь Сундур гурт.

Туэ гужем Сундурын улӥсьёс ёросазы потӥсь «Светлый путь» газетысь иворез лыдӟизы: ӝоген, пе, гуртазы усьтӥськоз выль вуз карон инты. Одӥг ласянь, талы шумпотоно кадь — урод шат созэ я тазэ вузэз, городын сямен ик, пӧртэм магазинъёсысь бырйыны. Но гуртоосты сюлмаськонэ уськытӥз мукетыз: вӧл-вӧл магазин интые, пе, усьтӥськоз ларёк. Нош маин отын вуз каро, ваньмызлы тодмо: сурен, пӧртэм чыры-пырыен.

Гуртоослэн мылкыдзы уката но пӧзьыны ӧдъяз мукет иворез тодэмзы бере: выль ларёк, пе, усьтӥськоз удмурт культурая центр вӧзын. Отын ик интыяськемын нылпиослы шудон площадка но поръян-шутэтскон инты. Керӟегъяськыны нырысь ик ӧдъязы анай-атайёс: пиналъёсмы табере лошъяськись ӟенеликъёс но жуг-жаг пӧлын шудозы шат? Улон угось возьматэ: ларёк котырысь калык уг бырылы. Отын бызе сур шур.

— Вуз карон сэрег усьтонын номыр уродэз ӧвӧл кадь, — веранзэ мытэ Сундурысь культурая юртысь специалист Ольга Брызгалова — ӵапак со ульчалэн старостаез луэ, кытын чакламын ларёкез ӝутыны. — Но со гуртмылэн культуралы сӥзем люкетаз интыяськоз ук. Вылаз ик, уен-нуналэн ужалоз, шуо. Ньылонзы бичатӥсьёс отысь уз бырылэ. Мон лыдъямъя, та малпан умойтэм. Гурт калыкен но люкаськылӥмы, интыысь кивалтӥсьёсты но ӧтчамы. Соос милемыз сак кылзӥзы ке но, тыро-пыдо валэктон сётыны ӧз дыртэ. Озьы ми, дэмен кариськыса, малпанэ вуимы: мылкыдмес валэктыса, гожтэт ыстоно ёрос администрацие. Но, законъёсты тодымтэенымы, та ужен бере кылиськеммы.

Ужпум тани ма бордын. Ёрос газетын июле потэм иворын пусъемын вал: ларёк ӝутонлы гуртоос пумит ке, та пумысен кык арня куспын ивортоно Эгра ёрос администрацилэн архитектурая ёзаз. Сур вузан инты усьтон сярысь ивор соослэсь вань саклыксэс сайяз, лэся, висъям дырез чик но лыдэ басьтӥллямтэ. Сюлмаськыны ӧдъязы музъем мертасьёс вуэм бере гинэ. Озьы ёрос администрацие гуртоос вазиськизы ай август пумын гинэ.

— Ми, ӵош кариськыса, гожтэт дасямы но сое Эгра ёрослэн йырызлы Валерий Прохоровлы келямы, — вера Ольга Брызгалова. — Пумитъяськеммы сярысь ивортыны дораз но пырамы. Со ужпумез сэрттыны-пертчыны оскытӥз.

Гуртоос кышказы вал ини: гожтэтэн бере кылизы бере, кин тодэ, оло, сентябрь толэзь куспын лэсьтӥськисьёс ларёкез ӝутыны но вуттозы. Но та дырозь солы висъям инты буш сылэ. Кызьы ивортӥзы Эгра ёрос администрациын, магазинэз пуктон дугдытэмын.

Сундурын луэм учыр тодэ вайытӥз Удмурт Республикаысь Президентлэсь Александр Волковлэсь «Калык программа. Азьлань, Удмуртия!» проектсэ. Сое со улонэ пыӵатыны ӵектӥз «Огъя Россия» партилэн Удмурт ёзэзлэн кемалась ик ӧвӧл ортчем конференцияз. Пуштроссэ тазьы валэктӥз: кивалтӥсьёслы кылыны быгатоно огшоры калыклэсь малпанъёссэ-мылкыдъёссэ. Соосты санэ басьтыса гинэ, улонэ пыӵатоно созэ я тазэ проектэз. Та куронэз быдэсъясьтэм кивалтӥсьёс, ёрос йыръёс пуконысьтызы кошкытэмын луозы. Сундуръёс вылысь адӟиськомы: Президентлэн проектэз быдэсъяське — власть калыкез кылэ.

Наталья Седова.

Удмурт Дунне
By Удмурт Дунне 30 сентября, 2011 09:47