Со — шуд…

Удмурт Дунне
By Удмурт Дунне 7 сентября, 2011 10:27

Со — шуд…

 Толэзь талэсь азьло со пусйиз 79 арес тырмонзэ. Эшъёсызлэн ӟечкыламзылы туж шумпотӥз. Ачиз но шуныт кылъёссэ ӧз жаля. Нош кык арня улыса, та дунне вылысь пыраклы кошкиз…

«Удмурт кенеш» огазеяськонлэн ревизионной комиссиеныз кивалтӥсь Андрей Андреевич Гребин паймымон адями вал.

Андрей Гребин вордӥськиз Ува ёросысь Поршур-Тукля гуртын бусыын аран дыръя. Дышетскиз Мултанысь, собере Уваысь школаосын. Пичи дырысеныз нырысь 4, бӧрысь 15 иськем пыдын я куасэн ветлоно луиз. Школае сюрес капчи ӧз сётӥськы: кионъёслэсь но пегано луылӥз. Со учыръёс ик, дыр, Андреез кыдатӥзы. Школаын дышетскыкуз, спортын бадӟым вормонъёс басьяз. Нош армиын сое Уйпал флотэ зарезь авиацие басьтӥзы. Андрей Андреевич пыриськиз водородной бомбаез нырысьсэ ву улын пуштытонэ, офицерозь будӥз.

Удмурт шаере бертэмез бере комсомоллэн Удмурт обкомез солы вазиськиз, гуртысь спортэз ӝутыны курыса. Трос ик дыр ӧз ортчы, Андрей Гребинлэн кивалтоно обществоез Совето Союзысь 10 кужмоосыз пӧлы шедиз но та интыез дасо ар пала возиз.

Кивалтыны быгатэмзэ шӧдыса, Андрей Андреевичез басьто Культура удысын ужасьёслэн профсоюззылэн обкомаз. Татын но со удысэз ӝутон, борды рос-прос басьтӥськиз. Со азьын шаерысьтымы культура удысын ужасьёслы  араз 2 квартира сяна ӧз сётъялэ, нош Гребин сюлмаськемен, огдыре 100 пала патер висъязы.

Профсоюзъёслэн обкомазы тыршемез бере Андрей Андреевич профкурсъёслэн директорзы луэ, бӧрысь Профсоюзъёслэн Федерацизылэн кенешаз орготделэн кивалтэ. Пенсие потыса но, тэк улонэз уг вала, общественной уже пыриське, «Удмурт кенеш» огазеяськонэ нуналлы быдэ уже сямен ветлэ. Озьы 10 арлэсь кема…

— Улонэз котыр ласянь валась, ваньзэ пыр-поч чакласа лэсьтӥсь адями вал со, — тодаз вае «Удмурт кенеш» огазеяськонлэн вице-президентэз Валентин Тубылов. — Ӟеч тодылӥз законъёсты. «Удмурт кенеше» трос калык вазиське вал. Уноез — воксё ӟудыса, мукет интыосысь юрттэт но визь-кенеш шедьтытэк. Гребин сыӵеослы юрттыны тыршиз.

Валентин Кузьмичлэн верамезъя, Андрей Андреевич ӟеч валалляз адями психологиез, эшъёссэ шумпоттон понна гожъяз кылбуръёс.

— Шуг-секытъёсыз трос вал, кузпалыз улонысь вазь кошкиз, но Гребин ӝожтӥськыса ӧз ветлы, — пусъе Валентин Тубылов. — «Удмурт кенешын» но шугъяськонъёс кылдыку, лад-лад шуоз вал: ну, давай, малпаськом, югдурысь потыны кыӵе ке амал луыны кулэ…

— Ӝог юрттэт сётӥсь вал со, — итӥське «Удмурт кенеш» огазеяськонлэн секретарез Елена Александрова. — Туж секыт дыръя уд но ӧтиськы, но со шӧдыса сямен вуэ ни. Кин ке сярысь алама малпалляз меда куке? Визьмызлы но вылӥ культураезлы котьку паймылӥ. Туж ӵем тодаз вайылӥз анайзэ. Ассэ пыкылӥз: анаезлы тырмыт саклык ӧз висъя. Берло 15 арзэ Андрей Андреевичлэн вӧзаз ӧй вал ни кузпалыз. Но пиосмурт огназ ке но улӥз, котьку ӝикыт ветлӥз. Али но син азям: кисыысьтыз поттоз вал котьку гладить карем чылк-чылк ныркышетсэ, озьы ик лач-лач бинялтыса, берен поноз.

Нялтас вераса, Андрей Андреевичлэн кузпалыз врач вал, озьы ик мыло-кыдо пыриськиз общественной уже. Соос будэтӥзы кык пиналзэс. Нылзы анаезлэн сюресэзъя мынӥз, эмъясь луиз, пизы атаезъя кариськиз — инженер.

Эшъёсыз тодазы ваё на Андрей Андреевичлэсь юморез яратэмзэ. «Удмурт кенешлэн» аппаратаз ужасьёсты со нуналлы быдэ шумпоттӥз серемес гороскопен.  Праздниклы быдэ  кылбуръёс гожъяз.

— Кылем арын вордӥськем нуналам туж бадӟым стенгазета лэсьтӥз, — маде Елена Александрова, — Сокем тунсыко вал — серекъямысь дугдэммы уг луы ни. Нош мукет нуналаз Кун Кенеше, «Удмурт кенешлэн» офисаз, Эстониысь куноос вуылӥзы. Андрей Андреевич соослы борддорысь газетэз возьматӥз. Эстонъёс но гор-гор серекъяса сылӥзы. Нош кошкон азязы паймыса веразы: ну, тӥляд Госсоветады туж юн демократия…

Андрей Андреевич котьку ӟеч кылъёс шедьтэ вал. Мыным удалтӥз сыӵе адямиен одӥг кабинетын пукыны, солэсь адӟем карыны. Со — школа, со — шуд.

* * *

Андрей Андреевич Гребин вӧзамы ӧвӧл ни. «Удмурт кенешлэн» юбилеезлы сӥзем бадӟым ӧтчаме уз пыриськы ни. Шуо: воштыны луонтэм адямиос ӧвӧл. «Кенешчиос» тодо: сыӵе адямиос вань.

Елена Миннигараева.

Удмурт Дунне
By Удмурт Дунне 7 сентября, 2011 10:27
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<