Сентябрьлэн тодметъёсыз

Удмурт Дунне
By Удмурт Дунне 13 сентября, 2011 10:24

 1-тӥ сентябрьысен партаос сьӧры пуксизы республикаысьтымы 300 сюрслэсь трос школьникъёс но студентъёс. 43 сюрс пала дышетӥсьёс басьтӥськизы соосты визьнодан борды. Кыӵе мылкыдын пиналъёс вамыштӥзы тодон-валан дуннее? Та сярысь журналистъёслы мадиз дышетонъя но наукая министр Андрей Кузнецов.

Таӵе ӟеч мылкыдын выль дышетскон арез кемалась ӧм мытэ ни вал, шуиз Андрей Кузнецов. Лэсьтэмын бадӟым вамыш дышетӥсьлэсь данзэ ӝутон понна — 30 процентлы йылэтэмын солэн уждунэз. Татчыозь республикаысьтымы дышетӥсьёслэн уждунзы шорлыдын 9 сюрс 700 манет лыдъяськиз, луоз 12 сюрс 80 манет. Ужпум пуктэмын: матысь кык ар куспын со республикаямы шоро-куспо уждунозь — 14 сюрс 208 манетозь — вуыны кулэ.

— Президент Александр Волков сюлмаськемен, уждунзы йылоз дышетон удысын вань ужасьёслэн, пӧлазы — нылпи садысь воспитательёс но соослы юрттӥсьёс, школаосысь фельдшеръёс, библиотекарьёс, ватсаса тодон-валан сётон удысын тыршисьёс но мукетъёсыз. Та понна республикамылэн бюджетысьтыз 533 миллион манет висъяны чакламын, — шуиз министр.

Дышетӥсьёс сярысь сюлмаськонлэн нырысетӥ емышъёсыз но соку ик адӟиськыны кутскизы. Школаосы 1-тӥ сентябре нырысьсэ вамыштӥз 255 егит специалист. Дышетонъя но наукая министерство туж оске: соос асьсэды одно шедьтозы дышетон удысын, отчы кема аръёслы кылёзы.

— Уката но бадӟым саклык висъяське гурт школаосысь дышетӥсьёслы, — пусйиз А. Кузнецов. — Али но, выль дасяськись законъя но соослэсь улон инты понна тыриськонъёссэс кун ас вылаз басьтэ. Со сяна, тужгес адӟем карымон но егит специалистъёслы уждунзы борды муниципалитетъёслэн ватсаса коньдон сётыны луонлыкъёссы вань. Республикаысьтымы тросаз ёросъёсын егит специалистъёслы 6 сюрсысен 10 сюрс манетозь подъёмной сёто. Кытын но отын висъяське улон инты но.

 

* * *

Шаерысьтымы 1 сюрслэсь ятыр нылпиос дышетскон арез мытӥзы ӵыжак-выль классъёсын. Школаос усьтэмын Алнаш ёросысь Чемошур-Куюкын, Балезино ёросысь  Быдыпиын, Эгра ёросысь Меньйылын, Сюмси ёросысь Пижилын, Кияса черкогуртын, паськытатэмын Сьӧлта шор ёзо школа. Со сяна, 2 школа тыро-пыдо тупатъямын — Пичи Пурга ёросысь Пугачёвоын но Кизнер каргуртын.

— Берлоосыз чик уг висъясько выль ӝутэмъёслэсь, — пусйиз дышетонъя но наукая министр. — Отысь ӧсъёсты усьтыку ик, шӧдӥське, макем ӟеч соос тупатъямын.

Табере Президент А. Волков куре: али ужась школаосты синчеберез кадь утьыса возёно, луэмезъя соосты тупатъяно-выльдоно. Озьы Ижысь 7 школаын туэ гужем вылтӥ воштэмын укноос, липетъёс.

Шаерамы кылемын на пулэсь 11 школа. Но пӧлысьтызы огез но, пе, уг лыдъяськы куашкан калэ вуэмен. Выль дышетскон ар кутскон азьын ваньзы ик басьтӥзы кулэ документъёс, Роспотребнадзорысь специалистъёс но тылпу кысӥсьёс соослы бакель сётӥзы. Бен, отысь дышетскон условиос уг тупало ни туала куронъёслы. Тае республикаысьтымы кивалтӥсьёс уг вунэто. Соин ик чакламын: матысь кык-куинь ар куспын пу школаос интые пуксьыны кулэ выльёсыз.

 

* * *

Дышетон удыслы арысь аре тросгес коньдон висъяське Россилэн но, республикамылэн но бюджетъёсысьтызы.

— Тросэзлэн верамез потэ: нылпиосты дышетон азьланьын туж зол шӧдӥськоз анай-атайёслэн кисыоссы вылын. Та туж бадӟым йыромон, — пусйиз А. Кузнецов. — Вань кун гарантиос, соя визь-нод дунтэк луыны кулэ — та гожтэмын законын. Выль дасяськисяз но та ласянь воштӥськонъёс ӧвӧл.

Со сяна, улонэ пыӵась выль стандартъёс возьмато ни — кун ас вылаз троссэ басьтыны пумит уг кариськы, кылсярысь, дышетскон пособиослэсь дунзэс. Озьы шаерысьтымы туэ 1-тӥ классэ вамыштэмъёслы учебникъёс басьтонлы кун кисыысь 12 миллион манет висъямын.

— Удмурт кылъя букварьёс но прописьёс озьы ик выль стандартъёсъя тупатэмын но вуттэмын школаосы, — ватсаз дышетонъя но наукая министр. — Со сяна, 3 миллион манет тыр выльдэмын школа библиотекаослэн фондъёссы — отысь учебникъёс дунтэк сётӥсько ёрмыса улӥсь семьяосысь нылпиослы.

Андрей Кузнецов верамъя, шаерысьтымы школаос ушъяськыны быгато нылпиосты сюдонэн но. Школьникъёс пӧлысь 91,2 процентэз нуназезэ пӧсь сиёнэн кӧтсэ тыре, Россиын та лыдпус 78,7 процент котыр возиське. Со сяна, 75 сюрс нылпиос — 1-тӥ-5-тӥ классъёсын дышетскисьёс — ӵукнаоссэ дунтэк сисько. Таӵеез ӧвӧл Россиысь одӥг улосвылын но.

Берло кык ар куспын республикаысьтымы 302 школаын тупатъямын столовойёс, выльдэмын отысь пӧраськон тӥрлык. Ужало ни кык огъя (базовой) столовойёс — Вотка но Глазов городъёсын. Отын 19 сюрс школьниклы тырмымон сиён пӧрало. Дасясько таӵе ик столовой Ижын усьтыны.

— Школа автобус сярысь вератэк кельтэм уг поты, — ватса министр. — Туннэ усьтэмын ни 516 маршрут, 10 сюрслэсь ятыр нылпиос дышетскыны вортто питранъёс вылын.

Элина КУМАЧЁВА.

Удмурт Дунне
By Удмурт Дунне 13 сентября, 2011 10:24
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<