Песянаелэн басмаосыз

Удмурт Дунне
By Удмурт Дунне 7 сентября, 2011 10:30

Песянаелэн басмаосыз

 Кызьы гинэ уг кильтыръясько та нылъёс! Чыртыязы ошо весьёс, чиньыосазы зундэсъёс быртто. Но малы ке туж ӧжытэз тодаз вае кышетэз.

Анае ужа библиотекаын, соин ик мон отчы туж ӵем ветлӥсько, книгаосын, журналъёсын бугыръяськисько. Одӥгысьтыз адӟи, кызьы пӧртэм сямен йыре но, чыртые но керттыны луэ кышетэз. Анаелы возьматӥ, со мыным вераз:

— Песянаед туж яратэ вал басма (ми палан озьы шуо кышетэз) нуллыны. Кыӵеез но ӧй вал солэн сандыказ!

Тӥни озьы журнал бордысен кутскиз песянае Лидия Александровна Столбова сярысь вераськонмы. Со вордскем Сьӧлта ёросысь Шактапи (Большой Чибирь) гуртын. Пичиысен сирота кылем, сюрмумиен будэм. Начальной школаез йылпумъям Кионгуртын, собере дышетскем на Вуж Мӧньялан. Дышетскем умой, туж яратэ вылэм математикаез, лыдӟиськыны дырыз тырмылымтэ. Угось 12 арескын со ужаны потэм ини. Нош 18 аресэз тырмем гинэ, сюранаез сое валэ пуктэм но Иткул гуртэ Николай Столбов сирота пилы кузпаллы нуэм. Озьы пинал ныл ноку адӟылымтэ муртлы бызёно луэм.

Песянаеным песятае пересьмытозязы лулысь-сюлмысь улӥзы, куать нылпи будэтӥзы. Пинал дыръязы дӥськут умой-умой ӧз шедьылы, соин-а, мар-а песянае туж яратэ вылэм басма басьяны. Вылэм солэн одӥг сямыз: кытчы гинэ уг мыны, одно ик басьтэ кышет. Кылем даурысь 70-тӥ аръёсы сьӧд вылын бадӟым горд сяськаосын кышетъёслы мода кылдэм. Но гуртын соосты ӧз вузаллялэ. Артысь гуртысь Ловкин кузпалъёслэн ӵыжы-выжыоссы Москваын уло вылэм. Маша апайлэсь но Петя агайлэсь Москвае куное дасяськемзэс тодэм но кышет басьтыны туж курем. Озьы песянае гуртын нырысь ик розаосын кышет нуллыны кутскем. Сьӧдэз бере кылдӥллям на ӵужез, вожез, лызэз. Туж кема утчам коньысирзэ. Басьтэмез бӧрсьы капчияк шокчем: «Табере котькыӵеез басмае вань!»

Песянаелэн ньыль нылыз, трос внучкаосыз. Ваньзы ик соос синпельлы возё солэсь кышетъёссэ. Угось вордскемзы бере ик ӵужанае кузьмаллям соосты. Вылэм йылолэз: котькуд нылызлы бызьыкуз пельпумаз понылэм чебер сяськаосын туго шаль, йыраз керттылэм кышет.

Ӵужанае кулэм бере сандыкысьтыз кышетъёссэ люкылӥзы нылъёсызлы, внучкаосызлы, матысь адямиосызлы  — озьы соос али котькуд семьяын сямен вань. Анае но Оксана апае туж ӵем учкыло соосты, тодазы ваё: тазэ 8-тӥ Мартлы кузьмаз вал, тазэ — вордскем нуналам, вожзэ нош, Выль аре вуылыкуз, вайиз… Тани та тӧдьызэ керттылӥз турнаны, таиныз ужаны ветлӥз, нош таосыз куное ветлонъёсыз…

Выжыысьтымы вань нылкышноос ярато кышет нуллыны. Чеберъяськон арбери гинэ ӧвӧл ни со, выжымес герӟась синпелет.

Стас Емельянов.

Сьӧлта ёрос,

 Югдон школа.

Удмурт Дунне
By Удмурт Дунне 7 сентября, 2011 10:30