Ог-огдылэсь кужымдэс эн мерталэ!

Удмурт Дунне
By Удмурт Дунне 9 сентября, 2011 09:56

Ог-огдылэсь кужымдэс  эн мерталэ!

Адвокат.

Юрий Михайлович Никитинэз Пичи Пурга ёросын улӥсьёс пӧлын тодӥсьтэмез ӧвӧл, дыр. Малы ке шуоно та йӧно воргорон доры шуге-леке шедем адямиос уно пӧртэм юанъёсын вазиськыло. Солэн юрттэмезлы оско. Юрий Михайлович — адвокат, озьы ик Пичи Пурга муниципал кылдытэтлэн депутатэз.

 — Юрий Михайлович, гуртын будэм пиосъёс трактор-машина борды бурмо. Нош тӥ тодон-валан дуннее кыстӥськиллямды. Кинлэсь адӟем кариды?

— Мемее но, тятяе но огшоры ужасьёс вал. Кыкназы но соос Пичи Пурга ёросысь: мемеелэн ныл йырыз Чёкалысь вал, нош тятяе Арланын вордскемын. Со милям Быдӟым оже ветлэмын. Егитъёс кузпалъяськиллям но улыны выжиллям Татариысь Огырчи городэ. Ужаны интыяськиллям чугун сюрес вылэ. Бӧрысь мемее выж миськем, нош тятяе вагонъёсты тупатъясь луэм.  Ньыльдон арлэсь кема тыршизы. Куинь пинал вордӥзы. Мынэсьтым бадӟым Слава агае но Рита сузэре вань на. Жаляса верано, мемеен тятя та улонысь вазь кошкизы. Ужзы секыт вал, соин но, дыр. Пичи дырысеным Слава агаелэсь адӟем карыса будӥ. Со школаын умой дышетскиз..

Спортэн эшъяськи. Огырчиысь школаез йылпумъяса, дышетскыны пыри Удмурт кун университетысь  спортфаке. Ар гинэ тодон-валан люкаса вуи но, армие басьтӥзы. Службае ортчиз Уралын но Казахстанын, сержант вал. Доре бертыса, дышетсконме азинтэме потӥз. Университетысь  физкультураен дышетӥсь луыса потӥ. Ой, кыӵе шулдыр ортчизы дышетскон аръёсмы. Ми Герман Скурыгинэн одӥг комнатаын улӥмы. Бӧрысь со дуннелэн ӝог ветлонъя чемпионэз луиз. Жаляса верано, Германлы асьмемын артэ улыны кема кылдымтэ. Валерий Медведцевен ыбылӥськыны ӵош ветлылӥмы. Валера биатлонъя Олимпийской чемпион луиз.

— Эшъёсты сямен, тӥ улондэс спортлы сӥзиллямтэды.

— Университет бере монэ  ужаны келязы Сарапул ёросысь Уральской шор ёзо школае. Коллектив борды туж чаляк дыши. Нылпиосын но соку ик кылмы тупаз. Урокъёс бере соосын пӧртэм ӵошатсконъёс, шудонъёс, бызьылонъёс ортчытъямы. Соос монэн эшенызы кадь асьсэды возьылӥзы.

— Тӥледлы егитысен оскизы кивалтон удысэз нуыны.

— Озьы. Со школаын мон ар гинэ ужаса вуттӥ. Одӥг нуналэ Сарапул роноысь специалистъёс лыктӥзы но вань дышетӥсьёсты педсоветэ люказы. Мыным, егит муртлы, со ёросысь Шадриноысь тямыс классъем школаын ужаны ӵектӥзы. Мон соку ас поннам малпай: иське, таослы мынам дышетэме уг кельшы яке нылпиослы уг яраськы, дыр. Янгышаськем. Монэ школалы кивалтӥсе пуктыны малпаллям. Ӧй пумитъяськы. Кышкасьёс пӧлысь ӧвӧл ук мон, косӥзы, мынӥ, ужай. Отын ик вуоно кузпалыным, Сарапул ёросысь Мостовой гуртын вордскем нылашен, тодматски.

— Котькытчы адями улыны мед интыяськоз, но вордскем палъёс одно ик асьсэ пала кыско.

— Анай-атайлы матэгес кариськеме потӥз. Мемее но ялан дор пала берты вал, шуылӥз. Мар, пе, мурт дуннеын улӥськод. Пичи Пургаысь роное мынӥ но, мыным  нош директор луыны ӵектӥзы. Таяз радэ Уромысь шор ёзо школае келязы. Август толэзе мон отын кивалтӥсь интыын пукисько вал ини.

— Татын но ӟеч тыршемдэс синйылтӥллям. Тӥледлы общеобразовательной школаысь вылӥ категориен кивалтӥсь ним сётӥллям.

— Уром школаен мон куать ар пала кивалтӥ. Ужын котькыӵе шуг-секытъёс но вормонъёс, улӥе лэзьконъёс но вылӥе ӝутсконъёс вал. Капчи ӧвӧл ук нылпиосын ужаны. Вылаз ик, бадӟым коллектив ке тыбыр сьӧрад вань на.

— Но малы ке но школаын кема возиськиллямтэды. Нылпиосын ужаны акыльтӥз шат?

— Улонам мар ке уг тырмы кадь. Ялан тодон-валанме будэтэме потылӥз. Экономикаез валатэк, кызьы кивалтӥсьын ужалод? Мон ужан вискам Удмурт кун университетысь экономикая факультетэ пыри, «Менеджмент и управление производством» специальностья дышетски. Собере Москваын управлениея академиын дышетски. Туж кельшиз мыным отын. Горд дипломен сое йылпумъяй. Отысь юрист луыса потӥ.

— Малы одно ик юристлэсь сюрессэ бырйиды?

— Юристлэсь ужзэ бырйи малы? Мемее но, тятяе но огшоры ужасьёс вал. Соос шоры учкыса но музонъёссэ адӟыса, мон шӧдӥ: огшоры адями пала та улонын нокин дур уг басьты. Мыным соос жаль потылӥзы. Ас кужымелы оскыса, юрист луи.

Пичи Пурга черкогуртын «Баланс» юридической центр усьтӥ. Угось калыкен ужаны мыным кельшиз. Адямиос пӧртэм юанъёсын дорам вазиськыны кутскизы. Озьы ик, юрттэт курыса, вуылӥзы предприятиосын, учреждениосын но колхозъёсын ужасьёс. Соослы валэктон сётыны быгатӥськод ке, ачид бурдъяськиськод. Мон ӝутскем мылкыдын тыршисько. Калык тау карыса кошке.

— Тӥ али но тодон-валандэс будэтӥськоды.

— Россиысь кун службая академилэн аспирантураяз пыри. Дышетсконэ капчи мынэ. Та дыре мон диссертация гожтӥсько. Ӝоген наукая кандидат луо, малпасько.

— Законъёс туж трос. Юристъёс но ваньзэ тодыны уг быгато, дыр?

— Озьы. Та вакытэ милемлы туж  юрттэ Интернет. Тани Пугачёво пуштылонъёсты ик басьтом. Шуге-леке шедем адямиос, юрттэт курыса, пӧртэм юанъёсын дорамы вазиськыло. Но асьмелэн ӧвӧл чакламын соослы тупась, юрттэт сётӥсь законъёсмы.

— Туала арын вань-а дунтэк ужась адвокатъёс?

— Кызьы сотэк. Тани алигес луэм учыр сярысь верало. Вавожысь егит нылаш вазиськиз. Со сирота, ужез ӧвӧл. Судын мон солы юрттӥ. Одӥг копейка но уксёзэ ӧй басьты. Ӵем озьы луэ.

Мон граждан ужъёсын вырисько. Кылсярысь, уждун тыронэн, музъем сётонэн, пунэмъёсты берыктонэн… Уж трос.

— Со понна ик тӥледыз калык гажа. Тӥ сярысь мон тазьы шуысал: одӥг адямилэн быдэс короб визьмыз но нуыны вормонтэм дышетскемез. Тӥ озьы ик политикае но выемын. Ваньмаз вутскыны дырды тырме-а?

— Пичи Пурга ёросысь кенешлэн кык созываз мон депутат вал ини. Отын кыл кутылӥ но чакласа вози законэз тӥясьёсты. Озьы ик кивалтӥсько «Справедливая Россия» партилэн Пичи Пургаысь ёзэныз.

— Тӥледыз егит дыръяды ик депутатэ бырйиллям, шуо. Шонер-а со?

— Таиз но шонер. Уром школаын ужакум, комсомол огазеяськон монэ УАССР-ысь Вылӥ Кенеше депутатэ ӵектӥз. Нырысь-валысь туж кышкай вал. Кызьы  ёросысь райкомлэн нырысетӥ секретареныз Сергей Шартдиновен ваче нюръяськом? Но мон солэсь сюрессэ ӧй ӵогы. Улонын озьы пӧрмиз, кыкнамы ик депутат ныпъетэз нуимы. Берло нош мон Кун Кенешысь М. Васильев депутатлэн юрттӥсез вал.

— Мар ужало кузпалды но нылпиосты? Улмо, пе, улмопуэзлэсь кыдёке уг усьы.

— Кузпалы Ирина Юрьевна ӟуч кыллы но литературалы дышетэ Огырчи школаын. Ӟуч гуртын ке но будэмын, мон сое воксё удмурт кари ини. Верамез гинэ уг луы, ваньзэ вала. Ми соин ныл но пи будэтӥмы. Пиналъёсмы школазэс зарни медален йылпумъязы. Марина Удмурт кун университетысь юридической факультетын дышетскиз, юрист. Станислав но юридической факультетын ик дышетске. Кыкетӥ курсэз йылпумъяз ини. Мон соослэн та сюресэз быръемзылы пумит выри вал. Но мар карод? Мынам ужелы соос синмаськыса будӥллям, лэся, юрист луэмзы потӥз. Алигес семьяямы шумпотон вуиз: дунне вылэ нуныкаймы вордскиз.

— Улонады мар тужгес но сюлэмшугъяськытӥсез вань?

— Егит дырысеным ини удмуртлык монэ сюлэмшугъяськытэ. Асьмеос со сярысь трос вераськиськом. Но ужмы сокем ик ушъяськымон уг мыны. Тани вӧзамы ик бигеръёс уло. Учке ай, кыӵе соос асьсэлэн культуразы понна висё. Ульчаосысь асьсэ кылын гожъямъёсты адӟод. Нош асьмелэн со арысь аре пашме кадь. Туэ пичи пургаос Гырон быдтон праздниксэс ӧз ортчытэ. Пугачёвоысь пуштылонъёсын сэрен, пе. Нош Огырчиын мар вал? Соос но кӧшкемыт улонэз адӟизы ук. Корка липетъёссы но укнооссы куашказы. Но ведь ужась калыксэс данъяны быгатӥзы. Озьы ик Татариысь бигеръёслэн огазеяськонзы Яган посёлокын Сабантуй ортчытӥз, асьмелэсь ужась калыкмес данъяны быгатӥз.

Сюлмаськытэ юнме шорысь адямиез янгыш карон. Адямиез выжылы люкон. Со бордысь пото ваче жугиськонъёс но керетонъёс. Котькудӥзлэн калыклэн музъем вылын улыны правоез вань.

— Адвокатлэн ужез сокем ик капчи ӧвӧл, дыр. Йыруж лэсьтэм адямилы, со янгыш шуыса тодӥськоды ке но, юрттыны тыршиськоды. Ужады кышкатъян учыръёс но луыло, дыр?

— Сыӵе милям ужмы: огезлы юрттӥськом, нош мукетсэ выйтӥськом. Мыным котькуд адями жаль потэ. Со пумысен тани мар шуыны турттӥсько: ог-огдылэсь кужымдэс мертаса, эн улэ, уждэс судозь эн вуттэ, тупаны тыршелэ.

Кышкатъянъёс сярысь ке, соос вазен ӵемгес луо вал. Но ми солы дышемын. Кышкатэ  ляб, вормыны быгатӥсьтэм адями.

Любовь Тихонова.

Удмурт Дунне
By Удмурт Дунне 9 сентября, 2011 09:56