Огдырлы луиз пыраклы

Удмурт Дунне
By Удмурт Дунне 9 сентября, 2011 10:04

Огдырлы  луиз пыраклы

Н. Сурнина.

Стажировка амаллы синмаськизы Вотка ёросысь «Завод РТО» предприятиын. 2009-тӥ арысен татын аслэсьтыз нырысетӥ вамышъёссэ лэсьтӥз, шуыны луоз, 36 мурт. Пӧлысьтызы куатез  татчы ужаны кылиз.

Заводысь  ужъя но уждунъя отделэн кивалтӥсь Любовь Белоногова дышетскисьёсыныз ушъяське:

— Сыӵе шумпотӥськом, дорамы усто специалистъёс вуэмысь. Мон пумен аслым воштӥсь учкылӥсько ни, — пальпотэ со. — Стажировкае вуэм нылъёс туж визьмоесь, сюлмоесь, вань ужез пыр-поч, валаса лэсьто. Ми соосты асьме отделэ ужаны кельтӥм, нокытчы но ӧм сётэ. Ойдолэ, одно ик тодматэме потэ, — ӧте  кивалтӥсь милемыз  отделэ.

Любовь Михайловнаен ӵош ортчиськом кабинетъёстӥ. Отын наставникъёссы индылэм улсын тыршо егит нылъёс. Данакез соос вылӥ образованиен, йылпумъямын ИжГТУ-лэсь Воткинскысь филиалзэ. Евгения Вострокнутова  университетэз йылпумъямез бере соку ик вазиськиз уже интыянъя центре. Нылмуртлы ӵектӥзы стажировка амалъя заводын быгатонлык люканы. Бордаз визьнодасе юнматӥзы Светлана Замкееваез, со татын 25 ар тырше ни.

Светлана  Анатольевна вера:

— Егитъёсты дышетон — бадӟым кыл кутон, малы ке шуоно тынад визьнодамед бордысь потоз азьланяз соослэн  уж шоры учконзы, быгатонлыксы. Институтъёсын-университетъёсын  ужлэсь теоризэ гинэ валэкто ук, огъя тодон-валан сёто, нош татын «емыш» поттоно ни. Дышетскисьёсы понна гордэктоно медаз луы, соос но мынэсьтым  пайда мед басьтозы.

Вуоно программистъёс.

Кабинетэ кожиз мукетыз, Женя, таиз  нылмурт — ужез нормировать каронъя валтӥсь инженер. Евгения Азябина, озьы ик ИжГТУ-эз йылпумъяса, татын стажировказэ ортчиз 2010-тӥ арын. Огдырлы лыктэм нылаш кельшиз кивалтӥсьёслы,  солы ялан ужан инты ӵектӥзы. Табере Евгения ӟеч должностьын,  коллективын сое гажало. Зэм, со понна Евгениялы выль удыслы дышетсконо луиз, угось дипломезъя со экономист, нош нормированиея инженеръёсты нокытын но нимысьтыз уг дасяло. Но шаплы муртэ со ӧз кышкаты, выль тодон-валан басьтон борды ӝыбыр-ӝабыр басьтӥськиз, табере ачиз экономистъёсты индылэ ни. Евгениялэн нокытчы кошкемез уг поты,  азьпал улонзэ со та предприятиен герӟа.

— Коллектив татын туж ӟеч, шулдыр улӥськом. Али тани турслётлы дасяськиськом, — маде егит специалист.

Мукетызлы нылмуртлы, Светлана Огореловалы, ужан инты кылдытыны луиз инвалидъёслы юрттон программая. Заводын, нимысьтыз Светланалы шуыса, ватсаса бухгалтерлэсь ставказэ усьтӥзы. Нылмурт та предприятие нырысьсэ ӧз вуы, вазенгес татын ортчиз курсовой но дипломной практикаоссэ. ИжГТУ-лэн горд дипломеныз специалист шедьтысал, вылды, бадӟымгес уждунэн инты, но татын солы туж кельше, вылаз ик, будыны луонлыкъёс вань.

Надежда Сурнина стажировкае лыктӥз Воткинскысь  машиностроительной техникум бере. Ольга Максимова кивалтэм улсын со дышетскиз  техник-технологлэсь ужзэ быдэсъяны. Ужез сыӵе кельшиз, малпаз та специальностья вылӥ тодон-валан басьтыны, табере университетын дышетске.

Ольга Порошина — программист, туж потэ 1С программаез ӟеч тодэмез.

— Куд-огез эшъёсмы шуо, малы  пичи уждун вылэ мыныны соглаш кариськиськоды. Нош асьсэос, токма тӧл ӵыжаса, ветло яке чылкак мукет удысэ кошко. Ми лыдъяськом, тыршытэк соку ик номыр уз луы. Ваньмызлы офисъёсын шуныт инты дасямын ӧвӧл ук, аслыд пӧсятэк уг луы. Нырысь дышетсконо, астэ возьматоно, собере ини ваньмыз лыктоз. Институтын дышетскыкуд, аслыд визьмо, котьмае валась-быгатӥсь потӥськод ни, нош улондэ радъяны кутскиськод ке — ыштӥськоно, соин ик та программа ужан сюрессэс мытӥсьёс понна ӟеч юрттэт луэ.

Удмурт Дунне
By Удмурт Дунне 9 сентября, 2011 10:04
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<