Ноку адӟылымтэ спортзал

Удмурт Дунне
By Удмурт Дунне 2 сентября, 2011 13:17

 Алнаш ёросысь дышетон удыслы туэ бюджетын висъямын 211 миллион манет. 2010-тӥ арын солэн быдӟалаез вал 206 миллион манет. Дышетӥсьёс уждунзы вылэ ӝожтӥськыны кулэ ӧвӧл — ваньмыз дыраз тыремын. Со сяна, методической пособиослы быдтэм коньдонзы но берыктэмын. Коммунальной услугаос понна гинэ тани администрация 860 сюрс  манет тыр пунэме кылемын. Ваньмыз школаос нылпиосты пумитаны дасесь, шуыны луоз. Зэм, куд-огаз липетсы вияло ай: Писэйгуртын, Ӟатчалан но Котнырын. Нырысетӥяз пасез кышъян ужъёс мытэмын ни ке, берло кыкеныз мар карыны воксё ӟудо — коньдон ӧвӧл. Тазьы шуиз кылем арняе районысь дышетӥсьёслэн ортчем конференциязы Алнаш ёрослэн йырыз Сергей Токарев.

Со дыре ик Ӟатчалась школае нулло Тыло гуртысь 10-тӥ-11-тӥ классэ ветлӥсь нылпиосты. Таос туж зол вожъясько покчи эшъёссылы. Тылоын огъя тодон-валан сётонъя (9 классъем) выль школа ӝутӥзы уго. Анай-атайёс но куанэмын. Азьвыл школазы уго 1929-тӥ арын пуктэмын вал. Тылоос ноку ӧз адӟылэ спортзалэз — стадионын толэн-гужемен бызьылӥзы. Табере тани выль юрт ӝужаз. Нылпи садэн огазеямын со. Гуртазы нылпи садзы но колхоз столовой интыын гинэ вал уго.

Пусйытэк ӧвӧл созэ но. Тыло школаын дышетско на Кузьымгуртысь пиналъёс. Туэ соос 48 кузя люкаськемын — тылоослэсь но тросгес, ява. Котьма ке но берлоосыз оско: выль школа ванен нылпиосмы йылозы ай. Ма, Тыло гуртсы но сюрес дурын сылэ, Ӟатча санаторийлы матын. Оло, ӵапак соин сэрен но гуртоос вожмаськыса кадь али пуктӥсько. Тае адӟыса ик, лэся, толон выль школаез усьтыны лыктэм Президент Александр Волков шуиз:

— Гуртты паськыта. Егитъёсты ёросэ кельтон понна сюлмаськоно. Ёросын 5 но ӝыны сюрс килограммлэсь трос йӧл кыскыны ӧдъяды ке, район центрады бассейн  лэсьтом.

Нялтас вераса, алнашъёс 5 сюрс килограмм 200 граммлэсь уногес йӧл кыско ни.

Ёросын 2 сюрс 895 дышетскись. Таос пӧлысь 191-ез туэ дышетсконзэ йылпумъяз «витьлы», 1 сюрс 184-ез — «ньыльлы». Уг тырмо математикаен, физикаен но химиен дышетӥсьёссы. Но районын матысь дыре ӝутыны ӧдъяло эшшо кык школа: Шайтангуртын но Сям-Каксиын. Кин тодэ, выль, югыт юртлы синмаськыса, оло, татчы кыстӥськозы егитъёс, ӝутозы ёроссэс.

Елена Фёдорова.

Удмурт Дунне
By Удмурт Дунне 2 сентября, 2011 13:17
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<