Мӧйымон — ӝожтӥськон ӧвӧл!

Удмурт Дунне
By Удмурт Дунне 30 сентября, 2011 09:58

Мӧйымон —  ӝожтӥськон ӧвӧл!

Пичи Пурга ёросысь Шор Кечолысь Александр Золотарёв война вакытъёс пыр потэмын. Адӟемын улонлэсь курытсэ но, кузьытсэ но. Но задорезлы, улонэз яратонэзлы куд-огез вожъяськыны но быгатоз. Кытысь сомында кужымез-мылкыдыз?

Пичи дыры ортчиз Киров улосысь Зуевской ёросысь Слудка гуртын. Атайме, покчи классъёсын дышетӥсез, 1939-тӥ арын отчы ужаны келязы. Гурт сокем бадӟым ӧй вал, школаын кык гинэ дышетӥсь ужаз. Со вакытэ семьямы начар ӧз улы, пе.

Но вань законъёсъя мон вордскемын вал кулыны.  1941-тӥ арын августэ атаймес войнае басьто. Анае кык нылпиен, выны вал на, номыртэк  кыле. Атаймы гожтэтъёс солы ысъяз, куриз: мармы вань — вуза, но нылпиосты уть! Но гурт калыклэн коньдонэз ӧвӧл — мар басьтыны со быгатоз? Анаймес колхозын кладовщике юнматӥзы — со ик милемыз утиз. Колхоз складъёсысь номыр поттаны ӧз лэзьылэ, туж чаклазы. Соин ик анаймы пичи гинэ пуйы вуриз. Ю тысез отчы тырыса, кук висказ поттаз. Лушкем интыосы всё-таки ӧз учкылэ, лэся. Озьы улэп кельтӥз со милемыз. Али нылпиосылы, внукъёсылы верасько но, соос шуо: иське, дедуш, тӥ лушкаськиськоды вал? Кыӵе татын мораль! Мынам огъёзъёсы сютэмысь тӧрнаса кулылӥзы. Ой, мар вал! Нош Ленинградын мар вал!

 

Атаймы войнаысь берытскем бере семьязэ вордскем палъёсаз нуэмез потӥз — Киров улосысь ик Уни ёросысь Улӥ Сибире. Вань отын Вылӥ Сибирь, Астрахань гуртъёс. Интернетэз учке ай — отысь соос сярысь лыдӟылӥсько. Тапалан удмуртъёс трос уло.

Татчы вуим ни бер сӥзьыл. Мон 7 классэз йылпумъям маке. Мар кароно егит пияшлы? Уйбыт шудӥсько вал картаен, нош нуназезэ кут кутасько. Но дышетскыны кулэ. Ялан уйбыртӥсько вал: геолог луэме потэ, луо геолог… Вот шузи маке! Воркутаысь техникуме пырыны малпай ук. Ярано, документъёслэсь копизэс гинэ отчы ыстӥ — таизлы коть визьмы тырмем на. Ӧтён вуиз: лыктэ, пе, дышетскыны. Мыноно, нош коньдон ӧвӧл.

Атай шуиз: Глазовысь техникуме мын. Отын куинь специальностьлы дышето: агрономлы, механиклы но землемерлы. Кин со сыӵе агроном — нокин уг тоды. Механик — со сыӵе ик тракторист, шуэ атае, учкы ай, соос котьку но кырсь ветло! Мын, пе, землемере, таоссэ колхозъёстӥ валъёсын нулло. Эсьма, дэри уд кола. Сюрес вылэ потӥ пыдын. Мынӥсько, юасько кытчы мыныны. Уни, Ежгурт пыр потӥсько. Пышкетын уез ортчытӥ. Нош вамышъясько… Адӟиськиз Глазов. Экзаменъёсты сётӥ — нош ик дор пала пыдын. Дышетскыны — нош пыдын. Пырак Ломоносов кадь, ява. Ньыль ар дышетски. Землемер, геодезист, топограф луи.

Дышетскыны пыри 1949-тӥ арын. Дышетскисьёс пӧлысь ӝыныез кутэн ветлэ на вал. Мон но соос пӧлын ик. Стипендия нырысетӥ араз 140 манет вал, собере 160, 180 манет каризы. Туж умой тодӥсько на: 1 килограммез нянь 3 манет сылӥз. Кӧтмес тырылӥм нянен, килька чорыген но киселен. Мукетызлы уксёмы ӧз тырмылы. Но дунъёс арлы быдэ пичиесьгес луо вал. Эх, сыӵе вакытъёсы быдэс  мугор  юзыр-кезьыр луылӥз. Валаськоды-а: ӟечезлы осконмы туж бадӟым вал, калыклэн котьма борды басьтӥськыны мылкыдыз вал. Али но со аръёсты тодам вайыкум, пушкын маиз ке но югак луэ кадь.

 

Техникум бере направлениея лэзизы Пичи Пурга ёросысь Кечол МТС-э. Политика вал сыӵе: городысь гуртэ соку туж трос специалистъёсты ыстылӥзы. Землемерлы МТС-ын воксё номыр ужаны вал — однако косӥзы мыныны. Выны кузпалъяськиз. Солэн сюаназ ветлӥ. Быдэс арнялы ышылӥ. МТС-э берен вуисько, юасько: монэ ыштӥсь вал-а? Нокин но ӧз утча, пе. Э-эх, тӥни сыӵеесь ми, землемеръёс, кулэтэм адямиос вал. Мар карыны ми кулэ вал? Музъемъёсты мертаны. Нош соосты одӥг пол ортчиськод — тырме, нокытчы уг пегӟо, интыязы кылё.

Кечолысь кошки армие, собере кӧня ке ужай Вотка ёросысь Бадӟым Киварын, бӧрысь интыяськи Иже, Удмурт землеустроительной экспедицие. Командировкаостӥ ветлӥ. Уже вал: картаос лэсьтоно. 3 райцентрлэсь — Шарканлэсь, Пичи Пургалэсь, Алнашлэсь — картаоссэс дасяй. Соосъя ини архитекторъёс генеральной планъёс кылдытъязы. Мон соку семьяё маке вал ни. Кышное но сьӧрам юрттӥськыса ветлылӥз. Топограф — туж ӟеч специальность — ужад нокин уг мерскы. Картаос лэсьтыны быгатӥсьёс трос ӧвӧл ук.

 

Александр Андреевичен тодматскемзэс тодаз вае Тамара кузпалыз:

— Мон пинал маке, чугун сюрес вылэ ужаны кариськи. Колхозын уксё уг тыро вал, нош татын нырысь уждунэ ик 70 манет луиз. Гуртысьтымы мӧйыгес нылкышноен Огырчие басьяськыны ветлӥм. Бертӥськом ини. Вагонын шал-шал буш. Пыре вож фуфайкаен, вож чемоданэн пияш. Ми, солэсь кышкаса, куалекъясь луим, «шпана, дыр, та» — ас поннамы удмурт сямен лушкем вераськиськом. Со удмуртэз вала шуыса, ум тодӥське вал ук. Вӧзамы ик пуксиз. «Куда поехал?» — дӥсьтыса но дӥсьтытэк юа солэсь эше. Кечолэ, пе. Ох, эшшо куалектӥм ук, кызьы талэсь пегӟом на? Станцие вуыса, «шпанамы» удмурт сямен юаз, кытын, пе, татын МТС. Улон инты но бон сётӥллям солы — ми гуртэ ик, пересьёс доры. Ӵошеннамес адӟыса, куд-ог гуртоос серекъяло вал: ма, Тамара, туганэд горд, лэся, ук?

Веранзэ азьланьтэ Александр Андреевич:

— Ма, мон егит дыръям пиш-пиш горд вал. Ачим но сыӵеелэсь возьдаськылӥ. Али горд нылъёсы шоры учкисько но, туж мусоесь пото.

Со понна гуртын мон гармонист вал, велосипедэ но огнамлэн гинэ — гуртоос сокем куанер улӥзы соку. Нош Тамара монэ ачиз сьӧлтаз. Ижын ужакум ни, землеустроительной экспедициысь монэ нош ик Кечолэ ысъязы. Мон, конешно, ӝытсэ клубе потӥ. Отын нылъёс… Туж трос. Но клубе пыри гинэ, шӧдӥсько ни: Тамара шорам, синъёссэ вошъятэк, учке. Таӵе дыръя куд-ог воргоронъёс ушъяськозы: нылмуртэ ки вылам ӝутӥ но аслым кари. Эх, мон озьы вераны уг быгатӥськы. Ачим чыныр-чоныр гинэ, Нош Тамара — таза мугоро, кужмо. Глазовысь техникумын нырысетӥ сессиын вань экзаменъёсты «витьлы» огнам сётӥськем. Бадӟыматэм стипендия, пе, тыроно талы, шуылӥзы. Но физкультураен огнамлэн «кык». Ӝуткаськыны но, тэтчаны но уг пӧрмытӥськы — сокем лябӟемын, ӟызы.

Ӝытъёсы ньыль кузя поръяськом вал: мон, Тамара но эшъёсыз. Одӥгез киме кутылэ, мукетыз синмыныз кырмышъя… Мон не пользовался этим! Али юало: Андреич, кӧня нунокъёсыд ни? Дас ньыль, шуисько. Ужас, пе! Ужас ӧвӧл со, шумпотон. Вить пинал будэтӥм, куинез ик пиосмы гуртамы уло, нылъёсмы быземын палэнэ. Асьсэлэн семьяоссы. Шумпотто гинэ.

 

Топографын ужасько вал, командировкаосы арняосын потано луылӥз. Нош гуртын кышно егит — бордаз гинэ улэм потэ. Со мынам туж чебер вал — модель! Озьы, ӵошен улыкумы ни, Сигаевоысь техникуме агрономе дышетскыны пыри.

Ой, аслам кужымелы оскисьтэм вал мон! Визьме тодӥсько ке но, со — ерунда. Но Инмар озьы сётэм: адямиосын вераськыны, соосты оскытыны быгатӥсько. Ӵош дышетскись эшъёсы шуо вал: дышетӥсьлэсь верамзэ ум валаське, вот Золотарёв темаез валэктӥз ке, одно валалом! Озьы пумен аслым осконэ кужмояз. Дӥсьтӥ гурт хозяйствоя институтэ пырыны. Огдыре заочно амалэн дышетски Сигаевоын но, Ижын но. Пыри на вал Пермь институтысь аспирантурае, но Остап Бендер шуэмъя, Монте Кристо граф мынэсьтым ӧз пӧрмы.

Химияя экзаменъёсты али но тодам вайисько. Пӧлысьтымы одӥгез пияш преподаватель доры потӥз. Кылзӥськисько, мар юаллясько солэсь. Дышетӥсь юа: кытын кутӥське натрий хлор? Атомной бомбаос лэсьтонын, пе. Та бӧрсьы мон преподаватель доры потӥ. Мынэсьтым но юало: кытын кутӥське натрий хлор? Кубиста сылалтонын, шуисько. Больше номыр ӧз юа ни, «ньыль» пуктӥз но лэзиз. Серекъяса верасько ке но, зэмзэ ик, вакытъёс сыӵе вал: адямиосты дышетыны выризы.

Сельхозын диплом басьтэмелэсь азьло ик Кечолын  агрономын ужаны кутски ни. Нырысь огшоры агроном вал, собере валтӥсь агроном луи. Экономистлэсь ужзэ но оскылӥзы. Улысь Кечолын бригадаен кивалтӥ, сельсоветын председатель вал, берлоез должносте — парткомлэн секретарез. Пенсие кошки 1991-тӥ арын.

 

Улысь Кечолэ бригадире пуктӥзы, валтӥсь агрономын ужакум ик. Предмы туж куриз: нокинэ, пе, бригадае келяны. Вунонтэм кылиз 1975-тӥ ар. Быдэс гужем ӧз зоры соку. Уг ужаськы ни бере, югдурез кылем арынэн ӵошатыны уг быгатӥськы. Нош соку партилэн центральной комитетэз нимысьтыз постановление но поттӥз: калыкез, пе, буйгатоно, странамы чидалоз шуыса. Районамы ю тысь гектарысьтыз 10 центнер люкаськиз, колхозамы — озьы ик. Нош Улысь Кечол бригадаямы — 20 центнер. Озьы быгатӥм! Со понна гадь бордам бырттӥзы ВДНХ-лэсь медальзэ. Кыӵе данъян пусъёсы вань на? РСФСР-ысь Верховной Советлэн президиумезлэн Почётной грамотаезлы луыса Ужысь ветеран луыны быгатӥ.

Сельсоветэн кивалтӥсько вал — покчи классъёслы школаос соку гурт кенешъёслэн бурд улазы лыдъяськизы. Дышетскон арлы соосты дасяно — роноын шуо: уксё ӧвӧл. Сельсоветлэсь кисызэ куръям, школаосты ас кужыменымы буяно, тупатъяно!  Пытсэт сьӧры та понна уз пуктэ, шуи, асьмелы со коньдонэз ум басьтӥське ук. 1-тӥ сентябрь азьын комиссия вуиз, тазьы ужаны кулэ, шуизы, молодцы, пе. Премия но висъязы на ай.

Трос гожъяськылӥ ёросын печатласькись «Маяк» газетэ, внештатной корреспондент вал отын. Парткомын ужакум ни, Кечейылысь ӝожтӥськон вуиз: гуртысь кӧня ке семьяос, огазе кариськыса, быдэс уй изьыны ӧз сётэ, пе, гармошкаен шудӥзы, кырӟазы… Монэ косӥзы: мын ай, пе, ветлы, эскеры югдурез. Ветлӥ.  Одӥгаз семьяын укмыс пинал, мукетаз — сизьым, куинетӥез но трос нылпиё семья. «Маяке» пӧрай заметка — «Кылдыты аслыд праздник». Кызьы корреспондент югдурез адӟоз-возьматоз — та бордысь туж тросэз потэ ук. Та гожтэме бере тросаз гуртъёсын таӵе шулдыръяськонъёс ортчыны кутскизы, секыт ужам бере калык озьы шутэтскылӥз.

 

Мар каро гуртысь песянай-песятайёс? Гуртамы пенсие потэмъёс 80 пала. Тросэз — нылкышноос, но одӥг-ог вань ик дедушъёс но. Шулдыръяськонъёсы потаны соос дышемын ӧвӧл. Арлы огпол люкаськылӥськом ик ке но, ӝыныез сяна уг лыкто. Гурт котырын уж тачак, шуо. Туэ гужем Пичи Пургалан Гурт шудонъёс ортчизы. Милесьтым куризы: горшокын будӥсь сяськаос люкано. Бӧрысь тодӥ: котькуд гуртлы сыӵе курон вуэм. Шор Кечолысьтымы пенсионеръёс  котькинлэсь трос соосты люказы — 100 модос пала.

Туж яратӥсько лыдӟиськыны. Тае тодыса, вордскем нуналъёсам мар кузьман сярысь йырзэс уг тӥяло — книга сёто но тӥни. Мон туж шумпотӥсько! Кылбуръёсты часъёсын вераны быгатӥсько. Районын ортчись «Устоез песятай» конкурсэ пыриськи. Кылбуръёсты ӟуч сямен но, немец кылын но, удмуртэн но верай. Кылзоды-а? Шахматэн, шашкиен шудӥсько. Ёросын ортчись ӵошатсконъёсын кыкетӥ интые потӥсько. Пургалась Киселёв эше монэ азьпалтэ.  Кроссвордъёсты киысьтым уг куяськы. Йырам ялан чотаськисько. Куд-огез магазинын кык колды нянь басьтэ, кӧня тыр со луэ — уг тоды. Вуз карись калькуляторен лыдъя. Мон та куспын йырам лыдъяса вуисько. Уг дӥсьто эрекчаны монэ вуз карисьёс! Тодэмды потэ-а, кыӵе куазь вал та нуналэ вить, дас, дас вить ар талэсь азьло? Кызё ар пала гожъяса кельтӥсько ни.

Ӵукна султӥсько — зарядка лэсьтӥсько. Ох, мылкыды ӟеч луэ, быдэс нунал лобасько кадь. Кин шуиз: мӧйымон — со ӝожтӥськон?

Элина Кумачёва.

Туспуктӥз Владимир Беломорских.

Удмурт Дунне
By Удмурт Дунне 30 сентября, 2011 09:58
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<