Милям коркамы ӝужытгес!

Удмурт Дунне
By Удмурт Дунне 30 сентября, 2011 09:46

Милям коркамы ӝужытгес!

Выль корка пыризы Морозов кузпалъёс но.

Ӵапак куинь ар талэсь азьло тылпу кысон удысын ужасьёслы но спасательёслы Ижысь Камбарской ульчае нимысьтыз юрт пуктыны кутскизы. Соку оскон пичи вал, 16 этажъем юртэз дыраз пуктозы шуыса. Верам кылзэс кивалтӥсьёс быдэстӥзы. Толон тужгес шудоосыз корка пырон ортчытӥзы ни.

— Шаерысьтымы тылпу кысӥсьёс берло дыре котыр ласянь адӟем карымон ужало. 8 толэзьлэсь лыдпусъёссэ басьтоно ке, 15 процентлы ӧжытгес потаз тылпу, сомындалы ик ӧжытгес ӵынын ӝокаса быремъёслэн лыдзы. Озьы бере, ӟеч ужасьёс дунъямын луыны кулэ, — шуиз Россиысь МЧС-лэн Удмурт Республикая валтӥсь управлениезлэн кивалтӥсез Пётр Фомин. — Толон та удысын тужгес усто но кема ужамъёс выль квартиралэсь усьтонъёссэ басьтӥзы.

Куинь ар талэсь азьло но, толон но куазь кыдыраз. Кызьы вераз Пётр Фомин, со шумпоттӥсь зор. Табере тылпу кысӥсьёслэн но калык рад сэрегъёссы вань, солы туж шумпотэ Пётр Матвеевич но. Камбарской ульчаысь юрт сю семьялы чакламын. Лэсьтӥськисьёс тылпу кысӥсьёслэсь вань куронъёссэс быдэстӥзы, выль квартираос вӧл-вӧлэсь. Та дырозь тросэз ужасьёс пожарной частьёсы интыяськем общежитиосын улӥзы. Табере дас-кызь ар пала черодын сылэмъёс выль патерын улозы.

— Таӵе юрт котыр ласянь висъяське, — шуиз Удмуртилэн Президентэз Александр Волков, выль юртэн тодматскыкуз. — Мукет коркаосын ӵошатыса, квартираос 20 сантиметрлы ӝужытгес. Пусйыны кулэ на, Пётр Фомин сюлмаськемен, быдэс корка федерал бюджетысь коньдонэн пуктэмын. Малпасько, таӵе шумпотон берпуметӥез уз луы.

Тылпу кысон удысын ужасьёслэн азьланезлы но бадӟым малпанъёссы. Выль юрт вӧзы эшшо но чеберезгес, ӝужытэзгес кылдоз. Матысь дыре ӧсъёссэ усьтыны кулэ Ижысь Ленин ёросын выль депо, озьы ик Удмуртиын тылпу кысонъя 7 часть кылдытэмын луоз.

Валентина Емельянова.

  Туспуктӥз Владимир Беломорских.

Удмурт Дунне
By Удмурт Дунне 30 сентября, 2011 09:46