Милемлы кулэ зал!

Удмурт Дунне
By Удмурт Дунне 6 сентября, 2011 08:24

 Кызьы меда тодаз вае «Италмаслэсь» ортчем аръёссэ Анатолий Мамонтов. Ансамблен кивалтыны кутскемез дырысен 51 ар тырмиз ни ук. Ужаны кутскыкуз, воксё егит пияш вал на, нош табере со ачиз но ансамбльлэн арлыдаз вуиз ни — 74-зэ пусйиз.

— «Италмаслы» удалтӥз пӧртэм кунъёсы концертъёсын потаны, — вера Анатолий Мамонтов. — Ма, азьло со ласянь капчигес но вал. «Союзконцерт», «Росконцерт», «Госконцерт», «Москонцерт» огазеяськонъёс ялан уксёен юртто вал. Ансамбльмес котькытын тодмаллязы. Милемлы синмаськемын вал Москваысь Бадӟым театрысь дано суредась Мария Бард. Удмурт дӥсь пужылы паймеменыз, ачиз ик куриськиз костюмъёсмылы экскизъёс лэсьтыны.

Концертъёсы потаса, пиосылэсь будэмзэс но валатэкгес кыли. Соос ялан сьӧрамы вал — мае но ӧз чидалэ, мае но ӧз адӟе. Зэм, куддыръя ӵужанайзы доры кыльылӥзы ик. Но таид огпол кузпалылы шуиз: Нора, пиостэ мон уг учкы ни, соос мынэсьтым уг кылзӥсько. Экеос огез 10-тӥын, мукетыз 8-тӥ классын дышетско ни вал. Норалы 37 арес. Москваын концерт сётыны дасяськиськом. Артэ сылэ Игорь Моисеев — калык эктонъя туж тодмо ансамблен кивалтӥсь. Солы сипыртӥсько: та кышномурт берпуметӥ концерт сётэ, собере искусствоысь кошкыны турттэ. Моисеев меӵкытэмзэ ик валатэк кылиз: Мамонтова кошкиз ке, балетэд куашкалоз. Аслыз, пе, озьы ик вера. Леонора эшшо 55 аресозь тыршиз на.

Нош али ужаны туж секыт. Коньдон ӧвӧл. Сюлэмез сиё на куд-ог чиновникъёс — соослы нылпи эктонъя школа-студимы уг кельшы. Кин лэзиз, пе, сое ансамбль бордын усьтыны? Нош кинлэсь ми юаны кулэ вал? Малы кинлэсь ке лэземзэ витёнэз? Со понна ми нимысьтыз уксё ум куриське ук!

Ачим ваньзэ чидасал, секытлы дышемын уго. Но коллективе жаль потэ. Уждунзы пичи. Ваньзы сямен гуртысь потэмын — улон сэреглы кулэясько. Огаз, кыкетӥяз общежитие йыгаськисько, соосты интыяны курыса. Со сяна, кулэ на концертной зал. Муртъёс дӥньын тапыртыса жадимы ни — аренда понна бадӟым дун кесё. Потэ на вал аслэсьтым гожтэм крезьгуръёсме нимысьтыз бичетэн поттэме.

Кин но со шуэ: тон, туж тодмо адями, ансамбльлы чебер зал курыны уд пӧрмытӥськы шат? Оло, тодмо, но мон, крезьгурен сяна, сюлэмез вырӟытыны уг пӧрмытӥськы. Но оскисько: вылӥ кивалтӥсьёс югдурмес тупатыны юрттозы.

Елена Сараматова.

Удмурт Дунне
By Удмурт Дунне 6 сентября, 2011 08:24
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<