Лулпыкет

Удмурт Дунне
By Удмурт Дунне Сентябрь 20, 2011 08:16

Лулпыкет

 Туннэ нуналлы Историяя, кылъя но литературая институтын 27 тодосчи тырше. Со пӧлын наукаосъя 9 доктор но 16 кандидат. Соос удмурт, фин-угор но оглом Россиысь наукалэн данъяськонэз луо. Котькудӥз — быдэс энциклопедия.

Никитина Галина Аркадьевна — этнограф, история наукаосъя доктор, профессор, институтлэн директорезлэн воштӥсез. Вордӥськемын Эгра ёросысь Мазьги гуртын. Эскере удмурт крестьянъёслэсь улэм-вылэмзэс, калык педагогикаез, медицинаез, удмурт диаспораосты, туала этнокультураез но этнополитикаез. 110-лэсь трос ужъёслэн авторзы.

— Институтлы луыса мон аслэсьтым нимме, ужме калыклы матэ кари. Студентъёслы лекциос лыдӟыкум, котьку шуисько: этнология кадь синмаськымон наука дунне вылын ӧвӧл. Со тодон гинэ ӧвӧл, валан сётэ: малы ми — пӧртэм калыкъёс — сыӵеесь. Нош валаськод ке, гажаны кутсконо: котькуд калыклэн вань правоез аслаз кылыныз вераськыны, кырӟанъёссэ кырӟаны, сямъёссэ яратыны.

Эскеронъёсы герӟаськемын удмурт гуртэн. Сомында аръёс ӵоже мон ӵем данъяськисько, ӵем куректӥсько удмурт калык понна, ӵем йыркуръяськисько. Но малпасько: кытын меда эшшо быгатысал на та институтын выллем ужелы сыӵе-сыӵе сётӥськыны? Зэм, УдГУ-э туж-туж ӧтьылӥзы, кафедра но сёто вал. Но кивалтӥсьмы Кузьма Куликов лек кылзэ вераз: кадръёсме уг кузьма!

Мон туж гажасько ужасьёсмес. Соослы институт трос луонлык сётэ, но институтлэн но данэз соослы луыса ӝутӥське.

Иванова Маргарита Григорьевна — археолог, история наукаосъя доктор, профессор, Россиысь «Достояние поколений» премилэн лауреатэз. Вордӥськемын Можга ёросысь Вылӥ Кватчи гуртын. Эскере удмуртъёслэсь шор дауръёсысь историзэс, культуразэс. Трос аръёс ӵоже кивалтӥз Иднакарын гудӥськонъёсын. Наукая 200-лэсь трос ужъёслэн авторзы.

— Институтын ужаме туэ 38 ар луоз ни. Татын быдэ вуи, выль тодон басьтӥ, книгаосме поттӥ… Уже туж зол азинскиз институтэн кивалтыны Кузьма Куликов лыктэм бере. Со Иднакарын гудӥськонлэсь бадӟым пайдазэ адӟиз.

1988-тӥ арын институтмы академилэн бурд улаз пыриз, солэн ӧраз пырыны кулэ вал, фондъёсмы, быгатонлыкмы бадӟым шуыса возьматоно. Кузьма Иванович оскиз: та ужпумъёсты милям ужасьёсмы ик вормозы. Палэнысь одӥг адями но ӧтемын ӧй вал. Нырысь ачиз доктор ужзэ утиз, собере пумен-пумен мукетъёс. Кытын ке ик ӧвӧл, Москваысь академиын!

Тужгес секыт вакытэ, 2001-тӥ-2004-тӥ аръёсы, Куликов сюлмаськемен, Прави-тельство висъялляз книга поттыны уксё. Нош 2004-тӥ арысен грантъёс весь октӥмы, туала наука ӧре пырыны но возиськыны быгатӥм.

Иднакар бордын ужаммес туж ӟечен тодэ вайисько. Наукаын удмурт терминология ӧй вал бере, нырысь шугъяськи. Шуом, Иднакарысь шедьтэм «шумящие подвески» шуонэз кызьы удмуртэ чебер берыктод? Фольклорист Пётр Поздеев дэмлаз «шильтыртӥсь чеберъянъёс» ниманы. Озьы ик со пыӵаз. Нош писатель Анатолий Уваров, огзэ вашкала угыез учкыса, чабкиськиз: «Ма, Шунды-мумы ук та!» Озьы улонэ пыриз таиз образ.

Институтын гинэ ӧм пукылэ, студентъёсты но дышетӥм, общественной уже пыриським, лекциосын фермаостӥ но ветлӥм… Угось азямы одӥг ужпум сылӥз но сылэ: вашкалазэ эскерыны, люканы но туала улонэ поттыны.

Владыкина (Перевозчикова) Татьяна Григорьевна — фольклорист, филология наукаосъя доктор, профессор, Удмуртилэн Кун премиезлэн лауреатэз, Фин-угор обществолэн дано ёзчиез. Вордӥськемын Дэри ёросысь Вуж Кены гуртын. Фольклоръя куать чылкак выль программаосты кылдытӥсь, учебникъёсты но пособиосты поттӥсь. Кивалтэ шаертодонъя кун стандартъёсты но программаосты кылдытӥсь группаен. Удмуртилэн кункрезезлэн (текстэзлэн) авторез. 100-лэсь трос ужъёслэн авторзы.

— Институт — мынам улонэ. Татын 33 ар ӵоже тыршисько ни. Куд-огез шуэ: ялан уж, уж, нош улыны ку? Но наука — со улон ик вань.

Мыным шуд усиз фольклорен вырыны. Туж трос материал люкамы калык пӧлысь. Бӧрысь бордамы  итӥськизы крезьгурчиос. Эскеронъёс потылӥзы нимаз книгаосын, бичетъёсын. Удмурт фольклоръя монография кылдӥз, школаын ужаны хрестоматия.

Мар понна тыршимы? Шедьтэммес, эскереммес калык пӧлы вӧлмытон понна. Институтын ужан вискын мон Удмурт кун университетын но тырши, Москваын, ГИТИС-ын, но лекциос лыдӟи. Туж данъяськисько: удмурт фольклор тодмо луиз республикамылэн палэназ. Дорамы вазиськыло, визь-кенеш юаса. Кылдытӥ фольклоръя аслэсьтым школаме, аспирантураме, со пыр 8 адями кандидат луиз ни.

Наукаын, астэ вунэтыса, ужано. Но, мукет ласянь, милям удысмы улыны кужым сётэ. Фольклорысь кыӵе ке образ шедьтӥськод ке, сыӵе шумпотӥськод! Сое мукетъёсызлы но возьматэм потэ. Калыклэн дунне шоры учконэныз данъяськыны кутскиськод.

Улонын одно ик кулэ аслэсьтыд сюрестэ шедьтыны. Мон шедьтӥ. Мон кулэ фольклорлы, нош со мыным лулпыкет, визьпыкет луиз. Ма, институтамы ужало наукатэк улыны быгатӥсьтэм адямиос гинэ.

Лигенко Нелли Павловна — историк, история наукаосъя доктор. Вордӥськемын Якшур-Бӧдья черкогуртын. Эскере крестьян промышленностьлэсь азинскемзэ, нырысьсэ чакласа потӥз Удмуртиысь ужбергатонэз. Наукая 70-лэсь трос ужъёсыз.

— Институтлы 80 ар, нош мон татын 40 арзэ ни. Озьыен, ог-огмес шедьтӥмы. Ми туж яратӥськом институтмес. Ужез йылпумъяны кулэ ке, арнянуналъёс но отпускъёс сярысь вунэтӥськом. Вань ужасьёсмы — визен тырмытэм сандыкъёс выллем. Дырын-дырын котькудӥз ас югдаз ветлэ, котыр дуннеез адӟемысь дугдэ. Валаськом ни: адями эскеронъёсаз выемын. Монографиез дась луэ ке, тодосчи «сайка», ваньмыз кадь луэ. Но трос ик дыр уг ортчы, мукет эскеронъёсаз вые ни.

Ужасьёсмы дан поттыса ветлыны уг ярато, соос шып лэсьто удыссэс, узырмы-то архивъёсты. Улэм-вылэммыя кизьнылыны кутскиськом — архивъёсысь тузонлы аллергия луэ. Озьы ке но книгаосын, вашкала бумагаосын тырмытэм ӝажыос доры нош вамыштӥськом. Кин ке серекъяса шуиз вал: наукая ужасьлэсь, пе, институтэ пырамез понна уксё но куризы ке, со тыроз но пыроз, ужаса пукоз… Тӥни сыӵеесь соос — тодосчиос.

Азьвыл аръёсы мукет городъёсысь архивъёсын толэзь-толэзь но ӝыны пукылыны луонлыкмы вал. Али тужгес троссэ — 10 нунал. Но со дыре ик али туж паськыт кутӥсько выль технологиос. Ялан тунсыкогес луэ ужаны но, улыны но.

Христолюбова Людмила Степановна — этнограф, история наукаосъя кандидат. Эскере вашкала удмуртъёслэсь улон-вылонзэс, этнокультурая,  этносоциологияя туала югдурез. Вордӥськемын Дэри ёросысь Волково гуртын. 150-лэсь трос ужъёсыз.

— Та институт — мынам уже но, улонэ но 40 ар ӵоже. Аспирантураысь татчы бертыкум, одӥг археолог но одӥг этнограф гинэ вал. Ми трос ужамы Владимир Владыкин тодосчиен ӵош. Милемлы этнографилэсь инъетсэ кылдытоно вал. Со понна нырысь чаклано, мар азьвыл лэсьтэмын. Ваньзэ сое люкано. Владыкин удмурт этнографияя лекциос УдГУ-ын лыдӟылӥз, нош учебник ӧвӧл. Озьы школаын но вузъёсын дышетскисьёслы книгаос поттон бордын тыршим.

Этнографияя эскеронъёс быдэс республикаямы ортчытэмын вал. Институтлэн планаз пуктэм ужъёсты сяна, лэсьтыны тырши мукет эскеронъёсты но. Шуом, удмурт тодосчиослы сӥзем «Учёные-удмурты» книга дасяй. Куд-огез сыӵе ужез вырӟытыны луоз шуыса ӧз оске. Кин ке шуиз: удмурт тодосчиосты люкалод но соосты 30-тӥ аръёсы сямен репрессиос улэ кыскозы-а? Тӥни макем мур пыӵаса кылемын вал кышкан. Нош мон сыӵе шумпотылӥ, тодмотэм удмурт тодосчиез шедьтыкум! Малпасько, та но мукет ужъёс удмуртъёслэсь асваланзэс будэтыны юртто.

Кириллова Людмила Евгеньевна — кылчи, филология наукаосъя канди-дат, кивалтэ институтлэн кылтодонъя ёзэныз. Финляндиысь М. Кастрен нимо огазеяськонлэн координаторез. Вордӥськемын Дэри ёросысь Якшур гуртын. Эскере инты, гурт нимъёсты. Топонимикая кыллюкамлэн но наукая 50-лэсь трос ужъёслэн авторзы.

— Наукае кыстӥськонэ школаысен ик пыӵаз, дыр. Дышетӥсьмы Григорий Карпович Перевозчиков, институтысьтымы ик профессорлэн Татьяна Владыкиналэн атаез, туж тунсыко урокъёс ортчытъя, милемыз экспедициосы потталля вал.

Институтэ 1977-тӥ арын вуэме дырысен нокытчы ӧй кошкылы. Со мыным улон сюрес сётӥз. УдГУ-ын, коньдон тырмымтэен, экспедициосы потаны котьку ӧз быгатылэ, нош милям сыӵе луонлыкъёсмы вал. Азьвыл араз вить пол но экспедицие поталляй. 20 ар ӵоже ни Венгриысь тодосчиен Жужа Шаланкиен ӵошеннамы ветлӥськом.

Гуртъёсысь пересьёсын вераськыса, выль узыр материал шеде. Пересьёс, асьсэос но сое валатэк, кужым сёто. Вань инты нимъёсты чакласькод ке, удмурт ка-лыклэн культураез син азе туж тунсыко пуксе. Люкам материалэз келяськомы наукая архивамы. Вуоно поколениос но тодматскыны мед быгатозы. Милям эскеронъёсмы вылэ пыкиськыса, шаерысьтымы гурт но кар нимъёс кун кылъёс сярысь законэз улонэ пыӵатон программая удмурт сямен гожъямын вал.

Елена Миннигараева.

Туспуктӥзы Константин Семёнов, Владимир Беломорских.

Удмурт Дунне
By Удмурт Дунне Сентябрь 20, 2011 08:16
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<