Кыӵе узылэн улонэз кык?

Удмурт Дунне
By Удмурт Дунне 14 сентября, 2011 10:12

Кыӵе узылэн  улонэз кык?

Кылем арня пумын аслэсьтыз юбилейзэ пусйиз экономика наукаосъя доктор Алевтина Сутыгина. Трос аръёс ӵоже со ужаз Удмуртиысь Кун статистикая комитетын, берло сизьым арзэ тыршиз Правительстволэн Тӧроезлэн воштӥсезлэн секретариатэныз кивалтӥсь луыса. Статьяос, монографиос гожъям сяна, Алевтина Ивановна гур азьын но берганы вуттӥське.

Бакчаям будэтӥсько ремонтантной узы. Емышсэ сентябре но сииськом на, ческытэсь, но укыр векчиесь соос. Али, пе, выль сортъёс вань ини. Кыӵезэ дэмласалды?

Ольга Максимова.

Иж.

Тӥляд узыды вашкала вакытысь кылемын ай. Со вӧлме кидысэн, емышез шер-тур луэ, весь сюлмаськемез кулэ каре.

Туала ремонтантной узыос емышсэс озьы ик сёто гужем ӵоже, но соос пӧлыпум быдӟа луо. Вӧлме сыӵе узы мыйыкен (усэн), выль мерттэм выжы нырысетӥ араз ик трос емыш но, мыйык но сётэ ини. Куаръёсыз векчиесь но пуштыр-пуштыресь, нырысетӥ араз соос 20-30 луо, бӧрысь 70-80 пото. Вӧлмытоно таӵе узыез огшоры: мыйык пуме кылдэм выжыен. Кылсярысь Арпагой сортлэн 4-10 мыйыкез луэ, соос 8-20 выжы сёто. ӵапак та сорт туж капчиен выжыяське но.

Ремонтантной узылэн куаръёсыз вылысьтыз вылаз будо бере, котькуд куаклы паськыт инты висъяно: висказы тӧл чуртнаськыны мед быгатоз. Соин ик мерттыку тае лыдэ басьтоно: висказы  котырак 30-40 сантиметрлэсь ичи ӧвӧл кельтоно. Мерттоно августлэн нырысетӥ ӝыныяз яке мае.

Узы дугдылытэк сямен сяськая майысен кезьыт луытозь. Но емыш кылдэмезъя кык вакытсэ висъяны луэ.

Нырысетӥез тупа огшоры викторилэн сяськаян дырыныз. Но июне ремонтантной узылэн сяськаосыз ичи луо, емышез но векчигес. Со понна июльлэн кутсконаз узылэн кыкетӥ улонэз кутске: тӧдь-тӧдь сяськаосыз сьӧрын куаръёсыз ик уг адӟисько ни. Емышез туж чаль кисьма, шунды пӧсь ӧвӧл ни ке но.

Та вакытэз матэктэмды потэ ке, июне потэм сяськаоссэ ишкалэ. Толалтэ ӟеч мед кӧлоз но тулыс чебер мед пушъёз шуыса, сентябре кылдэм сяська потонъёссэ но куялэ. Вазь кынтылыны кутскиз ке, нош узы вуымтэ на ке, убодэс шобыртэ плёнкаен. Емыш кисьмалоз музъем шунытлэсь.

Нырысетӥ 2 араз ремонтантной узы кужымаз пырыны выре. Тужгес трос емыш сётэ 3-тӥ араз, 4-тӥ араз каллен пашмыны кутске ини.

Узылэн сяська луонъёсыз кылдо пӧсь толэзьёсы. Соин ик нимысьтыз саклык висъяно ву киськанлы. Нырысьсэ трос ву удоно мае. Июне-июле кӧс улэ ке, 2 арнялы быдэ огпол киськано, августэ 1-3 пол зор улэ шедьтоно. Одӥг квадратной метр музъемлы кулэ 25-30 литр. Киськам бере торфен яке пул пызен пызьнано, мускытэз кемагес мед возиськоз шуыса.

Асьмелы тупась сортъёс.

Арпагой. Ваемын Германиысь. Куаръёсыз трос, ӝужыт ӧвӧл. Сяськаез трос, емышез ческыт,  быдӟалазы шоро-куспо, нырысетӥосыз 20 грамм пала кыско, берлоосыз — 6-7 грамм. Толалтэ кезьытэз чида, мыйыкъёсыз трос, выжыяське капчиен.

Эверест. Ваемын Франциысь. Куаръёсыз векчиесь, пеймыт-вожесь, шоро-куспо  емышез 4-5 грамм кыске. Асьме кезьытъёсты чида, но трос мыйык кылдытыны кужмыз уггес тырмы.

Чесноковлэн узыез. Куаръёсыз паськытэсь, пеймыт-вожесь. Емышез 5-6 грамм. Эверестэн ӵошатыса, тросгес урожай сётэ. Кезьытэз чида.

Та куинь сортъёс кӧня ке аръёс ӵоже эскеремын Пермь областьын, куинез ик асьме инкуазьлы тупазы, оскымон урожай сётӥзы. Озьы ик шаерамы будэтыны дэмласько таӵе ремонтантной узыосты: Сахалинская, Неисчерпаемая, Ред Рич, Сан Вир, Махерн, Кардинал, Ольстар, Проф-Южен, Тристар.

Александр Фёдоров.

Удмурт Дунне
By Удмурт Дунне 14 сентября, 2011 10:12
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<