Клубе пото… пересьёс

Удмурт Дунне
By Удмурт Дунне 30 сентября, 2011 09:49

Клубе пото… пересьёс

Арганэн мыло-кыдо шудэ О. Сабурова.

Яр ёросысь Укан черкогуртысь песянайёс тэк улонэз пичи но уг тодо. Нуналлы быдэ клуб пала вамышто. Отын угось соосты чидатэк витё эшъёссы.

— Соостэк милям одӥг ужрадмы но уг ортчы, — шуэ Укан культура юртлэн кивалтӥсез Ольга Ремовна Шудегова. — Песянайёс «уг» шуонэз уг тодо, ӧтиськом но, соку ик оп! шуытозь дорамы вуо ини. Соин ик капчи соосын ужаны. Кырӟаны но, вераны но етӥзэсь. Ай эктыны но кыӵе мыло-кыдоесь.

Песянайёс юрттэмен ик, Укан библиотекаын вашкала улонлы сӥзем сэрег усьтэмын. Олокыӵе но арбериос отчы вутто.

— Корка сигын но лапас улын токма сисьмыса медаз улэ соос, — шуэ пенсионер Лидия Петровна Данилова. — Пересьёсмылэн куэм дэремъёссы но тани пумен гыжмо ини. Кей киӵыр-киӵыр сие. Татын коть нылпиос со арбериосты адӟыны быгатозы. Ваньзэ, мае быгатӥськом, татчы вайыны тыршиськом.

Та гуртын улӥсьёслэн эшшо одӥг данъяськонзы вань на: Уканысь сизьым классъем школае дышетскыны ветлэм Бердыш гуртысь кылбурчи Флор Васильев. Солэн тусбуез но кылбуръёсыз библиотекаысь борддоре интыямын.

— Колхозын ужаса но нылэз-пиез пыд йылазы ӝутыса, егит дырмы ортчиз, — огымысь кадь шуо песянайёс. — Соку концерт пуктыса ветлон сярысь малпанъёс ик ӧй вал. Ялан уж вылын улӥськиз. Табере тани огнамы кылимы, тросмылэн кузпалъёсмы улонысь кошкизы ни. Шутэтскыны потыса, мӧзмыса но висёндэ кылзыса, оген йырын дорын уд пукы ук. Ялан телевизор учкыны но акыляк потоно. Клубе шумпотыса мынӥськомы, киужъёсмес сьӧрамы басьтӥськомы. Ой, ог-огмылэсь кыӵе но пужыос ум шедьтӥське. Собере керттэм носкиосмес но пӧзьёсмес ог-огмылы ик праздникъёсы кузьмаськомы.

Уканысь гурт кенешен мыло-кыдо, быгатыса кивалтэ Августа Савельевна Хрулёва. Ас вакытаз со кема аръёс ӵоже кивалтэм Уканысь сельсоветэн но фермаен. Егитъёсын ӵош соос «Зареница» ансамбль кылдытӥллям на. Нылъёс но пиос отчы шумпотыса ветло. Бере уг кылё Укан шор ёзо школаысь дышетӥсьёс но дышетскисьёс. Кырӟам-верам сяна, соос удмурт кылын сценкаос дасяло, кылбуръёс лыдӟыло.  Кырӟаны-вераны яратӥсьёс арняяз кык пол репетициосы потало. Концертъёсазы удмурт, ӟуч но бесерман кырӟанъёсты быдэсъяло. Нош кыӵе соослэн тузӥ вашкала дӥсьёссы! Песянайёс нуныкайёссэс но озьы ик дӥсяны тыршо. Уканъёс ӵемысь асьсэлэсь быгатэмзэс гуртооссылы но сьӧрлосьёслы возьматъяло.

— Валлё (азьло) транспорт ласянь капчигес вал, котькытчы вуылӥмы, — шуэ Августа Савельевна. — Табере улон воштӥськиз. Кыдёке интыяськем гуртъёсы туж ик ум потаське ни. Но калык вите милемыз, ялан доразы ӧтё.

Августа Савельевна одӥг кылысь ужа Укан гуртысь ветеранъёслэн кенешенызы кивалтӥсен Галина Аркадьевна Даниловаен.

— Яратӥськом ми та гуртысь ветеранъёс доры вуылыны, — вераськонмы борды итӥсько Яр ёросысь арлыдоосын кивалтӥсь Анатолий Петрович Владыкин но   «Удмурт кенеш» огазеяськонлэн ёросысь ёзэныз кивалтӥсь Валентина Михайловна Данилова. — Татын туж мыло-кыдо калык улэ. Гуртсылы туэ 365 ар тырмиз. Ой, кыӵе шулдыр ортчытӥзы со ужрадзэс! Озьы ик уканъёс ульчаосазы праздникъёс ортчытъяло. Ог-огзэс пӧсь перепечен, табанен но варсен утялто. Асьсэ кужымен тодмо адямиоссы сярысь альбомъёс но бордгазетъёс поттыло. Асьсэлэсь улонзэс песянайёс асьсэос чебертыны быгато. Нош арганэн соосты шулдыртэ клубын ужась Ольга Алексеевна Сабурова.

Любовь Тихонова.

Туспуктӥз Владимир Беломорских.

Удмурт Дунне
By Удмурт Дунне 30 сентября, 2011 09:49