Кин люкылэ коньдон?

Удмурт Дунне
By Удмурт Дунне 30 сентября, 2011 09:44

«Огъя Россия» валэктэ» проектлэн 18-тӥ люкетэз сӥземын вал ужбергатонэз азинтонлы. Пӧсь телефон пыр радъям кенешон ортчиз В. Путинлэн приёмнояз но партилэн интыысь ёзъёсаз.

Юанъёслы валэктон утчазы экономикая министрлэн воштӥсез Иван Лысов, Выт службая управленилэн кивалтӥсезлэн воштӥсез Венера Кузнецова, Покчи ужбергатонлы юрттонъя кун фондлэн директорез Алексей Вьюгов.

Вазиськисьёсты уката сюлмаськытэ одӥг юан: кытысь шедьтоно бизнесэз азинтонлы коньдон? Экономикая министрлэн воштӥсез Иван Лысов верамъя, нюръяськыны луэ субсидиос но займъёс понна. Соос трос пумо. Кылсярысь, таӵе юрттэт басьтыны быгатозы кунгож сьӧры мынӥсь вузъёсты поттӥсьёс, инновацияя амалъёсын ужасьёс. Юрттэт чакламын 100 сюрс манетысен 500 сюрс манетозь.

Мукетыз амал — займ. Покчи ужбергатонлы юрттонъя кун фондлэн директорез Алексей Вьюгов верамъя, фонд пыр 50 сюрсысен 1 миллион манетозь пунэмен уксё курыны луоз. Уго таӵе пичи коньдонэз сётъяны банкъёс куддыр уг но басьтӥсько. Таӵе займ басьтыны луоз араз 10 процент ставкаен.

Вуоноез «Огъя Россия» валэктэ» ужрад сӥземын луоз арлыдоослэн юанъёссылы. Таиз радъяськоз 19-тӥ октябре.

Елена Скворцова.

Удмурт Дунне
By Удмурт Дунне 30 сентября, 2011 09:44