Кизьнон вылэ эн кизьнэ

Удмурт Дунне
By Удмурт Дунне 14 сентября, 2011 10:18

Кизьнон вылэ  эн кизьнэ

 Сӥзьыл вуиз. Азьпалан — тол. Таин сэрен мугорез али ик дасяно ини кезьытъёслы. Тужгес но бадӟым саклыкез кулэ каре… ныр. Малы? Та сярысь вера Ижысь отоларинголог Александр ТОРОПОВ.

— Ринит висён — ныр тыре, зырым вия — котькудмылы тодмо. Но котькудмы ик, жаляса верано, эмъясь доры ум дыртӥське. Ас кожамы йонатӥськиськом. Со бордысь ик кылдо мукет секыт висёнъёс: отит (пельёс висё), синусит (ныр тыре, кымес пилиськыны турттэ), фронтит (кымесэз но нырез герӟась гумы тӧрна), гайморит (ныр перегородка урӟектэ) но мукет.

Ринит кынмаку гинэ уг кылды. Та чер шаплы аля, адями кӧтвиянэн, гонореяен, скарлатинаен, куртчаньгиен, аллергиен курадӟе ке, ныр перегородкаез кырыжске ке. Соин ик йӧнатӥськон амалэз быръён азьын одно ик пӧртэм анализъёс лэсьтоно.

Та висёнэз, кезьыт куазь сяна, сайкато кырсь омыр, тузон. Дыраз уд эмъяськиськы ке, висён ваське ньылонэ, кырмиське пельёсы.

Эмъясьёс ринитэз 3 стадилы люко:

1.  адямилэн нырыз тыре — таӵе вакыт кыстӥське кӧня ке час;

2. собере синъёс гордэкто, синкылиос васько, вылысьтыз вылаз кизьнылоно, температура ӝутске;

3. зынъёсты шӧдон ыше,  вожалэс-пурысь зырым ваське.

Адямиос ӵем дыръя янгышало нырысетӥ люкетаз. Нырзы тыре но, ортчоз ай шуыса, киынызы шонто — зырымаськон висён ӧвӧл ук! Температуразы ӝутӥськем бере гинэ тазалыксы сярысь сюлмаськыны кутско. Но соку бер луэ ини — нырзы сяна, быдэс мугорзы жумме. Та сяна, туннэ тодмо ини: 80 процентэз ринитэн курадӟисьёс бӧрысь синуситэн висё на.

Верасал созэ но: тросэз адямиос уг быгато нырзэс шонер сузяны. Мар секытэз кадь? Зырымдэ куштӥд но тӥни. Но татын лыдэ басьтоно: нырысь ик чылкытатоно бур нырпасез, бӧрысь — паллянзэ. Ӵошен уг яра. Малы ке шуоно озьы барабанной перепонкалы секыт йӧтэ, пель урод кылыны кутске, юмекъяны ӧдъя.

Ринитлы пумит эмъюмъёс туннэ лачак. Но соосын туж чакласькыса выроно. Бадӟымъёслы чакламзэ уг яра нылпиослы виятыны. Та сяна, учконо: эмъюм сэръёсты сюбегатэ (шуом, називин) яке ныр пушез чылкытатэ (аквамарис, салин).

Нырысетӥосыныз 5-7 нуналлэсь трос йӧнатӥськыны уг яра. Нырез нуналаз 2-3 пол гинэ пызйылоно. Угось та суретъёслы мугор туж чаляк дыше, соин амалтэк кужмогес суретъёсты быръёно луэ.

Кыкетӥоссэ яра ӵемгес но кутылыны. Ульчае-а потӥськоды, куное-а дасяськиськоды — пызъе.  Нырады али гинэ шедем вирусъёс ӝогак бырозы.

Но ӵем дыръя та эмъюмъёсын гинэ адями уг бурмы. Вӧзаз одно ик юоно на вирусъёслы пумит суретъёсты (арбидол, анаферон), температураез зӥбись эмъюмъёсты. Но солэсь азьвыл  кенешоно врачен.

Калыкын вӧлмемын веран: ринитэз ӧд эмъя ке, со быроз, 7 нунал ортчыса, нош йӧнатӥд ке — арня ортчыса. Та веранэн соглаш кариськеме уг поты. Малы ке шуоно та висён дырез туж чакланы куре. Арнялэсь ятыр соин курадӟыку, мугоре мур выжыоссэ лэзе.

Кызьы гылъяськоно?

♦ Кынманы шедьыку, нырез капчиен йӧнатоз гылъян (промывание). Со куинь пумо луэ. Тужгес капчиез амал — «Дельфин». Вузаське аптекаосын. Суретэз но, пызъён арбериез но ӟеч. «Дельфинэн» капчи йӧнатыны нылпиосты.

♦ Аптекае вамыштыны дырды но коньдонды ӧвӧл ке, юрттоз мукетыз амал: ӝыны чечы пуньы сылалэз суралтоно ӝыны стакан быректэм шуныт вуын. Та суретэз спринцовкаен кысконо но нырысь одӥгаз нырпасе лэзёно, собере мукетаз.

♦ Промывание лэсьтыны уг яра, ныр пушкын кыӵе ке яраез, пыктосэз вань ке, вир ӵемысь вия ке. Нырды тыремын? Гылъяськон азьын сэръёсты сюбегатӥсь эмъюмъёс пононо.

♦ Спринцовкаез каллен зӥбоно. Угось марысь-мар ке, ву пель гумые кошкыны быгатоз. Соин сэрен урод бактериос пелез но висьытозы — отит кутскоз. Промывание бере зол-зол зырымаськоно ӧвӧл.

♦ Гылъяськоно изён азьын гань-гань кариськем бере. Ульчае потыны яра, 30 минут ортчыса гинэ.

промывание лэсьтыны яра нуналаз одӥг пол арня ӵоже. Кин тузон интыын ужа — нуналлы быдэ.

Кызьы утиськоно?

♦ Ульчае потыны дасяськиськоды? Нырпасьёсты оксолин мазен яке полудан суретэн зыралтэ. Шокалэ нырыныды. Угось соку вирусъёс ныр пушкысь слизистой оболочка вылэ шедё. Кезьыт омыр мугорамы шунаса пыре, урод бактериос пыдло уг кошко.

♦ Нырдэс утялтӥды ке, киостэс но эн вунэтэ. Соосты ӵемгес майталэн миськылоно.

♦ Улон интыез чылкыт возёно, укноосты одӥг-ог вӧлак усьялляно — юзмыт омыр выль кужым пыртоз. Со вие ик кӧс омыр ныр пушез куасьтэ, озьы солэн нюръяськон кужымез быре. Соин ик омыр мускыт медло.

♦ Нылпиосты чаклано: зырымзы ныр пушказы медаз куасьмы — эмъюм уз пыӵа. Люкаськем жобез пушкын кема возёно ӧвӧл.

♦ Валаса дӥсяськоно! Медад но кынме, медад но пӧсялэ. Угось соизлэсь но, таизлэсь но иммунитет лябӟе.

Удмурт Дунне
By Удмурт Дунне 14 сентября, 2011 10:18