Кеч йӧллы вожмаськон

Удмурт Дунне
By Удмурт Дунне 9 сентября, 2011 09:40

Кеч йӧллы вожмаськон

 

Районъёслэсь ӵектэм проектъёссэс дунъя экспертъёслэн комиссизы.

Малы Удмуртиысь магазинъёсын шер пумиське кеч йӧл? Сое басьтыны мылкыд карисьёслы ӵекто Франциысь яке Новой Зеландиысь ваемзэ. Одӥг литр таӵе йӧлэз вузало 130-140 манетэн. Удмуртиын гурт удысын ужасьёс но кеч вордысалзы. «Огъя Россия» партилэн ялэм муниципал проектъёсъя вожвылъяськоназ ӵектэмын вал кеч йӧл кысконъя кык проект.

Кеч ферма усьтыны дасясько Кияса ёросысь Юрмалай муниципал кылдытэтын. Татысь Петровъёслэн фермер хозяйствоязы кӧня ке сюрооссы вань ни. Огшоры кечъёссы нуналаз 2 литр гинэ йӧл сёто. Нош зааненской выжыысь сюрозы али одӥг гинэ. Соослэсь, пе, нуналлы быдэ 4,5-6 кило йӧл кыскыны луысал.

— Та проектэз улонэ пыӵатонлы кулэ 4,5 миллион манет, — вера фермер хозяйстволэн кузёез Наталья Петрова. — 500 кеч басьтысалмы. Кыскем йӧлэз кытчы карыны но ӧй ёрмысалмы. Одӥг литрзэ 30 манетэн вузаны быгатысалмы ке… «Сарапул-молоко» огазеяськонын кеч йӧлэз пакетъёсы кисьтонъя линиязы но вань, шуо, — валэктэ кышномурт.

Залын пуко шаерысьтымы вылӥ кивалтӥсьёс: Кун Кенешлэн Тӧроез Александр Соловьёв, Правительстволэн Тӧроезлэн гурт удысъя воштӥсез Александр Коробейников, экономикая министр Михаил Зайцев, трос мукет чиновникъёс. Тазьы радъяськизы муниципал кылдытэтъёслэн проектъёссэс утёнъя 4-тӥ кылзонъёссы. Талэсь азьвыл таӵе ужрадъёс ортчизы ни Эгра районын, Вотка но Глазов городъёсын. Шаерысьтымы муниципал кылдытэтъёс конкурсэ келязы 124 проект. Пӧлысьтызы быръемын луоз ог 20 устоез гинэ.

Нялтас вераса, Сарапулын ортчем кенешонын тросэз проектъёс сӥземын вал гурт удысэз азинтонлы: курка, ыж, кеч вордонлы. «Гурт удыс» номинациын кеч вордонъя ик проектсэ ӵектӥз Каракулино ёрос но. «Русич» огазеяськонын тодо ни, кытысь кечъёсты басьтозы, кӧня манет тыр усёз фермаез тупатъян. Кыскем йӧлзылэсь татын дасяны чаклало творог, йӧлвыл, аръян. Тазэ проектэз ӵектӥсьёс но учко «Сарапул-молоко» шоры — йӧлмес, пе, отчы вузаны быгатысалмы.

Сарапул ёросысь Уральское черкогуртын усьтыны малпало курка ферма. Гуртын  2 сюрс 700 улӥсез. Татын ас вакытаз ӟеч хозяйствозы вал. Кӧня ке ар талэсь азьло со куашказ. Калык ужтэк пуке, нош гыроно-кизёно муос шобырско жуг-жаг турынэн. Та муниципал кылдытэт конкурсэ вуттӥз кык проектсэ. Тужгес тунсыкоез — курка вордон. Проектлэн дуныз — одӥг миллиард манет. Сое быдэстон понна юрттӥськыны дась Литваысь «АРВИ» компания. Курка фермаын ар куспын 6 сюрс тонна сӥль поттыны чаклало. Одӥг кило сӥлез вузаны луысал 120-140 манетэн. Курка будэтэм сяна, татын ик усьтыны луысал комбикорм поттонъя пичи завод но. Та проект пыд йылаз йыг-йыг сылэ ни. Матысь дыре республикаысьтымы Гурт удысъя но сиён-юонъя министерствоысь ужасьёс дасясько потыны Литвае курка вордон удысэн тодматскон вылысь.

— Коньдон ке луысал, мон вань та проектъёсты быдэстыны юрттысал. Вань ӵектонъёс рос-просэсь, — вераз «Огъя Россия» партилэн Удмурт ёзэзлэн Политсоветэзлэн секретарез Александр Соловьёв. — Уката паймытӥз Камбаркаысь машиностроительной завод. Солэн кыкез но проектэз ӟеч. Тужгес усто соиз — малпанъёссы быдэсмизы ке, трос ужан интыос кылдозы. Тани сюбег чугун сюресъёслы чаклам техника поттон туж тунсыко вылэм. Таӵе вагонъёслы но локомотивъёслы кулэясько  нюлэс корасьёс, музъемысь эгыр поттӥсьёс. Соин оскем потэ, таӵе проектъёсызлы луыса завод пыд йылаз султоз. Уката ик — соослэн поттэм вуззылы кулэяськисьёс вань ни.

Таяз арняе проектъёссэс утёзы на Можгаын, Уваын но Ижын. 13-тӥ-14-тӥ сентябре лэсьтэмын луозы конкурслы йылпумъянъёс. Тужгес усто проектъёслы  коньдон чаклалозы республикалэн вуоно арлы бюджетаз.

Елена Скворцова.

Удмурт Дунне
By Удмурт Дунне 9 сентября, 2011 09:40
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<