Кескич шаер

Удмурт Дунне
By Удмурт Дунне 13 сентября, 2011 10:36

Кескич шаер

Абхазиысь правительстволэн куашкам юртэз.

Шутэтскыны Абхазие мынонме тодыса, эшъёсы, ӵыжы-выжыосы куаретыны ӧдъязы: мукет инты бырйыны ӧд быгаты шат — сопалъёсын улон кышкыт ук! Огыр-бугыр учыре сюрыны кема ик ӧвӧл, отын калык пӧсь, огымысь кышкатӥзы монэ. Но таӵе мылкыд бордам ӧз лякиськы. Йырме поромытӥзы Интернетысь Абхазилы сӥзем туспуктэмъёс…

СССР бордын улэм-азинскем Абхазия пумысен туннэ огъя мылкыд уг кылды. Одӥг ласянь, со нимаз улӥсь-азинскись кун. Озьыен, солэн луыны кулэ аслаз уксёез, аслаз армиез, аслаз законъёсыз но трос мукет. Но отчы вуыса, мурт кунэ шедем кадь уг поты: котькытын кузёяське ӟуч кыл, киысь кие вӧлме Россиысь манет, магазинъёсын ӵекто асьме дорын кадь вуз. Малпай вал, кунгож сьӧры потӥсько…

Апсные — Абхазилэн абхаз кылын нимыз — сюрон понна нырысь ик вуоно Сочи вӧзысь Адлер городэ. Та вакытэ отчы уд но пыры, уд но поты. Кытчы гинэ эн учкы — котькытын мынэ лэсьтӥськон. Мискиньёс, малпай Адлерысь чугун сюрес вокзалэ вуись маршруткаосты нуллӥсьёс сярысь. Рульзэс солань-талань бергатыны мырдэм вутто: вамышлы быдэ лэсьтӥськисьёсын котыртэм интыос, гудэм-порылэм асфальт сюресъёс. Адлерын улӥсьёс серемпыр вазё: Олимпиада шудонъёс 2014-тӥ арын Сочиын ортчозы, кожаськоды-а? Вань секытэз, пе, усёз Адлер вылэ — отын радъямын луозы шудон но бызьылон площадкаос.

Абхазилэн кунгожез дорозь, сюрес сокем кузь ӧвӧл ке но, часлэсь ятыр мыноно луиз. Ньыль часын ӵукна сюресъёс вылын машинаос тымиськемын,  лэсьтӥськисьёс уйин но ужзэс уг урето, шӧдске. Таможняын черодын сылӥсьёс пӧлын Абхазие шутэтскыны мынӥсьёс но, отысь Россие потэмъёс но. Лулӟылэмме кылыса, вӧзам сылӥсьёс монэ буйгато — тамында калык ӧжыт ай, пе. Нуназе котыр кунгож пыр 2 часлэсь ятыр но потоно луэ. Со понна толалтэ татын шал-шал буш — шутэтскыны вуисьёс угось уг луо ни.

Абхазилэн юнматэм законъёсызъя кунгожзы пыр визатэк ортчыны быгато Россиын, СНГ огазеяськонэ пырись кунъёсын улӥсьёс. Мукет странаосысь лыктӥсьёс Абхазие визатэк шедьыны уз быгатэ. Юнме уг шуо, дыр: мурт кунлэсь туссэ таможняысен ик валаны луэ. Абхазилэн кунгожаз вуыса, амалтэк тодам вайи куке-соку Финляндие потамме. Черодын часъёсын сылонэз отын уд адӟы, ваньмыз малпамын калыкез таможня пыр ӝоггес келян понна. Котькытын чылкыт, лад-лад, гань-гань. Нош Абхазие потон секытэнгес сётскиз. Куинь интыын радъямын паспортъёсты, сумкаосты чаклан. Бадӟым сумкаосыныд лукыр-лакыр одӥгысьтыз мукетаз дыртӥськод. Нош тротуаръёс совето вакытэ лэсьтэмын ай, сокем нюко-гопо. Сюрес дурысь корт кенеръёс сьӧрын зэмос свалка: бушатэм ӟенеликъёс, коробкаос, пакетъёс. Секыт шат абхаз таможенникъёслы одӥг чассэс ке но утялсконлы висъяны?! Фин границаын тыршись пиос, эсьмаса, скал но вордо вал…

Азьвыл аръёсы Абхазие куинь нуналлэсь кемалы потӥсьёс азе курон пукто вылэм: страхование огазеяськонъёслы одно ик тыроно 300 манет. Кин тодэ, пе, мар луоз тӥледын мурт кунын. Страховщикъёс, пе, марысь-мар ке, уксёдэс уно пол бадӟыматыса берыктозы. Но ваньмыз та кыл вылын гинэ быдэсъяськем. Абхазилэн музъем вылаз вӧсь луыны шедемъёс одӥг копейказэс но берыктыны быгатӥллямтэ ни. Ярам, туэ арысен таӵе курон палэнтэмын вал. Шуо, страхованиея огазеяськонъёс сьӧры ватскемын вылӥллям Абхазиысь бадӟым кивалтӥсьёс. Калыкез пӧяса, кисызэс уно аръёс ӵоже узырмытӥллям.

Нылкышно синкылиос водопад.

Меӵак верано ке, малы бен барыш уд люка, талы уг люкето ке пачкатонъёс-законъёс?! Абхазиын таӵеослы ӵапак инты. Чурытэсь куронъёс пуктэмын ӧвӧл границаын но, кун пушкын но. Узырмы, кызьы мылыд потэ! Пӧя калыкез, кызьы визьмыд тырмоз! Границаез ортчиськод гинэ, син шоры соку ик йӧто радэн-радэн сылӥсь газельёс. Кунгожлы тужгес но матынэз каргурт — Цандрипш. Отчы ог 7 минут куспын вуод. Со понна куро 150 манет. Ӧвӧл шат рейсовой автобусъёс шуыса юанлы валэктон уд шедьты — водительёс гинэ ӧвӧл, мынӥсь-ортчисьёс гинэ но уз вазе. Цандрипше вуэммы бере валэктӥсьёс шедизы ик (таосыз но Россиысь шутэтскыны лыктэмъёс): автобусэн, пе, вуысалды 15 манетэн.

Абхазъёслэн мукетыз узырмон амалзы — шулдыр интыоссы. Эх, кыӵе кузьым сётэм соослы инкуазь! Лыз вуо Рица ты, ӝужыт возь гурезьёс, чебересь ву усёнъёс (водопад), зарнивуам Выль Афон черк (отчы, пе, одно ик вуылоно нылпи вайыны шугъяськись кузпалъёслы), совето вакытысь вождъёслэн яратоно Пицунда интызы но мукет. Йырдэ ыштод таӵе чеберлэсь! Та интыос пӧлысь одӥгаз ке но вуон понна 600 манеттэ сётоно луод — ваньмыз, пе, отчы пыре: сюрес но, чебер интыосы пырон дун но. Тани ширтӥськод вож писпуосын шобырскем гурезьёс вискытӥ ортчись сюрес вылтӥ. Синъёс мертчемын укно сьӧрысь чеберлык шоры: кык бадӟым гурезьёс вискысь шукыяськыса ик ваське ву, нош тани тазэ Чагыр ты нимало — солэн вуэз тол но, гужем но огкадь — 4 градуслэсь шуныт уг луы… Водитель кытӥ ке ӧвӧл машиназэ тыпак дугдытэ но милемлы, пассажиръёсызлы, вазиське: Рица ты дуре пырон понна быдэн 250 манеттэс сётоно луоды — экологической сбор! Ми чылкак паймемын: 600 манетлэсь ятыр коньдонмес уд кутэ шуиды ук?! Номыре уг тодӥськы, тыремды ке уг поты, татчы ик васькытыса кельто, лек куараен вазе милемлы водитель. Кытчы пырод, гурезьёс вискы огнад шал-шал уд кыльы ук — кисыысьтыд амалтэк поттӥськод шальтыртӥсьсэ. Озьы руль сьӧрын пукисьмы ӝыны нунал куспын 7 сюрс манетлэсь ятыр уксё поттӥз. Валамон, экология вытэз но кисыяз ик чукаса кылиз. Инкуазен сётэм чебер интыоссэс утён-утялтон вылын чик ӧз шӧдӥськы.

Валай: кескич, амало муртъёс Абхазиын тужгес узыресь.

Син шоры йӧтӥз на абхазъёслэн азьтэмскемзы. Шутэтскыны лыктӥсьёс вылын табыш поттӥськод бере, тыршыны кулэ, дыр, ук соослы кельшыны, соос сярысь сюлмаськыны?! Сыӵе мылкыд отын уг кылды. Пляжын но, урамъёсын но уд пумита жаг куян интыосты. Шутэтскисьёс асьсэос (!) быръё жуг-жагзэс куштон инты — озьы кылдэ быдэс гурезь. Огпол но ӧй адӟы сое утялтӥсь машинаез. Эх, зарезь омырен шокан понна ми татчы кык-куинь сутка ӵоже лыктӥмы, нош соос инкуазьзэс дунъяны уг валало…

Абхазия быдэс дуннелы тодмо луиз нимаз кариськыны тыршеменыз, Грузиен ваче вуэменыз. 1990-тӥ аръёсы Грузилэн бурд улаз улӥсь абхаз калык пумит луиз Россилэсь люкиськыны. Асьме кунмы абхазъёслэн мылкыдзылы дурвайиз, Грузилы, валамон, та чик ӧз кельшы. Озьы пуромиз вир кисьтон.

— Ай войналэсь азьло Грузия закон поттӥз: огшоры калыклэн ож тӥрлыкез луыны кулэ ӧвӧл, — тодаз вае Абхазия но Грузия куспын конфликтэ пыриськем но та вакытэ Сухумын улӥсь Алик Тарба. — Озьы коркась корка военнойёс ветлӥзы но калыклэсь пӧйшуран пыӵалъёссэс гинэ но бичазы. Бӧрысьгес валамы: ваньмыз та лэсьтӥськем, кужым грузинъёс палан мед луоз шуыса. Озьы кӧня ке нунал ортчыса, кутскиз война. Грузинъёс вуизы Сьӧд зарезь вылтӥ, Абхазие шутэтскыны лыктӥсьёс кариськыса. Нош уйин, сьӧразы ваем ож тӥрлыкъёссэс кутыса, ныс-ныс кӧлӥсь абхаз калыкез виылыны ӧдъязы. Кин бен тазьы ожмаське?!

Тушмонъёслэн кужымзы огкадь луыны кулэ ук. Абхаз калык ӧз сётскы Грузилы, мылкыдзэ улонэ пыӵатӥз — табере ми нимаз кунын улӥськомы, — данъяськыса шуиз Алик.

1990-тӥ аръёсы пуромем конфликтлэн бервылъёсыз Абхазиын али ке но син шорын. Улыно-вылыно, чебересь юртъёс шалшал буш сыло. Сутскемын но, куашкамын но ӧвӧл, малы отчы нокин уг интыяськы?! Валэктӥзы: со, пе, грузинъёслэн юртъёссы. Соос озьы ик сисьмытозязы сылозы ни: абхаз яке осетин адями грузинлэн липет улаз номырысь но уз пыры. Эшшо но шимесгес югдур Абхазилэн шоркараз — Сухумын. Отысь шор карлудын али ке но сьӧд-сьӧд сылэ правительстволэн юртэз. Укноосыз пазьгылэмын, борддоръёсыз ыбылэмын…

Грузиен ваче вуонын бырыны шедизы 3 сюрс абхазъёс, 15 сюрс грузинъёс, абхаз музъем вылын улӥсь 250 сюрслэсь ятыр грузинъёс, улон интыоссэс куштыса, мурт шаеръёсы кошконо луизы. Война ортчем бере выль кылдэм кунлэн — Абхазилэн — кивалтӥсьёсыз малпанэ вуизы: кунгож сьӧрысь инвестициослы республикаямы выжыяськыны ум сётэ, ваньзэ ӝутомы ас кужыменымы. Но соос санэ ӧз басьтэ: куназы улӥсьёслэн лыдзы кык поллы кулэсмиз, бюджетсы али ке но мырдэм-мырдэм люкаське.

Абхазилэн нимаз кариськеменыз соглаш луизы ООН огазеяськонэ пырись куд-ог кунъёс гинэ, соос пӧлын валтӥсез — Россия. Абхазия туннэ но азинске асьме кунмылэн юрттэмезъя.

Туала Абхазия пумысен таӵе мылкыд кылдэ: кунлыктэ утён, кышкытлыклэсь утиськон вакытсы соослэн йылпумъяське ини. Берло дыре луонлыксы кылдӥз адямилэсь правооссэ утён, экономиказэс ӝутон борды рос-прос басьтӥськыны.  Но та ужзылэсь емышсэ шуак гинэ уд шӧды ай.

Тунсыко: 2009-тӥ арын Абхазилэн бюджетэз 3 миллиард 8 миллион пала лыдъяськиз. Азьвыл санаторийёс-курортъёс, цитрусъёсын бусыос но пӧртэм продукция лэсьтӥсь 500 предприятиос вылын табыш поттӥсь республика понна туала бюджетсы ичилэсь но ичи. Ӵошатон вылысь: кылем арын Россилэн Правительствоез 4 миллиард манет висъяз Краснодар улосын электростанция ӝутонлы.

…Кылем толэзьлэн пумаз Абхазиын ортчиз Президентсэс быръён. Со вакытэ мон но отчы тупай. Ватытэк верало: быръёнъёсмы асьме дорын шулдыргес ортчо. Отын ик калыкмы куаразэ сётэ, отын ик концерт учке, шулдыръяське. Абхазиын быръёнъёс чал-чал ортчизы. Вормисе потӥз Александр Анкваб. Президентэ пуксемез бӧрсьы ик со закон кутӥз: Абхазилэн Гальской ёросаз улон юртъёссэс куштыса кельтэм грузинъёс-беженецъёс интыосазы берытскыны быгатозы. Но мукет ёросъёс сярысь вераськон уг мыны. Вир кисьтонэз Грузилы простить карыны ум быгатӥське, шуиз выль быръем йыр.

Мар шуод: Кавказ палъёс пӧсь мылкыдоесь. Азьло аръёсы Абхазиез совето Ницца нималлязы. Со вакыт республикалэн пушъён дырыз вал. Туннэ абхазъёс уло-выло совето аръёсы басьтэм азинсконъёссы вылын. Кемалы-а тырмозы на соос — тодмо ӧвӧл. Калыкезлэн мылкыдыз понна нюръяськыны быгатэм кунлы кемалась султоно ни азинскон сюрес вылэ.

Елена Никитина.

Удмурт Дунне
By Удмурт Дунне 13 сентября, 2011 10:36
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<