Дунне пияла кадь, йӧтскы гинэ — пилиськоз

Удмурт Дунне
By Удмурт Дунне 9 сентября, 2011 09:49

Дунне пияла кадь,  йӧтскы гинэ — пилиськоз

 Туэ 10 ар тырме США-ын теракт луэм бере. 2001-тӥ арын 11-тӥ сентябре ӵукна 8 час 46 минутэ Нью-Йоркысь Вуз каронъя дуннеысь центрлэсь уйпал башнязэ террористъёсын нуэм самолёт мырӟиз. 20 минут ортчыса, мукетыз самолёт пазьгиз лымшор башняез. Ӝужыт юртъёс бӧрсьысь бӧрсе музъем вылэ куашказы. Куинетӥез самолёт Пентагонлэсь юртсэ пазьгиз. Быриз 2 сюрс 749 адями. Мар воштӥськиз дуннеын, Америкаын та теракт бере? 

Александр Фоминов, Кун Кенешысь Нациосын ужан политикая, кышкытлыклэсь утиськонъя, регламентъя но Кун Кенешлэсь ужзэ радъянъя ялан ужась комиссилэн кивалтӥсез:

— Америкаысь небоскрёбъёсты пазьгонэз телевизор пыр адӟыкум, сюлмы ик мар ке луиз кадь, огаз ӝужыт башнялэн 110-тӥ этажаз мон но куке-соку сылӥ — США-ысь посоллэн ӧтемезъя 1994-тӥ арын Америкае вуылӥ. 11-тӥ сентябрь Америкаын улӥсьёсты гуньдытӥз. Мынам малпамея, США кыӵе ке война ялэмлы но сокем ӧй паймысал, дыр, та терактлы кадь.

Та шимес учыр бере дуннеын тросэз учконъёс но, ачиз Америка но чутрак воштӥськизы. Нырысь ик воштӥськиз США — со кужмо держава шуыса учкон. Собере  валан лыктӥз: сьӧд ужзэс лэсьтыны террористъёслы нокыӵе кунгожъёс уг люкето. Котькӧня ож тӥрлык люкаса-поттыса но, соослэсь уд утиськы. Кыӵе вамыш соос азьланяз лэсьтозы, тодыны-чакланы туж шуг. Туннэ — пуштытъяло, ӵуказе почта пыр яд суретъёс келяло. Соосын йырин юнме шорысь адямиос быро. Терроризм азьын узыръёс но, начаръёс но, пӧртэм религиос но, нациос но огкадь кужымтэмесь. Сое вакчи дыр куспын уд быдты. Мар кароно?

Нырысь ик пӧртэм нациос куспын ог-огдэ валан политика нуоно. Калыклэн улонэзлы бадӟымгес саклык висъяно — узыръёс но начаръёс куспын бадӟым висъяськон медаз луы. Дуннеын туннэ калыклэн лыдыз йылэ, соин валче сютэмъёс но тросгес луо. Нош миллиардеръёслэн узырлыкенызы люкиськемзы уг поты. Соин ик власть ёзъёс но та ласянь нимысьтыз законъёс кутыны кулэ. Уг яра калыкъёслэсь пумитъяськон ужрадъёссэс пыӵалъёсын кужмысь зӥбыны. Ма, отчыозь югдурез вуттыны ик кулэ ӧвӧл, огкылэ вуон амалъёс кутоно. Асьме дунне пияла кадь, йӧтскы гинэ — пилиськоз. Соин ик терроризмез вормон понна дуннеысь вань калыкъёслы но кивалтӥсьёслы огазеяськоно.

Вячеслав Березин, Вавож ёрослэн йырыз:

— Америкаын учыр бере Россия но кышкытлыклэсь утиськонлы бадӟымгес саклык висъяны кутскиз. Прокуратура, МВД, ФСБ та ласянь ӵошен ужаны ӧдъязы. Предприятиосы, организациосы пырисьёсты золгес эскерыны шӧтазы. Терактъёс сярысь иворъёсты али ӝогак калыкозь вутто. Соос адямиослэн йыразы кылё, соин ик гуртъёсын улӥсьёс но чакласькисесьгес луэмын. Кытчы ке огдырлы потыкузы, корказэс азьвыл, пунняса яке гозыен керттыса, гинэ кельтылӥзы ке, табере тунгонаса кошко. Гуртэ вуэм мурт адямиез но чаклало. Теракт котьку витьымтэ шорысь луэ, соин ик туала вакытэ нырулыса пуконо ӧвӧл.

Александр Горошников, Дэбес поселенилэн йырызлэн воштӥсез:

— Терроризмен нюръяськонъя ужрадъёсты Россилэн но  озьы ик Удмуртилэн Правительствооссы чаклало, но соос, мон сямен, тырмытэсь ӧвӧл. Та ласянь республикаямы 2010-тӥ-2015-тӥ аръёслы чаклам программа кутэмын, отын бадӟым саклык висъямын калык пӧлын валэктон уж нуонлы гинэ. Меӵак вераса, адямиос туннэ нокытын но кышкытлыклэсь зол утемын ӧвӧл. Солэсь утиськон понна кунъёслэн кивалтӥсьёссылы нырысь ик сюлмаськыны кулэ ужтэк кылемъёслэсь, начаръёслэсь лыдзэс кулэстон пумысен. Та ласянь учконо ке, республикаямы югдур сокем урод ӧвӧл. Пӧртэм нациос, религиос куспын но шаерамы керетонъёс ӵем уг пуромыло. Азьланяз но озьы ик мед возиськомы.

 

* * *

США-ын пуштон учыр бере чылкак воштӥськиз тушмон шоры учкон. Азьло вераськон мынэ ке вал терактъёслэн «чечен пытьызы» сярысь гинэ, табере террористъёсты утчаны кутскизы исламистъёс пӧлысь но. Ослоын, Норвегиын берло луэм адями быдтон учыръёс озьы ик паймытӥзы: террористъёс кылдо шыпыт улӥсь нациос пӧлын но. Соин ик та эзелен огнын нюръяськыны уг луы. Сое валазы ни трос странаослэн кивалтӥсьёссы. Котькыӵе пумиськонъёсын соос та ужпумез эскеро. Но терроризмен нюръяськонлэсь палэнынгес туннэ сыло на Иран, Пакистан, Саудовской Аравия, Великобритания — трос ож тӥрлык возьыса, терактъёслэсь утиськыны луоз кожало, лэся.

Америкаез кышкатъям бере террористъёс выль кужымен Россия вылэ урдскизы. Тужгес но кӧшкемыт учыръёс вал 2002-тӥ арын Москавысь Дубровка урамысь театрын но 2004-тӥ арын Бесланын. Огаз учырын заложнике басьтэмын вал «Норд-Ост» мюзиклэз 923 учкись, мукетаз — 1-тӥ сентябре школае дышетскыны мынэмъёс. Москваын быриз 130 адями, Бесланын — 334. Террористъёс тодо: США но Россия кык кужмо государствоос луо. Соин ик сьӧд ужъёсынызы та кунъёслэсь дунне азьын данзэс куашкатыны туртто. Сое валаны кулэ котькуд адямилы.

Татьяна Банникова.

Туспуктӥз  Владимир Беломорских.

Удмурт Дунне
By Удмурт Дунне 9 сентября, 2011 09:49
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<