Дауншифтинг удмурт сямен

Удмурт Дунне
By Удмурт Дунне 21 сентября, 2011 14:21
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Дауншифтинг  удмурт сямен

Валера Ядыкин, Ижысь сиськонни удысысь одӥгез усто специалист, тунсыко но аспӧртэм адями. Со тодэ, кызьы усьтоно но «будэтоно» ӟеч кафеез яке ресторанэз. Со тунсыкъяське удмуртъёсын. Ачиз удмурт ӧвӧл ке но. Соин ик вераськоно кариським — провинциын ужан амалъёс, удмуртъёс сярысь но дунне шоры учконэз сярысь.

Кошкод ке, кошкы

— Мон пегӟи Мускоысь, угось акыльтӥз костюмъёс но галстукъёс нуллыны, — вера Валера, пельпумысьтыз гырпумозяз васькись чибориё татуировкаоссэ син шоры поттыса. — Жади калыклэсь, котькытчы кошкыны дась вал ини. Бампӧет (маска) тыроно, котькинъя тупатсконо…
Вить ар куспын татын выжыяськи ни. Анлыосы быгыльскизы, йырсие но ӵыжектӥз — горд луи (серекъя).
11 ар дышетски институтъёсын. Мынам вань апае, со мынэсьтым 10 минутлы арлыдогес: визь солы кошкем, нош чеберлык — мыным. Огъёзъёсы будэтэмын угось, одно кулэ басьтыны вылӥ образование шуыса.
Озьы мон но нуназе дышетски, нош уйин ужай. Нырысь МТУСИ-е (Москваысь связья но информатикая университет) пыри, угось дорлы тужгес но матын вал. Собере кельшымон удысъя мынӥ — Мускоысь ужбергатонъя академие, но ёзэтмес ворсазы. Технологической академие выжи: сур, вина пӧзьтон, нянь пыжон удысъёсты бырйыны луонлыке вал, нош мон малы ке предприятилэн менеджментаз кариськи. Быдтӥ. Диплом басьтыкум, одӥгаз дуно казиноын ужай, ресторанын кивалтӥсь вал ини.
Жадиське адямиослэсь, шулдыръяськонъёслэсь… Вамышлы быдэ ворекъясь сьӧлык, пӧртэм пумо гочанъёс. Мон соку куинь поллы тросгес уксё басьтӥсько вал — сое ваньзэ быдтылӥ дунозэ, ческытсэ, чеберзэ кабыны. Мон пожарник кадь — ваньзэ верано, усьтӥськоно, кожасько. Озьы кышноеным люкиськи, квартираез солы кельтӥ, пыдвылъёсме-улштанъёсме но гожъяськон блокнотме сумкаям донги но кошки.
— Ижевске мынод-а? — юазы уж дэмласьёс.
— Нош кытын со? — юай мон.
Иже вуыса, Мускоысь эшъёсылы собере гожъяй: «Райын кадь улӥсько: трамвай — 7 манет, сур — 12 манет, уждун — 60 сюрс».
Сямы мынам лякыт ик ӧвӧл: Кечтакалэн араз вордскемын. Дышем амалъя уж дурысьтым, ӧсэз тӥяса но, кошкылӥ. Ужан инты 50 процентлы коньдонэн шумпоттыны кулэ, нош 50 процентлы лулэз мед бурдъялоз. Уждунэлэн быдӟалаез вормыны ӧз быгаты кивалтӥсеным урод кусыпъёсмес — со адями визьмо ӧй вал. Нялтас вераса, мон кошки но, сое но уллязы…

Ижысь плюсъёс

— Нырысь ик, татын ваньмыз одӥг интыын, лач-лач.
Мускоын мон ужъёсме арня куспын лэсьтӥсько вал ке, татын — нуназеозь. Султӥсько 7 час 20 минутэ, арнянуналэ — кык часлы бергес. Городлэн пичиез шӧдӥське калыкен кусыпъёсын но: кулэ луись адямиос пӧлысь кыксэ тодӥськод ке, ваньмыныз тодмо кадь. Куинь муртэн тодматскиськод ке, быдэс карез тодӥськод.
Кыкетӥез, туж тросэз таланто но тунсыко адямиос Ижкарысь кошко.
Озьы кылдэ вакуум, конкуренция лябӟе. Котькуд арня мыным жингырто, кинэ ке визьманы куро, кенеш сётыны косо, проект гожтыны дэмлало. Вазисько Глазовысь, Можгалась, Нефтекамскысь. Кинлэн ке бизнес усьтэмез потэ: вань уксёез, интыез, мылкыдыз. Валэктӥськод солы, кӧня кужым но дыр кулэ — малпанзылэсь ӵем дыръя куштӥсько. Ижын мынам проектъёсыя 4 инты усьтэмын.
Куинетӥез, Ижкар котьку чырмыт луыны дышетэ.
Та городын гыньыл-ганьыл луыны уг луы. Маид ке ӧз пишмы ке, сое ваньзы тодозы. Сак луоно!

Умой адямиослы юрттоно

— Мар со мон понна — бар яке ресторан усьтон? Мон адямиослы юрттӥсько. Валтӥсез — уже зымыны, кылемез тодмо луоз. Дунтэк но юрттыны дась, тау карыны валалозы ке. Мон ӟеч адями ук. Ӟеч адямиослы юрттӥсько. Оскисько, соос но мыным юрттыны дась луозы шуыса. Огласянь, та укша адямиосты портонлы, нош мукет ласянь, мон но соос понна маке лэсьтыны дась ук. Питерысь Аня суредаськись али «Давай-давай» бармы понна кенер суреда, со 100 квадрат метр пала. Нош ми солы реклама лэсьтӥськом, соин калыкез тодматӥськом.

Удмуртия — со Лапландия

— Мон Ижкар сярысь куддыр тросгес тодӥсько, татысь улӥсь калыкен ӵошатыса. Кин со сыӵе Бодалёв, Королёв…
— Короленко, шуэмед потэ вал?
— Ах, бен. Ну, кудӥз удмуртъёс понна дурбасьтӥз.
— Удмуртъёс сярысь ке. Москваысь татчы вуэмед бере соку ик ӧд вала, дыр, татын удмуртъёс но уло шуыса?
— Мон али «Дано удмуртлэсь» — Артемий Троицкийлэсь — интервьюзэ лыдӟи — мынам но сыӵе ик шӧдонъёсы. Удмурт шаер — со кыӵе ке но Лапландия. Мускоысь тодмоосы Ижез мӧзмыт суредало: пурысь кар, заводъёс. Муско но Иж куспысь пӧртэмлыкъёсты шӧдӥ транспортын ветлыны кутскеме бере. Зэмзэ вераса, пыдын ветлыны яратӥсько. Егит дыръям спортэн эшъяськи: альпинизм, гурезь но шур туризм, куасъёс, вольной борьба. Хибиныын вал, Тянь-Шаньын, Подмосковьеысь карьеръёсы тубай, Селигер палась, Псков палась нюлэсъёсты мертай… Кунгож сьӧрын огпол гинэ вал: Египетын — кышноелэн куремезъя. Мон кунгож сьӧры уг потаськы. Уг кельшы.
Удмуртъёс пӧлын асме шӧдӥ кыӵе ке дауншифтер выллем. Гоа штатын кадь. Мукет сямен улыны кутски, троссэ выль сямен валай. Улыны луэ «оргиостэк» но. Пичи дыръя кадь тунсыко луиз нюлэскы потыны, чорыганы… Эшъёсы пӧйшуракузы ыбем дукъяосын ушъясько — нош мон кызьпугубиосме возьматӥсько. Лэсьтыны кутски кыскон трубкаос, пуртъёс. Басьтӥсько клинок, ныдзэ ачим лэсьтӥсько. Котькуд калыклэн аслаз пуртэз вань: финъёслэн — финка, удмуртъёслэсь ӧй на шедьты, утчасько.
Автобус дугдылонниосын нырысь пелез вандэ вал: дак, чо, однёрка. Бордам вераськон манеръёс лякисько уго. Ростовын ужакум, вераськыны кутски отысь калык сямен.
— Тон эшшо форумъёсын тодмо адями…
— Огласянь, мон яратӥсько серемез поттыны. Лыктэм, пе, удмуртъёс доры бадӟым ӟуч агай, ваем тӧдьы нянь, гожъяськет но дышетэм синзэс миськыны. Мыным ӟырдыт националистъёс уг кельшо: адями номыр но ӧз на лэсьты, номыр но уг быгаты, нош йыраз кыӵе ке малпан коказ ни — Мултан уж сярысь но уг тоды, вылды. Куке мон вераськисько тунсыко удмуртъёсын, мылкыды ик пуксе: куддыр ас сяменызы бӧтьырто, нош мон уг валаськы. Соку ик малпанъёсам кылдэ кыӵе ке креатив а-ля «Макмыр Monday party». Ми кусып возиськом куд-ог адямиосын, нош быдэс калыкен — ум.
Уг кельшы мыным сыӵе сям — асфальтэн огкадь луыны тыршон. Котькытын — пурысь биомасса. Адӟиськод тани тодмодэ — со тонэ тодмаз, нош синъёссэ мукет пала берыктэ, ӧй, пе, адӟы. Тодмаськод ке, ӟечбуръяськоно! Шыр кадь ватсконо ӧвӧл.
Иже мон улыны кыльысал. Перспективаос вань. Москваын мон ӧй быгатысал депутатэн сур юыны яке троллейбусын министрен мыныны. Вань на кадь социальной висъяськон, но ваньмы огъя одӥг пуртыын пӧзиськом. Туннэ нуналлы мон асме умой шӧдӥсько. Кошкысал ке — Лапландие гинэ.

Дарали Лели

Удмурт Дунне
By Удмурт Дунне 21 сентября, 2011 14:21