Гур вылын пукыса, компьютерез уд сермета

Удмурт Дунне
By Удмурт Дунне 30 сентября, 2011 09:31

Гур вылын пукыса, компьютерез уд сермета

Компьютер сьӧрын - С. Перминова, П. Гырдымова.

Ижысь Ленин ёросын улӥсь Парасковья Андреевна Гырдымовалы удалтӥз. Ёросысьтызы калыклы юрттэт сётонъя центрын компьютер курсъёс ужало. Та центрысь ик ветеранъёслэн кырӟанъя «Калина красная» ансамбльзылэсь сяна, песянай берло дыре та визьмо машиналэсь но уг ӵыды ни. Шуэ: школаын дышетскись внукъёсы компьютерзэс ужато но кысыны вунэто, со ик луиз курсъёсы ветлон муг. Данъяськыса вера, табере «мышка» шуонэз но тодӥсько ни, печатланы дышетскисько.

Сьӧлта ёросысь Вутно гуртын вордӥськем ужысь ветеранлэн Парасковья Андреевналэн вань ужамез 45 ар люкаське. Крезьгуръя училищеез йылпумъяса, нырысь нылпи садын ужаз, пумен дышетскиз медсестрае. Пиналъёсыз бадӟымгес луыса, кӧня ке арзэ больницаын ужаз. Уждунэз пичиысь берло дас вить арзэ заводын тыршиз. Азьмынӥсь нылкышно пыриськылӥз куасэн ӵошатсконъёсы, заводысьтызы хоре ветлӥз. Трос кайгу пыр потыса но, сизьымдон аресъем песянай пересьмонлы уг сётскы. Шуэ: ньылез ик пиосы Кеныысь шайвылын кыллё ни. Мылкыдзэ шумпотто нылызлэн пиналъёсыз, соослэсь бере кылемез уг поты. Нош ачиз нуныкайёссэ крезьгур дуннеен тодматэ.

Ветлон нуналамы Паша апаен ӵош компьютер сьӧрын пуке вал Аниса Миргалимовна Мирзанурова. Таизлы нылкышнолы 58 арес. Компьютер курсъёсы кыкетӥ арзэ ветлэ ни. Висеменым йырсазьы, пе, туж лябӟиз вал, нош дышетскыны ветлыса, трослы ӟечгес луиз. Нылкышно нимысьтыз тетрадь нуэ, вань тодэмзэ, выль кылъёсты отчы гожъя. Нылпиосыз сое азьвыл асьсэлэн компьютерзы сьӧры пуксьыны ик уг лэзё вылэм, табере оско ни. Но Интернетын бугыръяськыны уг ик дӥсьты, созэ, пе, ӧм ортче на.

Нылкышноос туж ушъяло социальной ужасез Светлана Перминоваез. Егит нылашез анай сямен улыны дышето ке но, компьютер сьӧры пуксьыса, школаын дышетскись нылпиос выллем луо, шораз Светлана Андреевна гинэ шуыса вазисько. Арняяз кык пол пумиськыло, занятизы час пала мынэ.

Дышетскыны мылкыд карисьёс пӧлын арлыдоос куамын пала, дас инвалидъёс тодон-валан басьто на. Котькудӥзлы нимаз дыр тупатэмын. Пуко кык компьютер сьӧрын, тодмотэм кылъёсты доска вылысь гожъяло. Компьютер курсъёсты нуэм сяна, Светлана Перминова мукет но юрттэт сётэ, озьы ик дыр шедьтэ заочно амалэн экономистэ дышетскыны. Дорысьтымы гинэ медаз кошкы вал, шуо Парасковья Андреевна но Аниса Миргалимовна. Туж жаляло юрттэт сётон удысын ужасьёсты, уждунзы, пе, укыр пичи.

Ижысь Ленин ёросысь калыклы юрттэт сётонъя 3 номеро центрын компьютер курсъёс 2007-тӥ арысен ужало ни. Центрен кивалтӥсь Ольга Бакалдина шуэ: дышетсконэз радъямы ЦСО-е ветлӥсь «егит» пенсионеръёслэн куремзыя. Ар ӵоже кызё пала дышетскись люкаськиз. Мылкыд карисьёс луэмен, отӥяз ини радъязы кык аръем курсъёс.

Вазиськисьёс пӧлын тросгес пиосмуртъёс. Арлыдоос сяна, компьютерен тодматскыны мылкыд каризы инвалидъёс. Дышетсконъёс дунтэк радъямын. Ольга Валентиновна шуэ, мукет центръёсын но калыклы таӵе юрттэт пичиен-пичиен сётыны луысал, ми но номырин узыр ум улӥське. Калыкез дышето кык вужмем компьютерен, но Интернет вотэсэн герӟаны луонлыкъёссы ӧвӧл ай. Оско, матысь дыре юрттэт луоз. Со сяна, арлыдоосты но инвалидъёсты туала техникаен тодматон борды азьланяз басьтӥськозы, пе,  студентъёс — волонтёръёс.

Банкъёс пенсионеръёслы ӵекто ини пенсизэс социальной картаосы выжтыны, коммунальной юрттэт понна дунъёсты но компьютер я банкомат пыр тырыны. Нош вуоно арысен та амал улонамы паськытгес пыӵаны кутскоз ни. Гуртоослы но, шуныт гур вылын пукон сямен, компьютеръёсты серметатэк уз луы.

 Лия Малых.

Удмурт Дунне
By Удмурт Дунне 30 сентября, 2011 09:31
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<