Вулы мыныса, книгаен бертӥ

Удмурт Дунне
By Удмурт Дунне 7 сентября, 2011 10:31

 Туала кышетъёс огезлэсь чебересь мукетыз — котькыӵезэ бырйы но басьты. Нош мон пичи дыръям таӵе тузӥ кышетъёс ӧй вал. Анай-атайёсмы басьтылӥзы огшорызэгес — тӧдьы басма вылын сяська пужыёзэ. Выль дыръяз со но туж чебер адӟиськылӥз.

Кашамер кышет нырысетӥзэ керттӥ, 9-тӥ классын дышетскыкум. Соку сюанэ ветлӥ. Гуртысьтымы нылъёсынымы ваньмы пӧрмытскимы удмурт дэремен, уксё тӥрлыкен, кашамер кышетъёсын. Анае сётӥз тӧдьы вылын горд сяська пужыё чуко  кышетсэ. «Ой, нылы, кыӵе чебер адскиськод таӵе дӥськутэн», — шуиз со.

Ижысь автозаводын ужакум ни, модае потӥз сьӧд кышет. Тазэ но анае басьтӥз ай. Кышетэлэсь огпал пумзэ чырты котырам бинисько но мукет пумзэ пальто вылам чебер тупатъяса нуллӥсько вал. Со вакытэ ик тодмоосы Прибалтикаысь эшшо одӥг кышет вуттӥзы. Озьы одӥг нунал огеныз ветлӥ, ӵуказеяз мукетсэ керттылӥ.

Кышетэн герӟаськемын улонысьтым огез вунонтэм учыр. Огпол толалтэ ӝыт городысь огаз ошмесэ вулы потӥ. Вылам — сьӧд шуба, йырам — сяська пужыё кышет. Ошмес дуре васькыкум, пумитам тубись воргоронэз адӟи. Солэсь кышкаса, ӧжытак палэнэгес кожи. Нош со пырак шорам лыктэ, дорам вуиз но вераськыны кутскиз, юаз: тон, пе, удмурт ӧвӧл-а? Удмурт, шуисько. «Соку мон тыныд книгаосме кузьмало», — вераз воргорон но дипломатысьтыз кык книгазэ поттӥз, эшшо автографсэ пуктӥз на.

Мар сярысь вераськеммес но уг тодӥськы ни — туж кышкай. Кызьы меда пеймытын но валаз, мон удмурт шуыса? Оло, кышетэлы луыса? Озьы шуоно ке, со вакытэ тросэз ӟуч кышноос но кышетэн ветлӥзы.

Бертыса книгаысь кинюртэмзэ учки но — «Владимир Самсонов» гожтэмын. Нылпи кылбуръёсын но мадиськонъёсын сборникъёс. Соосты мон туж утялтыса вози — огез али но кылле на.

Тӥни озьы — вулы мыныса, книгаен бертӥ. Йырам сьӧд кышетэ ке ӧй луысал, оло,      В. Самсонов мон вӧзтӥм вазьытэк но кошкысал. Со кышетэ туннэ но вань на, куке-соку син азям йӧтэ ке, тодам вайисько ошмес дурын пумиськонэз.

 Елена Скворцова.

Удмурт Дунне
By Удмурт Дунне 7 сентября, 2011 10:31
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<