Вормон тыршытэк уг вуы

Удмурт Дунне
By Удмурт Дунне 30 сентября, 2011 10:01

Вормон тыршытэк уг вуы

Кылем арнянуналэ Россиын пусйизы Машиностроительлэсь нуналзэ. Нош та нуналъёсы данъяськомы вӧзысьтымы мӧйыосты. Та кык праздникъёсты огазеяны луысал одӥг муртлэн — Ижын улӥсь ужысь ветеранлэн Александр  Шестериковлэн — улон сюресэныз.

Та йӧно мӧйы воргорон «Ижмаш» заводын котьку но бадӟым куно. Угось быдэс улонзэ со сӥзиз та предприятилы: нырысь тыршиз инженер-конструктор луыса, бӧрысь солы оскизы заводлэн конструктор бюроеныз кивалтыны. Шаерысьтымы азьмынӥсь огазеяськонлэсь — «Ижмашлэсь» — историзэ табере син азе пуктыны уг луы ни Шестериковтэк.

Вордскиз со Ижын 1931-тӥ арын. Капчи вакыт ӧй вал соку: странаын кузёяськизы сютэм аръёс, ёрмон. Ма, Сашалэн пичи дырыз но секыт вакытэ тупаз: кутскиз война. 10 аресъем пияшлэн анаез, капчигес улон утчаса, вордскем палъёсаз — Вотка ёросэ — бертоно кариськиз. Ож ортчем бере Александр берытскиз Иже, дышетскыны пыриз коммунально-строительной техникуме.  Кык ар дышетскыны вуттӥз-а, ӧз-а, егит пияшез басьтӥзы армие. Шедиз со Дальний Востоке, ПВО-я войское — службазэ нуиз радист-планшетист луыса. Кыдёкысь мурт шаерын но Удмуртиысь пияшез дунъязы но гажазы визьмо, ужез яратӥсь луэмез понна.

Армиысь бертыса, Саша дышетсконзэ азинтӥз Ижысь индустриальной техникумын. Отын со котьку азьпал радын вал: дышетсконын но, пӧртэм ужрадъёсын но. Техникумез йылпумъяса,  йыгаськиз «Ижмаш» заводэ. Озьы ужаны интыяськиз та огазеяськонлэн 58-тӥ ёзаз. Отын ӵапак со вакытэ тыршиз быдэс дуннелы тодмо луэм конструктор Михаил Калашников. Нош бӧрысьгес отчы ик ужаны лыктӥз мукетыз дано конструктор — Евгений Драгунов. Таӵе мастеръёс вӧзын нуналлы быдэ тыршыса, Александр Сергеевич шӧдыса ик ӧз вутты пыӵал тӥрлык лэсьтыны дышемзэ.

Нырысь ик со басьтӥськиз пӧйшуран тӥрлыклы проект кылдытон борды, нош бӧрысьгес тунсыкъяськыны ӧдъяз спортлы чаклам автоматъёсты дасянэн. Ӝоген та егит специалистлы оскизы дано удысэз — сое юнматӥзы «Ижмашлэн» конструктор бюроеныз кивалтӥсе. Бюроысь егит тодосчиос азе курон пуктӥзы: СССР-лэн биатлонъя сборноезлы винтовкаос дасяно. Александр Сергеевич уен-нуналэн йырвизьзэ сыназ: кызьы биатлонистъёслэсь тӥрлыкъёссэс капчигес кароно, кыӵе амалъёсын соосты лэчыт ыбылӥськись лэсьтоно? Со понна Шестериков кӧня пол вуылӥз меда СССР-ын ортчись ӵошатсконъёсы! Отын со чаклалляз спортсменъёслэсь куасэн бызьылэмзэс,  ыбылӥськемзэс. Вань тодэмзэ-чакламзэ со уже кутӥз, винтовкаослы проектъёссэ дасякуз. Соосъя кылдытэм тӥрлыкез уж вылын эскерон вылысь кытчы гинэ ӧз вуылы! Тӧдьы зарезь дуре, Совето Союзысь пӧртэм заповедникъёсы — отын со ачиз ыбылӥськыса эскериз кылдытэм винтовкаоссэ.

— Ӵапак «Ижмаш» заводысь конструкторъёслы оскемын вал Совето Союзысь дано биатлонистлы — дуннеысь 15 пол, озьы ик Олимпиада шудонъёслэн 4 пол чемпионзылы — Александр Тихоновлы винтовка дасян, — тодаз вае Шестериков. — Ми ваньзэ чакламы: та спортсменлэсь киосызлэсь куасалляськемзэс, пельпумъёсызлэсь пасьталазэс, синъёсызлэсь макем лэчыт луэмзэс. Озьы со вормон  бӧрсьы вормон басьяз.

Улон сюресэз пумысен Александр Сергеевич вакчияк шуэ: мон йыртышысеным пыдтышозям пыӵал тӥрлык лэсьтӥсь — заводэ лыктӥ но, кошки но конструктор пуконысь. Ужын вормонъёс басьтэмез понна А. Шестериков пусъемын «Знак Почёта» орденэн, ВДНХ-лэн куинь азвесь медаленыз но Ужысь ветеран нимын.

Та вакытэ Александр Сергеевичлы гань-гань пукыны маза ӧвӧл: дано ветеранзэс куное ӧтчало «Ижмаш» заводын туала вакытэ тыршисьёс. Со сяна, мӧйымемъяз йӧногес но йӧногес луись воргоронэз доразы ӧтчало школаын дышетскисьёс, озьы ик ӵем вуылэ со Ижысь М. Калашников нимо музейын ортчись пумиськонъёсы. Будӥсь пиналъёсты со дунъяны дышетэ ужез.

Елена Тугашова.

Удмурт Дунне
By Удмурт Дунне 30 сентября, 2011 10:01