Ветлӥ-ветлӥ шаеръёстӥ…

Удмурт Дунне
By Удмурт Дунне 14 сентября, 2011 10:08

Ветлӥ-ветлӥ шаеръёстӥ…

М. Степанов.

Дэри ёросысь Пыӵанка гуртын улэ Степановъёслэн семьязы. Михаил Васильевич кибашлы луэменыз тодмо, нош Инесса Павловна та гуртын 16-тӥ арзэ ини ортчытъя А. Пушкинлы сӥзем нуналъёс. Тодмо кылбурчилэн вордскем нуналыз Пыӵанкаысь пиналъёслы но, арлыдоослы но зэмос праздник луэ: чузъясько кылбуръёс, кырӟанъёс, мадёнъёс.

Михаил Васильевич вордскиз 1940-тӥ арын Дэри ёросысь Пыӵанка гуртын. 4 классъем школаез йылпумъяз. Туж умой дышетскиз. 5-тӥ классэ Дэри черкогуртэ мынӥз. Но татын кутскизы шугомонъёс.

— Милям гуртамы ӟучъёс  чик ӧй вал, вераськимы удмурт кылын, школаын но удмурт сямен дышетӥзы, — вера со. — Нош Дэриын ваньмыз ӟуч сямен. Озьы гуньдэм кадь луи. Урод дышетскыны кутски, 8-тӥ классысен дышетсконме куштӥ но колхозэ кошки. Бригадирын соку ужаз дядяелэн кышноез, быдэс Удмуртилы тодмо адями Федосья Николаевна Базуева. Со шуэ: мон тыныд уж уг сёты, мын, пе, дышетскондэ азьланьты. Мон пыкъяськисько, уг пӧрмы, шуисько. Со школалэн директореныз вераськем. Соиз шуэм: 7-тӥ классэз йылпумъяз ук, пе, мед ужалоз.

Но вуиз 1-тӥ сентябрь. Вань пиналъёс школае мыно, нош мон вал возьмасько. Соку мынам пушкам маке но позырскиз кадь. Ас поннам малпасько: мар-о мон табере вань улонме вал возьмалом шат?!

Ӵапак со аре ик Дэриын нырысьсэ усьтӥськиз ӝыт школа. Озьы Миша ужаса дышетскиз.

— Дышетскон аръёсам мон ас поннам ма но со суреданы дауртӥсько вал, — азьланьтэ мадёнзэ Михаил Васильевич, — искусствоосъя школаос, кружокъёс ӧй вал. Но со вакыт ми пала вуиз Москваысь художник. Солы вераллям, мон суреданы йӧндырисько шуыса. Озьы ми пумиським. Со — ӟеч дӥсяськемын, мон — егит маке — керпотӥсько. Учкиз ужъёсме, нош соос ваньмыз сямен мукет суредъёс вылысь лэсьтэмын. Уродэсь, пе, ӧвӧл, но дышетскы аслэсьтыд адӟемдэ суреданы. Ачиз пичи блокнотаз я курегъёсты, я пудоосты, писпуосты, гурт калыкез суредалляз. Мон весь сьӧраз. Со ик этюд суреданы валэктӥз. Бӧрысь Дэриысь суредасен Адольф Березинэн пумиським. Со шуэ: Ижевскын, пе, худграф усьтӥськиз, ойдо ӵошен мыном. Курсамы ваньмыз арлыдоос, ми кык кузя гинэ егитъёс вал.

Соку быдэс Россиын милям кадь 16 гинэ факультет вылэм ай. Мукет интыосын но суредась дышетӥсьёс уг тырмо шуыса, Томске ыстӥзы. Озьы потӥ сюрес вылэ. Свердловскын вӧзам пуксизы кык егит инженеръёс-лэсьтӥськисьёс. Соос шуо: милемыз, пе, ыстӥзы Нижневартовске выль городэз ӝутыны, куриськы отчы. Мон Тюмене вуи, верай мылкыдъёсме. Нижневартовскын ӵапак выль школа усьтӥське вылэм. Дэри, улон коркаос бруслэсь, кык этажъемесь, котькудаз 8 квартира. Школа но пулэсь. Урокъёс трос сётӥзы. Туж ӧз кельшы мыным отын. Комсомоллэн но егитъёслэн стройказы шуо вал, нош тросгес ужазы йыртэмасьёс. Школаын дисциплина туж ляб вал.

Но ӝоген, гостиницаын улыкум, тодматски вуоно кузпалэным Инесса Павловнаен. Со архитектор. Новосибирскын соос та городлэсь проектсэ кылдытӥллям. Соин ик вуиллям татчы лэсьтӥськонлэсь мынэмзэ эскерыны.

Бӧрысь мыным квартира сётӥзы, кузпалъяським. Но ӧз чида сюлэм, 1967-тӥ арын татчы берытским. Интыяськи автозаводэ суредасьёслэн-конструкторъёслэн бюроязы. Инесса Павловна отчы ик архитекторъёслэн группаязы ужаны пыриз. Бӧрысьгес интыяськиз архитекторъёслэн институтазы. Отысен проект дасяз Воткаысь машиностроительной заводысь ракетаос лэсьтон цехлы. Соя ик ӝутэмын вал со. Кузпалэлы мукет бадӟымесь проектъёс но оскылӥзы.

Сибирьын улыкумы, мон юн кынмиськем, туж зол висьыны кутски. 9 толэзь эмъяськи. Инессаез Киеве ужаны ӧтизы. Озьы монэ утён но йӧнатон вылысь Украинае кошким. Со интыяськиз ГЭС лэсьтонэ, собере монэ но кутӥзы со станцие ик суредасе.

Украинаын сизьым ар улӥм. Ваньмыз умой ӧръяськиз ни вал: квартира сётӥзы. Нылмы нырысетӥ классэ мынӥз, вераськыны украин кылын куро. Школае мынӥськод но дышетӥсь, ӟуч кылэз умой тодыса но, монэн лабыртэ ас кылыныз. Соку чидан быриз, бертоно, шуисько, Россие.

Озьы, квартирамес воштыса, улыны кариським Москва дорысь Королёв городэ. Инессаен ӵошен ик ужаны интыяським Москваысь теплоэлектростанциосъя валтӥсь институтэ. Институт ужаз 33 кунлы. Дыр ортчемъя монэ архитекторъёслэн  группаенызы кивалтӥсе пуктӥзы. Соку тӥни келязы командировкае Иранэ. Отын ӝыны арлэсь ятыр проектмылэсь улонэ пыӵамзэ эскерыса улӥм.

Но витьымтэ шорысь Пыӵанкаын анае кулӥз. Сюлэм доре кыскиз. 1992-тӥ арын татчы улыны бертӥм.

Кытысь пуэн вырон мылкыды, ачим но уг валаськы, атай но бадӟым выны ӧз вырылэ соин.

Нош мон пинал дыръям ик кудыос керттӥсько вал. Москваын ужакум но, соин вырылӥ. Огез егит архитектор со сярысь тодӥз но шуэ: ойдолэ, пе, киужъёсъя центре дышетскыны ветлом. Толэзьзэ дышетским. Егит эше ялан возьмаса улэ, ку корзина кутаны визьмалозы. Нош кытысь Москваын ньӧр бичалод? Но бӧрысь шедьтӥм. Отын бадӟым совхоз вылэм, кибашлыослы 16 пумо бадьпу будэто!

*  *  *

Али но кузпалъёс Степановъёс тэк улыны уг чидало. Дорысьтызы потыкум, син шорам йӧтӥз вашкала туспуктэм. Михаил Васильевич валэктӥз: 1913-тӥ   арын лэсьтэмын. Отын пересь атаезлэн но солэн вынызлэн семьяоссы. Йӧноесь, ӟеч дӥсен, дышетскем адямиос. Пересь атаез черкын староста вылэм. Та семья гуртэ  школа пуктэм. Асьсэлэн тӧл вукозы, кеньыр изонзы, нянь пыжонзы, магазинзы вылэм. Бӧрысь соосты кулаке поттӥзы. Тани татысь ик потэмын, дыр, ужез яратон но валан мылкыд.

Иван Аркашев.

Удмурт Дунне
By Удмурт Дунне 14 сентября, 2011 10:08
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<