Вань калыкез паймытом на!

Удмурт Дунне
By Удмурт Дунне Сентябрь 6, 2011 08:23

Вань калыкез паймытом на!

 

«Италмаслэн» сяськаян вакытэз.

1936-тӥ арын 1-тӥ сентябре Удмуртиысь Совнарком кутӥз решение: удмурт калыклэсь, Совето Союзлэсь культуразэ вӧлмытон но паськытатон понна кылдытоно эктонъя но хор кырӟанъя ансамбль. Ним туж чебер шедьтӥзы — «Италмас». Кивалтӥсе пуктӥзы Москваысь консерваториез соку гинэ йылпумъям Апполон Каторгинэз. Егит пияш мыло-кыдо басьтӥськиз ансамбльлэсь репертуарзэ кылдытон борды.

Коллективлы вӧлмыт сюрес усьтӥськиз. Возьматыны быгатӥз пӧртэм калыкъёслэсь сям-йылолъёссэс, тапыртонъёссэс, гуръёссэс. Гастрольёсын вуттӥськизы СССР-ысь пӧртэм улосъёсы, кунгож сьӧры.

1962-тӥ арысен туннэ нуналозь ансамблен кивалтэ Удмуртиысь но Россиысь калык артист Анатолий Мамонтов. Солы юрттэ, ансамбльлэн генеральной директорез луэ пиез Константин Мамонтов.

Кыӵе шока туннэ «Италмас»? Маин паймытыны медэ калыкез? Та но трос мукетыз сярысь кенешимы Константин Мамонтовен.

— Константин Анатольевич, калык пӧлын ветлэ таӵе вераськон: «Италмасэз» пытсаны медо…

— Туала вакытэ «Италмаслы» кун  коньдон уг висъя коммунальной тыронъёс понна. 2011-тӥ арлэсь азьвыл сое со тыре вал. Быдэс арлы милемлы сётӥзы 75 сюрс манет. Со 2-3 кезьыт толэзьёсты ортчытыны сяна ӧз тырмы. Озьы ог 700 сюрс манет тыр пунэмъёсмы люкаськемын.

Кин но со ӵектэ: концертъёсын поттэм коньдонэныды пунэмдэс кысэ. Но коллективлы уждун но тыроно на ук. Зэм, кун та ласянь юрттэ. Но тупатэм окладъёс серемесэсь: ужаны кутскись артист басьтэ 4 сюрс 600 манет. Премиен куддыр 5 сюрсозь люкаське. Сиёд-а, юод-а та уксёдэ? Улон сэрег но туала арын дунтэм ӧвӧл. Ӵапак сыӵеослы юрттон вылысь ик асьме дурем коньдонмес артистъёслы люкылӥськом.

Коллективлы ог 100 сюрс манет вуэ. Гужем но концерт сётыны быгатысалмы ке, оло, тросгес но люкаськысал. Но пӧсь вакытэ калыклы чик но милемын йырин ӧвӧл. Ансамбльын тужгес секыт возьыны балетысь но хорысь воргоронъёсты. Уждун пичи, кошко. Чебер, шер куараё воргоронъёс фирмаосты ӝутыны ӧдъяло. Нош ми кырӟасьлы ёрмиськом. Туннэ хорын 7 воргорон. Азьвыл аръёсы соос 15 кузя но люкаськылӥзы. Егитъёс дорамы уг лыкто. Таин валче коллектив но мӧйыме.

Ансамбльлы выль егит лул шокчыны луысал, вылды, концертъёсын ӵемгес кунгож сьӧры вуылыны кылдысал ке. Пиналъёс дӥнямы куриськысалзы паймымон кунъёсы мынон, отын асьсэды возьматон понна. Но Европае сюрон понна нош ик кулэ уксё. Коллективлы уд шуы ук: уждун таяз толэзе уд адӟе, малы ке шуоно кунгож сьӧры поталом.

Туэ понна «Италмаслы» висъямын 11 миллион манет. Лыдъяса-чотаса, валай: улон понна милемлы кулэ 25 миллион манет. Юбилеен валче вылӥ кивалтӥсьёс доры, сэзьгес кариськыса, пырай. Эшшо 3 миллионэн юрттом, шуизы. Нош кытчы гинэ лякиськоз меда со? Одӥг концертной баян гинэ 400 сюрс манет сылэ.

Балетэн вырисьёслэн пыдкуксы, кылсярысь, 3 арнялы мырдэм тырме — сокем ӝог сурыкме. Табере тани коммунальной услугаос понна но тыриськон выламы усиз.

— Кудбыдӟа туннэ коллективды? Туэ понна кӧня мурт кошкиз радысьтыды?

— «Италмасын» туннэ ужа 70 мурт. Таос пӧлысь 50-эз — артистъёс, отпуск бере 5-ез кошкизы. Оскон сётэ одӥгез: Удмуртиысь Культурая, печатья но иворъёсъя министерствоен валче ужаса, оло, пӧрмытомы ай крезьгуръя училищеосты йылпумъям усточиосты дорамы кыскыны. Юбилей концертъёсы ке но.

— Макем зол воштӥськоз юбилей арады репертуарды? Калыклэсь берло дыре ӵемысь кылоно: концертсы огвыллемгес ортче.

— Куддыръя учкисен соглаш кариськытэк но уг луы. Югдурез тупатыны выриськом. Кылсярысь, али кенешиськом Санкт-Петербургысь дано балетмейстерен Михаил Чайкасовен. Со дасо ар талэсь азьло «Италмаслэсь» нылпи эктонъя школа-студизэ йылпумъяз вал. Быдтӥз культурая институтэз, ужаз Финляндиын. Табере тани милесьтым репертуармес выльдыны юрттӥсько, шуэ. Оскисько: юбилей арамы концертмы воксё выль луоз, калыкез паймытоз.

— Эктонъя нылпи школа-студиды лицензия басьтӥз ни-а?

— Зэмен ик туала куронъёсъя школа-студиез возён понна лицензия кулэ. Сое басьтон понна юртъеред Роспотребнадзорын ужасьёслэн куронъёссылы мед тупалоз. Нылпиослы, пе, кылсярысь, кулэ гылтӥськон-мисьтӥськон сэрег. Кытчы ми душ лэсьтомы? Со сяна, выжмы но, вӧлдэтмы но ярантэм. Кин милемлы лицензия сётоз? Школамес пытсамы. Оскисько: огдырлы. Культурая, печатья но иворъёсъя министерство югдурез тупатом, шуэ кадь.

Ма, сюлэм вирын пылаське: республикаямы нырысьсэ ми кылдытӥмы нылпи эктонъя школа-студия. 1992-тӥ ар вал со. Соин кивалтыны оскизы Россиысь дано артисткалы, Удмуртиысь калык артисткалы, балетмейстерлы Леонора Мамонтовалы. «Италмасъёс» кык полэс шумпотӥзы: шаерысьтымы пиналъёсты культурамылы матынгес каромы, со дыре ик асьмелы кивоштӥсьёсты дасяломы, таосты быдэс республикаетӥ утчанэз, репертуармылы дышетонэз уз луы ни. Нош улон ӧр воксё но мукет сямен шукке тани.

— Мар возьма меда «Италмасэз», дасо ар ортчыса? Выжыысьтыды ик выль кужмо Мамонтов соин валтыны кутскоз яке?..

— Династия кылдытӥськоды ни, шуэмды потэ, дыр. Зэм, ӝыны ар бергасько ни татын. Но мон ансамбльын ӟеч улонлэсь ӧй кылды. Дышетскемея юрист, ужай судья но, адвокат но луыса. Со дыре ик тунсыкъяськемысь ӧй дугдылы анай-атаелэн улонэнызы. Адӟи: секыт соослы — директорзы ӵемысь вошъяське, документъёсын йӧнала бызьылӥсез ӧвӧл. Соин ик юрттоно кариськи. Ӟечлы-а, уродлы-а — уг тодӥськы. Огзэ валасько: туннэлэсь алама уз луы.

Дасо ар сярысь ке верано, сокем кыдёке учкыны но кышкыт. Туннэ мон сюлмаськисько юбилей концертъёс сярысь. Мед быгатысалмы вуылыны кунгож сьӧры. Туж потэ пыриськеммы Сочиын ортчоно Олимпийской шудонъёсы. Программамес концертэ пыртыны курыса, вазиськимы ни.

Талэсь кыдёке учкыны кулэ меда? «Италмас» — усточиослэн коллективзы. Соин кивалтыны кутскиз ке но куинь пол кужмогес худрук, репертуар нуналлы быдэ сямен вошъяськиз ке но, Удмуртиын бадӟым коньдон дурыны луоз меда? Вунэтоно ӧвӧл: асьмелэн вань «Айкай», «Танок» ансамбльёсмы. Эшшо кылдытӥзы на калык инструментъёсъя «Золотая мелодия» хор. Ваньмы республикалэн бюджетысьтыз сиськиськомы. Культуралы уксё ӧвӧл дыръя кулэ-а выль коллектив кылдытыны? Вылаз ик — ваньмы ми одӥг ужен выриськомы — калык сям-йылолъёсты утиськомы, вашкала эктон-кырӟанъёсты учкись доры вуттӥськомы. Нош коньдон огмылы но уг тырмы. Республикаын кулэ луыны одӥг, но кужмо ансамбль. Котькызьы мед нимаськоз со. Но огназ луиз ке, 10 но, 20 но арез кышкатэк улоз.

Елена Сараматова.

Удмурт Дунне
By Удмурт Дунне Сентябрь 6, 2011 08:23
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<