Валамзылы паймим

Удмурт Дунне
By Удмурт Дунне 7 сентября, 2011 10:28

Валамзылы паймим

 Шаерысьтымы удмурт пиналъёс арлы быдэ вуыло Венгриысь Балатон ты дуре, пырисько калыккуспо фольклор фестивале. Балатон ты дурысь лагерьын шутэтскыны мыным но шуд усиз.

Венгрие ми вазь ӵукна ик пыримы. Нуназе бере кин ке но кеськись луиз: «Учке — Балатон!» Мон укное мычиськи но адӟи вераны луонтэм чебер тыэз. Сюрес вылын жадеммы соку ик кытчы ке тӧлӟиз. Автобусысь потыкумы, мадьяр кылын «Вирагом» («Сяська») кырӟанэз быдэстӥм. Милемыз пумитась нылпиос но мӧйыос сьӧрамы кырӟаны кутскизы. Шӧдӥськиз: соос вуэммылы туж шумпотэмын.

Ярдурысен Балатон мур ик вылымтэ. Мыным, уяны быгатӥсьтэм муртлы, со ик кулэ. Вуэз шуныт, али гинэ кыскем йӧл кадь. Вожалэс ке но, ачиз чылкыт, пыдэсыз ик адӟиське.

Вунонтэм кылиз лагерез усьтон нунал. Ӵукнаысен ик удмурт дэремъёсмес дӥсямы. Маша сузэреным калык пӧлы ульчае потӥмы но, ваньмыз шорамы  абдраса учко. Уката ик паймизы весьёсмылы — уксё тӥрлыклы.

Мыноно вал флагъёс доры. Отчы кырӟаса вамыштӥм. Арганэн шудӥз Катя апай — Пичи Пурга ёросысь Бобья-Уча гуртысь нылкышноослэсь «Арганчи» ансамбльзэс кылдытӥсь Екатерина Антонова.

Удмурт флагмес ӝутыса, мадьяр нылпиос милемыз мукет площадкае нуизы. Отын асьсэ эктонъёссэс дышетӥзы. Но милям соос сямен тапыртэммы уг луы. Соос угось туж шаплы выро.

ӵуказеяз ӵукна милемыз тодматӥзы удмурт-мадьяр семьяен — Миклош Дэметэрен но Анастасия Петроваен. Соослэн Ката но Дёнди нылъёссы туж чебер верасько удмурт, ӟуч но мадьяр кылъёсын. Атайзы Удмурт кун университетын студентъёсты дышетӥз. Балатон ты дурын со милемлы аслаз лэсьтэм кубызэныз шудӥз. Нош Анастасия Владимировна мадьяр кылъя урок ортчытӥз. Ми венгер кырӟанэз дышетӥм, собере сое ик удмурт сямен но кырӟамы.

Анастасия Владимировнаез мон талэсь азьвыл ик тодӥсько ни вал. Со монэ мадьяр кыллы Кузебай Герд нимо гимназиын дышетӥз. Ижын люкиськонмы шуак луиз: улыны, пе, кошкиськомы Венгрие. Мон соку ӧй но малпа, куке-соку ми соин кунгож сьӧрын пумиськомы шуыса.

Огаз ӝытазе пуктӥмы концерт. Мукет кунъёсысь нылпиос но асьсэлэсь быгатонлыкъёссэс возьматӥзы. Пӧлазы вал инвалидъёс но. Милесьтым кырӟам-вераммес туж умой пумитазы.

Мукетаз ӝытэ пиосмы мадьяръёсын ӵош футболэн шудӥзы. Асьмелэнъёс келязы. Но ми ӧм куректэ, угось ӵуказеяз милемыз нуллӥзы Балатонбоглар городэ. Туж тунсыко потӥз.

Лагерьын туж кельшиз «Киужъёсъя станциосын» шудон. Мастер-классъёс, спорт шудонъёс, куасьмем кукуруза куаръёслэсь, сӥньысэн керттылыса, сяськаос лэсьтон.

Вунонтэм кылиз Венгриысь одӥг гинэ космонавтэн Берталан Фаркашен  пумиськон. Со туж умой вераське ӟуч кылын, Россиын дышетскем, СССР-лэн но Украиналэн наградаосыз вань. 1980-тӥ арын асьме космонавтъёсын ӵош со сизьым сутка ӵоже лобам.

Тихань городэ но вуылӥмы. Со тылэн мукет палаз интыяськемын. Отчы паромен потамы. Городлэн тужгес но ӝужыт интыяз пичи паровозэн тубамы. Паймимы чеберлы но чылкытлы. Паровозын мынонъямы Маша сузэрелэн паспортэн, телефонэн но уксёен сумкаез усьыса кылиз. Ваньмы шуэрским. Марика нимо венгер нылаш Машалы юрттыны басьтӥськиз, паровоз нуллӥсен вераськиз. Машалэсь сумказэ со, писпу борды ошыса, кельтэм. Татын сюлмо но адямиез валась  муртъёс уло вылэм.

Венгрие вуылэме ноку уз вуны. Отысен мон эшшо золгес валай: кыл — со калыклэн туж бадӟым узырлыкез. Соин ик асьмелы ваньмылы одно ик дышетыны кулэ выжыосмылэсь кылзэс, тодоно культурамес.

Кузь сюрес вылэ милемлы потаны юрттӥзы «Удмурт кенеш» огазеяськонын тыршись Елена Александрова, «Удмурт кенешлэн» исполкомезлэн ёзчиосыз, Кузебай Герд гимназиысь завуч Галина Чушъялова, арганчи Екатерина Антонова но эмчи Александр Терехов.

Сокеме вуэммы понна Инмарлы но вань та ӟеч адямиослы тау.

Вера Шкляева,

К. Герд нимо гимназиысь 11-тӥ классын дышетскись.

Удмурт Дунне
By Удмурт Дунне 7 сентября, 2011 10:28
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<