Беризь вышкыос, сусыпу сарваос

Удмурт Дунне
By Удмурт Дунне 14 сентября, 2011 10:02

Беризь вышкыос, сусыпу сарваос

 Шаерысьтымы Киужъёсъя центрын ужа выль адӟытон. Та рад устолыксэс возьмато балезино палъёс. Уно киужъёссэс шоркарамы вуттӥзы Карсовай, Сергино но Юнда черкогуртъёсысь кибашлыос.

Карсовайысь киужъёсъя юрт усьтэмын 1993-тӥ арын. Туннэ татын тырше 18 усточи. Соос бадьпу ньӧрез пуно, горд сюез улӟыто, куисько, пужъятӥсько, пуэз вӧло, шудонъёс, сарваос, вышкыос лэсьто.

Карсовайысь кибашлыослэн юртысьтызы методист Анна Уланова верамъя, уйпалась усточиослэн кизы волямын ини, соосты тодманы луэ ужъёссыя.

— Кылсярысь, Пётр Светлаков но Алексей Першин паймымон бекчеос, вышкыос лэсьто. Тросэз кибашлыос вольыт бекчеос пӧрмытъяло ке, Пётр Ивановичлэн  беризьлэсь бадӟым вышкыосыз но суредъёсын чеберъямын луо. Нош Алексей Филиппович яратэ векчи посудаез. Кибашлы соосты сусыпулэсь лэсьтэ. Кылсярысь, сарваосаз сылалтэм губилэн зыныз ик мукет луэ. Куд-огаз коньяк возьыны луэ, мукетаз сюкась поныны яра, умой луоз кузьымлы но басьтыны.

Карсовайысь кибашлыосты тодмало ини кызьпу туйлэсь лэсьтэм пелёкучыранъёсъя. Галина Першиналэн та уй бурдоосыз утись выллем луо. Удмуртъёс та тылобурдоез гажало, малы ке шуоно кучыранэз вашкалаосмы лыдъязы визьмо, дыртӥсьтэм но малпаськись бурдоен.

Паймыто куиськисьёсмы. Уйпал удмуртъёслэсь вашкала дӥськутсэс выль сямен улӟыто Ольга Дудкина но Надежда Першина. Киужъёсъя юртлэн Юндаысь ёзэтэныз кивалтӥсь Марина Марьина синмаськемын бесерман дӥськутлы. Со сярысь ваньзэ тодэ но ачиз ик куэ-вуре. Озьы ик вань катьясь миндэръёсмы. Сусыпу сулэн тырмытэмын соос, ческыт зыно луэм сяна, жадемез но йырвисёнэз буйгато, — шуэ Анна Сергеевна.

Карсовайысь кибашлыослэн юртазы егитъёс но тыршо.  Нырысетӥ араз ик усточи луэменыз паймытэ ини Андрей Коньков.

— Мон 5-тӥ классысен ветлӥ Карсовайысь нылпи творчествоя юртэ кружоке. Дышетӥсе Геннадий Макарович Некрасов юрттӥз киме волятыны. Мон пичиысен ик яратӥсько пуэз чеберъяны. 2007-тӥ арын шкатулкаосме но панноосме ыстӥ шаерамы ортчись выставкае. Бӧрысь со вить ужме келямы на Россиын ортчись конкурсэ. Отын мон диплом но грант утӥ, — шуэ Андрей Коньков.

Балезиноысь усточиослэн адӟытонзы ужалоз 5-тӥ октябрёзь. Собере кибашлыос дасясько Киров улосэ, отын ортчоз куинетӥез калыккуспо фестиваль.

    Галина Семёнова.

    Туспуктӥз Константин Семёнов.

Удмурт Дунне
By Удмурт Дунне 14 сентября, 2011 10:02
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<