Асьме атаман, яке Кызьы удмурт адями казакъёсын кивалтыны кутскиз

Удмурт Дунне
By Удмурт Дунне Сентябрь 7, 2011 10:33

Асьме атаман, яке Кызьы удмурт адями  казакъёсын кивалтыны кутскиз

 

Та тодматскон шӧдтэк шорысь луиз. Мордовие семинаре поездэн мыныкумы, вӧзамы тупаз пезь-пезь мугоро мӧйы пиосмурт. Мукетъёсыз пӧлысь со соку ик висъяськиз ассэ йӧн-йӧн воземеныз, лад-лад вераськеменыз. Тусыз — лымшор палъёсын быдэсмем-кыдам муртлэн кадь. Соин ик Кубаньысь атаман луэмзэ тодэммы бере сокем ӧм пайме кадь. Но чылк-чылк удмурт сямен вераськыны кутскемез бӧрсьы нырысь ыштӥським ик… 

Казак тыпак удмурт вылэм. Пётр Мардамшин вордӥськем 1938-тӥ арын огшоры удмурт семьяын, Башкортостанысь Татышлы ёросысь Вукогуртын (Уразгильды).  Атаез, Гарайша Мардамшинович, Вылӥ Татышлы сельсоветлэн председателез, пе, вал, анаез, Зайнаб Сафияровна, колхозын ужам.

Ма, Пётр Мардамшинэз тодӥсьтэм мурт ноку ӧй малпасал солэсь удмурт выжыысь луэмзэ. Тусаз пыӵамын — атаман но тӥни. Ачиз воргорон серекъя гинэ. Пинал дыръям Уфаысь техникая училищее дышетскыны пыри, пе, вал, но армие басьтӥзы, Краснодар шаере шеди.  Татын пияш ар ӵоже дышетске полклэн школаяз, радиотелеграфист луэ. Собере службазэ ортче Краснодар городысь Авиацияя военно-технической училищеын, ожгар аэродромын радиотелеграфист луыса. Будэ радиостанцилэн кивалтӥсез дорозь.

Службазэ ортчемез бере Пётр Гарайшевичлэн лымшор шаеръёсысь кошкемез ӧз луы ни — бордаз думиз паймымон чебер инкуазь, пӧсь шунды. Дышетскыны пыриз Кубаньысь гурт хозяйствоя институтэ. Кыкетӥ курсысен ни Уйпал Кавказысь ожгар округлэн командующиезлэн приказэзъя запасысь офицер луэ. Сокугес ик пыре КПСС-лэн радаз. ВЛКСМ-лэн комитетэзлэн секретарезлэн воштӥсез луэ. Бӧрысьгес Мардамшинлы вылӥ лейтенант звание сёто на. Нош институтэз йылпумъяса, Пётр агрономлэсь дипломзэ басьтэ.

Егит специалист тырше валтӥсь агроном луыса сакыр поттӥсь заводъёсын, собере Краснодар улосысь гурт хозяйствоя управлениын валтӥсь специалист луэ, наукаез но вылӥ технологиосты  пыӵатон бордын ужа. Пенсие кошкон азяз тырше Краснодар улосысь сортоиспытательной станциын.

— 1958-тӥ арысен мон ужасько но службаме ортчисько Кубаньын, — шуэ Пётр Гарайшевич. — Быдэс улонэ та шуныт шаерен герӟаськиз. 2000-тӥ арын пыри Совето офицеръёслэн Краснодар улосысь союззылэн радазы. Огазеяськонлэн кивалтӥсез огпол вазиськиз: запасысь офицеръёслы, оло, казакъёс доры службае мыноно? Соослы юрттоно? Сыӵе малпанэз умоен лыдъямы. Монэн ӵош службае выжизы офицеръёс но, полковникъёс но. 2004-тӥ арын казаке пырон присяга сётӥ «Рождество Пресвятой Богородицы» храмын. Дэмлазы станицаысь казакъёслэн штабзылэн кивалтӥсез луыны. Нош куать ар талэсь азьло бырйизы Новопокровск районысь казакъёслэн Пересьёссылэн кенешенызы (Совет стариков) кивалтӥсе.

Старейшинаосын кивалтыны оскыкузы, Пётр Гарайшевичлы 64 арес вал. Кык ар талэсь азьвыл сое та интые выльысь бырйизы. Озьыен, оско, гажало.

Секыт ӧвӧл-а улонэз адӟем адямиосын, арлыдоосын кивалтыны юанлы со нош ик пальыша:

— Службае но, уже но туж тунсыко. Трос лыдӟиськоно луэ. Юн кусып возиськом школаосын, отын усьяськомы казак классъёс. Кенеше пырисьёсын ӵош потаськомы нылпиос доры, мадиськом казакъёс сярысь, соослэсь историзэс, культуразэс. Котькуд хуторын, станицаын, городын вань Пересьёслэн кенешсы, соослэн кивалтӥсьёссы. Вань ёзчиос —  пенсие потэм калык. Озьы ке но —  йӧноесь, йыг-йыг возисько.

Пересьёслэн кенешсы — со Кубаньысь казакъёслэн войскозылэн оглюкетэз. Пыкиське казакъёслэн ожгар йылолъёссы вылэ, шугъяськытӥсь юанъёсъя кенешонъёс понна кутӥське.

— Азямы сылӥсь валтӥсь ужпум — казакъёслы но соослэн семьяоссылы юрттоно православной осконэз возьыны, адямилыко луыны, пыӵатоно дауръёсысь кылем ӟеч сямъёсты, — пусъе атаман. — Ми сюлмаськиськом кун но мукет службае егитъёсты дасян ласянь, шуге-леке шедемъёслы юрттӥськом, одно ик ветлӥськомы храме, Православной казачестволэн юнлыкез понна вӧсяськиськом.

Пересьёслэн советазы пырисьёс но атаман одно ик быдэсъяно луо нимысьтыз куронъёсты: асьсэ малпанъёссэс кужмысь пыӵатыны уг яра, вераськись муртэ куспетӥ кароно ӧвӧл, кылзыны быгатоно, арнянуналъёсы но праздникъёсы черке ветлоно, кураськись дортӥ ортчыку, одно ик маке сётоно, котьку чылкыт дӥсяськоно но ӟеч ужъёс гинэ лэсьтоно.

Казак общество но, атаман но нокыӵе ужпумез ӝутыны уг быгато, священниклэн но пересьёслэн бакель каремзытэк, — пусъе Мардамшин. Зэм, Пересьёслэн кенешсы дэмла гинэ. Но казакъёслэн сборзылэн чакламезъя атаманлы но советлы кытӥяз сётӥське «вето» право. Озьыен, кыӵе ке ужрад казакъёслы тыпак уг яра ке, соос быгато асьсэ кылзы вылын сылыны.

Пётр Гарайшевич туж ӝутскем мылкыдын маде казакъёс сярысь. Нош удмурт выжыезлэсь, калыкезлэсь пичи но уг мӧзмы шат?

— Вордӥськем интыос вань улонлы син азе яркыт кылё, — шуэ удмурт казак. — Котькуд адями кыстӥське аспал шаераз. Озьы ик, лымшоре вуылыса вылысь, тылобурдоос но,  чорыгъёс но берытскыло уйпал шаеръёсазы. Сыӵе ни со — улэп макеослэн дуннезы. Но куд-ог учыръёс улон радэз воштыны быгато. Озьы мон но семья кылдытэме бере бертылыны шергес пӧрмытӥ ни. Кузпалыным Мария Антоновнаен ныл но пи будэтӥм. Жаль, туж визьмо, чебер нылы, шудтэм учыре шедьыса, быриз… Нош пие Кубаньысь Научно-исследовательской институтысь валтӥсь специалист, техника наукаосъя кандидат луэ.

Пенсие потыса, Пётр Мардамшин вордӥськем шаераз арлы быдэ вуылыны тырше.

— Покчи дырысьтым гуртэн, ӵыжы-выжыосын, эшъёсын пумиськон, анай кылын вераськон — сюлэмез небӟытӥсь эмьюм кадь, — куараез дыректэ казаклэн.

— Нош Кубаньын удмурт эшъёсты воксё ӧвӧл шат? Оло, отысь удмуртъёсты огазеяны быгатысалды?

Та юанлы воргорон валэктыны шугъяськиз. Удмуртъёс вань шуыса, тодӥсько, пе.

 *  *  *

 Поездын пумиськон бӧрсьы трос ик дыр ӧз ортчы, редакцие Краснодар палась жингыртӥсь луиз. Казакмы лымшор шаеръёсысь удмуртъёсын юнгес кусып тупатыны малпам, удмурт газет басьтон мылкыдзэ шараяз. Табере редакцие бадӟым конвертэн вуыло атаманлэсь гожтэтъёс, нош отчы лобо удмурт газетъёс. Кемалась ӧвӧл берен вуиз азьвылгес ик келям удмурт газетмы. Ма таӵе та? Со, пе, удмурт семьяосын киысь кие ветлыса, оло, ӝыны Кубанез ортчиз, котькудӥз дорын арня пала улӥз. Табере тӥледлы синпельлы келяськом, гожтэм Пётр Гарайшевич.

Кӧня удмуртъёс Краснодар улосын — берло лыдъян-чотанъёсъя тодмо ӧвӧл на. Но Пётр Мардамшинлэн малпамезъя, 4-5 сюрс пала. Нош солэн Новопокровской ёросаз 187 удмурт улэ. Эк, аресын, пе, егитгес луысал на ке, Кубаньын но «Удмурт кенешлэсь» ёззэ кылдытысал…

Елена Панфилова.

Удмурт Дунне
By Удмурт Дунне Сентябрь 7, 2011 10:33
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<