«Факеллэн» выль шокчонэз

Удмурт Дунне
By Удмурт Дунне 13 сентября, 2011 09:10

«Факеллэн»  выль шокчонэз

 

Выль линиез усьтон.

Эгра ёросысь «Факел» заводлы кылдэмез дырысен 150 ар тырмиз. Юбилееныз коллективез ӟечкылаз Удмуртилэн Президентэз Александр Волков. Предприятие вуылыса, со пыриськиз пияла поттонъя выль линия усьтонэ.

«Факел» — шаерысьтымы огез вашкалаез предприятие. Сое 1861-тӥ арын кылдытӥз Григорий Сергиев купец. Завод чидаз трос революциосты, ожъёсты, кылем даурлэн 90-тӥ аръёсаз ортчем воштӥськонъёсты. Кык ар талэсь азьло предприятиез басьтӥз «Удмуртспиртпром» огазеяськон. Со дырысен «Факелын» выльдӥськон кутскиз. Али татын 600 пала адями ужа. Факел посёлокын улӥсьёс пӧлысь тросэзлы татын уж шедиз.

Выль линия усьтонлы басьтэмын Швейцариысь тодмо «Эмхарт Гласс» фирмаысь  оборудование — со тямыс секциен но куинь шапыкен ужась машина. Асьме дорын сяна, Россиын нокытын но со уг на кутӥськы. Линия усьтонэ пыриськиз Швейцариысь фирмалэн валтӥсь директорез Франсуа Лаенен. Солэн верамезъя, таӵе оборудованиез али куто дуннеысь ньыль  интыын гинэ — Франциын, США-ын, Индиын но Удмуртиысь Факел посёлокын. Та машиналэсь кужымзэ ӵошатыны луэ азьвыл аръёсы ужам вить машинаосын. Табере ар ӵоже 100 миллион пияла ӟенелик поттыны луоз.

— Шумпотоно: предприятие юбилейзэ выль производствоен пумита, — шуиз Александр Волков. — Со выль луонлыкъёс усьтоз производствоын культураез ӝутонлы. Нош республика посёлоклы юрттоз культурая юртсэс тупатъяны.

Президент пусйиз: Можгаысь пияла поттон заводын но выльдӥськон мынэ, но отын «Факелын» кадь техниказы ӧвӧл ай.

— Выль проект борды басьтӥськыкумы, ми нырысь ик чаклам солэсь дунзэ но ӟечлыксэ. Вакчи дыр куспын проектмес уже кутыны быгатӥм. Оскисько, куинь-ньыль ар ортчыса, татын эшшо одӥг выль цех усьтӥськоз. Со понна бадӟым мылкыдмы но, луонлыкмы но вань, — шуиз «Удмуртспиртпром» огазеяськонлэн валтӥсь директорез Николай Сорокин.

Удмуртиысь Президентлэн

но Правительстволэн

пресс-службазы.

Удмурт Дунне
By Удмурт Дунне 13 сентября, 2011 09:10