Удмурт Дунне
By Удмурт Дунне 10 августа, 2011 10:17


Йӧспӧртэм шӧмо огреч

3 литръем банка пыдсы тыроно 1-2 пилет чеснок, 2-3 кӧжы пӧсьтурын, быдэн вай укроп но мята. Вылаз пононо миськем огречъёсты. Отчы кисьтоно пӧзьтэм рассолэз. Сое дасяно тазьы: 1 литр вуэ пононо 50 грамм сылал, 20 грамм сакыр, 250 грамм сьӧдсутэр сок. Быректэмез бере кисьтоно кияр вылэ, ӵоктано но банкаеныз валче пӧзьтоно (стерилизовать кароно) 8-10 минут ӵоже.

Гордсутэрен кияр

Кулэ луоз: 2 кило кияр, ӝыны стакан горд сутэр, 3 пилет чеснок, 1 пуньы сылал, 3 пуньы сакыр, быдэн 1 пуньы уксус но вишня, кирень куаръёс, укроп, пӧсьтурын.

Кияръёсты миськыса тыроно банкаосы, 1 литр быректэм вуэн пылатоно но 5 минут ӵоже пукетоно. Вузэ кисьтоно но солэсь ик маринад пӧзьтоно 3 минут ӵоже, сылал но сакыр поныса. Быректэм лымез кисьтоно банкаосы, со вылэ ик будэтоно 1 пуньы уксус но гордсутэръёсты, ворсано.

Кабачки питранъёс

Пинал кабачкиосты котырес вандылоно, зӧкталазыя 2 сантиметр котыр. Кык палзэ ик вӧйын пырсатоно но сӥямзэ возьмано. Банкаосы 40-50 грамм томат соус пононо но отчы кабачкиосты тыроно. Эшшо 100 -150 граммзэ быректыса кисьтоно, банкаослэн пельпумзы дорозь. Крышкаосын ворсано но банкаен валче пӧзьтоно (ӝыны литръем банкаосты стерилизовать кароно 40 минут, литръемъёссэ — 60 минут). Та сиён нимаз салат, юон вӧзы куртчон выллем луэ.

Яблокен ӵужкушман

Кулэ луоз: 4 кило ӵужкушман, 1 кило яблок, кирень, вишня куаръёс, укроп, пӧсьтурын (кӧжы). Рассоллы — 5 литр ву, 200 грамм сылал.

Ӵужкушманэз миськоно, котырес юдоно яке вуштоно. Яблокъёсты миськыса ньыльлы люконо. Пичи вышкы яке кастрюль пыдсы тыроно кирень, вишня куаръёсты, пӧсьтурынэз. Собере вӧлдоно ӵужкушманэз, бӧрысь яблокез, вылаз кисьтоно рассолэз. Сое кыметэн ӵоктано, секыт маин ке ӟибоно но кезьыт азе пуктоно.

Чечым

Толалтэлы емышъёсты кынтыны, соослэсь компот, варення пӧзьтыны луэ. Нош сакыр ки улады ӧвӧл ке, ваньзэ сое чечыен суралтоно. Кылсярысь, 1 литр банкаез сутэрен тырмытӥськоды. Вылаз 120-150 грамм чечы понӥськоды. 1 кило сутэрлы кошке 200 грамм чечы. Банкаез 10-15 минут ӵоже стерилизовать кароно но корт шобретэн пытсано. Та емыш, ӟеч утиськем сяна, туж пайдаё но ческыт луэ. Таӵе амалэн котькыӵе емышез толлы «ворсаны» луоз. Крыжовникез банкаосы тырыкуды, эн вунэтэ емышез нырысь пасяны. Сотэк крыжовник, банкаын пӧзьыкуз, пуштылоз.

Курыт-ческыт кубиста

Та салатэз дасяны мыноз 1 кило кубиста, 1 кило ческыт пӧсьтурын, 5-6 йыр сугон, 60 грамм сылал.

Бакча сиёнъёсты векчи юдоно, пӧсьтурынэз вандылэмлэсь азьло пӧсьвуано, ваньзэ суралтоно сылалэн. Салатэз банкаосы тыроно но маринадэн кисьтоно. Лымзэ пӧзьтыны кулэ луоз: 1 литр вулы 400 грамм уксус но 200 грамм сакыр. Юдэм бакча сиёнъёсын но быректэм маринадэн банкаосты 15 минут ӵоже стерилизовать кароно но  толлы ворсано.

Ӵыжектэм баклажанъёс

Та салатлэн туж аспӧртэм шӧмыз, но кин сое веръя, ваньмызлы кельше. Сое дасян понна кулэ луоз: 2 кило помидор, 1 кило баклажан, 1 кило ческыт пӧсьтурын, 1 йыр чеснок, укроп, 6 пуньы уксус, 2 пуньы сылал, 3 пуньы сакыр.

Помидорез но пӧсьтурынэз мясорубка пыр поттоно но тыл вылэ пуктоно. Быректэмез бере пӧлаз ик ватсано юдэм баклажанъёсты но нош ик пӧзьтоно. Огшап улыса, будэтоно сылал, сакыр, пыргытэм чеснок, укроп но уксус. Эшшо 10 минут пӧзьтоно но банкаосы тыроно, одно ик маин ке шобыртоно. Сӥямез бере ини луоз гулбече интыяны.

 Азьтэм помидоръёс

Басьтоно 3 литръем банка, пыдэсаз миськыса пононо сутэр, кирень но вишня куар, укроп, 2-3 пилет чеснок. Собере банка пельпум дорозь тыроно помидоръёсты. Шобыртоно соосты котырес юдэм сугонэн (кулэ луоз 5-6 йыр). Пызьнано бадӟым пуньы сылал, кисьтоно ӵаж-ӵаж кезьыт вуэн, умой луоз, ошмес ву вайиды ке. Капрон крышкаен ӵоктано но ог 3 арня возьмано помидоръёслэсь кисьмамзэс. Банкаосты кезьыт интыын сылӥзы ке,  тулысозь но уз сӧриське.

Галина Семёнова.

 

Удмурт Дунне
By Удмурт Дунне 10 августа, 2011 10:17
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<